Piştî ku Adem û Hewa ji baxçeyê Adenê hatin derxistin, gelek zarokên wan çêbûn. Qayîn kurê wan ê pêşîn bû. Ew bû cotkar. Habîl kurê wan ê diduyan bû. Ew bû şivan.

Rojekê Qayîn û Habîl qurban ji Yehowa re pêşkêş kirin. Tu dizanî qurban çi ye? Qurban tê maneya ku mirov diyariyekê dide Xwedê. Yehowa qurbana Habîl eciband, lê ya Qayîn ne eciband. Qayîn pir qehirî. Hêrs û qehira wî dikaribû bibûya sebeb ku ew tiştekî xerab bike. Ji ber vê yekê, Yehowa Qayîn hişyar kir. Lê wî guh neda Yehowa.

Piştre Qayîn ji Habîl re got: ‘Were em bi hev re herin nav zeviyan.’ Gava ew û birayê xwe bi tena serê xwe li wir bûn, Qayîn hicûmî birayê xwe kir û ew kuşt. Piştî vê yekê, Yehowa çi kir? Yehowa Qayîn ceza kir. Wî ew ji malbata wî dûr xist û nehişt ku ew careke din vegere malê.

Dersa ji bo me çi ye? Gava tiştek li gor dilê me neçe, belkî em jî diqehirin û bi hêrs dikevin. Gava em bibînin ku em zû diqehirin, gerek em çi bikin? An jî eger kesên din hêrsa me ferq bikin û me hişyar bikin, gerek em çi bikin? Gerek em dev ji qehira xwe berdin û xwe biguherînin. Eger em wisa nekin, belkî em dikarin tiştekî xerab bikin.

Habîl ji Yehowa hez dikir û ya rast dikir. Loma Yehowa tu carî wî ji bîr nake. Wexta ku Xwedê dinyayê dîsa bike cenet, ewê Habîl ji mirinê rake.

Bi zeman re mirov li ser erdê zêde dibûn. Gelek ji wan xerab bûn. Hinek melekên li ezmanan jî xerab bûn. Wan mala xwe ya li ezmanan hişt û daketin ser erdê. Tu dizanî wan çima ev yek kir? Ji ber ku wan dixwest bi jinan re bizewicin.

Gava ev melekên xerab bi jinan re zewicîn, kurên wan çêbûn. Kurên wan pir biqewet û bêrehm bûn. Wan zilm li xelkê dikir. Yehowa nehişt ku ev yek wisa bimîne. Loma wî qerar da ku Tofanekê bîne ser erdê û hemû kesên xerab tune bike.

Lê zilamek hebû ku ne wek wan bû. Wî ji Yehowa hez dikir. Navê wî Nûh bû. Ew zewicî bû û bavê sê kuran bû. Navê wan Sam, Ham û Yefet bûn. Her sê kurên wî jî zewicî bûn. Ji bo ku Nûh û malbata wî di Tofanê de sax bimînin, Yehowa ji Nûh re got ku gerek ew gemiyeke mezin çêke. Ev gemî wek qutiyeke pir mezin bû û dikaribû li ser avê biherike. Ji bo ku heywan jî xelas bibin, Yehowa ji Nûh re got ku gerek ew gelek heywanan jî têxe gemiyê.

Nûh zû dest bi çêkirina gemiyê kir. Ji Nûh û malbata wî re teqrîben 50 sal lazim bûn ku vî karî xelas bikin. Eynî wek ku Yehowa ji wan re got, wan gemî tam wisa çêkir. Di wê demê de, Nûh xelk hişyar dikir û ji wan re digot ku Tofan wê li ser erdê rabe. Lê tu kesî guh neda wî.

Di dawiyê de wext hat ku ew têkevin hundirê gemiyê. Ka em binêrin piştre çi bû.