Padîşahiya Xwedê di Kitêba Pîroz de cihekî esasî digire. Yehowa dixwaze bi destê Padîşahiya xwe dinyayê bike cenet. Gelo Padîşahiya Xwedê çi ye? Em ji ku dizanin ku ew îro hukim dajo? Padîşahiya Xwedê heta niha çi kiriye? Û ewê di pêşerojê de çi bike? Ev ders û her du dersên din cewabên van pirsan didin.

1. Padîşahiya Xwedê çi ye, û Padîşahê wê kî ye?

Padîşahiya Xwedê hukûmeteke heqîqî ye û Yehowa ew ava kiriye. Padîşahê vê hukûmetê Îsa Mesîh e, û ew ji ezmanan hukim dajo (Meta 4:17; Yûhena 18:36). Kitêba Pîroz dibêje: “Ewê her û her … padîşahiyê bike” (Lûqa 1:32, 33). Padîşahê Padîşahiya Xwedê, yanî Îsa Mesîh, wê li ser temamiya dinyayê hukim bajo.

2. Kî bi Îsa Mesîh re hukim dajo?

Îsa Mesîh ne bi tena serê xwe hukim dajo. Însanên “ji her bavikî, ji her zimanî, ji her gel û ji her miletî … ewê li ser dinyayê padîşahiyê bikin” (Peyxam 5:9, 10). Gelo çend kes wê bi Îsa Mesîh re hukim bajon? Ji wexta ku Îsa Mesîh hatibû ser rûyê erdê û vir ve, bi milyonan însan li ser rêya wî dimeşin. Lê tenê 144.000 însan diçin ezmên ku bi Îsa Mesîh re hukim bajon (Peyxam 14:1-4 bixwîne). Hemû însanên din wê wek welatiyên Padîşahiya Xwedê li ser rûyê erdê bijîn (Zebûr 37:29).

3. Padîşahiya Xwedê çima ji hemû hukûmetên dinyayê çêtir e?

Hin hukimdarên dinyayê hewl didin ku ji bo welatiyên xwe tiştên qenc bikin, lê qeweta wan nagihîje her tiştê ku dixwazin bikin. Li dinyayê hukimdarek tê û yek diçe, û dibe ku hukimdarê nû ji bo xêra welatiyên xwe hukim neajo. Lê belê, tu kes wê cihê hukimdarê Padîşahiya Xwedê, yanî cihê Îsa Mesîh, negire. Xwedê padîşahiyeke wisa ava kiriye ku tu caran hilnaweşe (Danîêl 2:44). Îsa Mesîh wê li ser temamiya erdê hukim bajo, û ewê bê ferq û bê cudahî ji her kesî re qenc be. Ew hukimdarekî dilovan, qenc û adil e, û ewê însanan bielimîne ku ew ji hevdû hez bikin, ji hevdû re qenc û adil bin (Îşaya 11:9 bixwîne).

4. Hukûmeteke biqudret wê li ser temamiya dinyayê hukim bajo

Qudreta Îsa Mesîh ji qudreta hemû hukimdarên di tarîxê de mezintir e. Meta 28:18 bixwîne û li ser vê pirsê sohbetê bikin:

• Çima Îsa Mesîh ji hemû hukimdarên dinyayê xurttir e?

Hukûmetên dinyayê tên û diçin, û ew tenê li ser perçeyekî dinyayê hukim dajon. Lê hukûmeta Padîşahiya Xwedê çawa ye? Danîêl 7:14 bixwîne û li ser van pirsan sohbetê bikin:

• Çima baş e ku Padîşahiya Xwedê wê tu caran hilneweşe?

• Çima baş e ku ewê li temamiya dinyayê hukim bajo?

5. Ji însanan re hukûmeteke nû lazim e

Çima gerek Padîşahiya Xwedê şûna hukûmetên dinyayê bigire? VÎDEOYÊ vêxe û li ser vê pirsê sohbetê bikin:

VÎDEO: Padîşahiya Xwedê Çi ye? (Bi Qismî) (1:41)

• Gelo hukûmetên dinyayê hewcedariyên însanan têr dikin?

Waiz 8:9 bixwîne û li ser vê pirsê sohbetê bikin:

• Tu çi dibêjî, çima lazim e ku Padîşahiya Xwedê cihê hukûmetên dinyayê bigire?

6. Hukimdarên Padîşahiya Xwedê ji halê me fehm dikin

Ji ber ku Padîşahê me, Îsa Mesîh, wek însan li ser rûyê erdê jiyabû, ew ji halê me û ji kêmasiyên me jî rind fehm dike (Îbranî 4:15). Yehowa Xwedê 144.000 kes hilbijartine ku bi Îsa Mesîh re hukim bajon. Ev jin û mêrên dilsoz “ji her bavikî, ji her zimanî, ji her gel û ji her miletî” tên hilbijartin (Peyxam 5:9).

• Îsa Mesîh û hevhukimdarên wî dizanin ku jiyana însanekî çawa ye. Gelo ev fikir dilê te rihet dike?

7. Qanûnên Padîşahiya Xwedê pir xweş in

Hukûmet ji bo xêr û selametiya welatiyên xwe qanûnan derdixin. Qanûnên Padîşahiya Xwedê jî hene, û gerek welatiyên wê li gor wan bimeşin. 1. Korîntî 6:9-11 bixwîne û li ser van pirsan sohbetê bikin:

• Tu çi dibêjî, eger her kesî li gor van qanûnên Xwedê hereket bikira, halê dinyayê wê çawa bûya?a

• Tu çi dibêjî, gelo heqê Yehowa heye ku ji bo welatiyên Padîşahiya xwe qanûnan derxe?

• Gelo însanên ku guh nadin van qanûnan dikarin xwe biguherînin? (Li ayeta 11an binêre.)

BI ÇEND GOTINAN

Padîşahiya Xwedê hukûmeteke heqîqî ye û ewê ji ezmanan li ser temamiya dinyayê hukim bajo.

Tu çi elimî?

• Hukimdarên Padîşahiya Xwedê kî ne?

• Çima Padîşahiya Xwedê ji hemû hukûmetên dinyayê çêtir e?

• Yehowa ji welatiyên Padîşahiya xwe dixwaze ku ew çi bikin?

ZÊDETIR HÎN BIBE

Padîşahiya Xwedê li ku ye? Îsa Mesîh çi gotibû?

“Gelo Padîşahiya Xwedê Tiştekî di Dilê Mirov de ye?” (Meqaleya Înternetê)

Çima Şahidên Yehowa berî hukûmetên însanan ji Padîşahiya Xwedê re dilsoz dimînin?

Ji Padîşahiya Xwedê re Dilsoz Dimînin (1:43)

Kitêba Pîroz li ser 144.000 hevhukimdarên Îsa Mesîh çi dibêje?

“Kî Diçe Ezmên?” (Meqaleya Înternetê)

Jinikeke hebskirî çawa gihîşt vê qenaetê ku tenê Xwedê dikare dinyayeke adil ava bike?

“Ez Pê Hesiyam ku Bêedaletî wê Nemîne” (Hişyar Bin!, Mijdar 2011)

Padîşahiya Xwedê ji sala 1914an ve li ezmên hukim dajo. Di eynî salê de, rojên dawîn ên hukûmetên dinyayê jî dest pê kiriye. Em vê yekê ji ku dizanin? Werin em bibînin ku Kitêba Pîroz ji berê ve çi gotiye. Gelo ji sala 1914an û vir ve, halê dinyayê û halê însanan çawa bûye?

1. Kitêba Pîroz ji berê ve çi gotiye?

Danîêl pêxember gotibû ku Padîşahiya Xwedê wê piştî derbasbûna wexteke bi navê “heft dem” dest bi hukimdariyê bike (Danîêl 4:16, 17). Gelek wext bi şûn de, Îsa Mesîh jî behsa eynî wextê kir. Wî ev wext wek “zemanê miletan” bi nav kir û wî gotibû ku ev wext hê derbas nebûye (Lûqa 21:24). Emê di vê dersê de bibînin ku ev heft dem di sala 1914an de çawa bi dawî bûn.

2. Ji sala 1914an û vir ve, halê dinyayê û halê însanan çawa bûye?

Şagirtên Îsa Mesîh ji wî pirs kir: “Çi wê bibe nîşana hatina te û dawiya dinyayê?” (Meta 24:3). Îsa Mesîh ji wan re gotibû ku gava ew wek Padîşahê Padîşahiya Xwedê hukim bajo, gelek tişt wê li ser rûyê erdê biqewimin. Mesela, wî gotibû ku şer, xela û erdhejîn wê çêbin (Meta 24:7 bixwîne). Wekî din, Kitêba Pîroz ji berê ve gotibû ku ji ber kirin û hereketên însanên xerab ên “di rojên dawîn de”, jiyan wê gelekî zor û zehmet be (2. Tîmotêyos 3:1-5). Bi taybetî ji sala 1914an û vir ve, ev halê dinyayê û sifetên însanan bi zelalî tên dîtin.

3. Ji wexta ku Padîşahiya Xwedê hukim dajo û vir ve, çima halê dinyayê ew qas xerab bûye?

Wexteke kin piştî ku Îsa Mesîh bû Padîşah, wî li ezmanan bi Îblîs û cinên wî re şer kir. Di vî şerî de, Îsa Mesîh zora Îblîs û cinên wî bir. Kitêba Pîroz li ser Îblîs dibêje ku “ew û milyaketên wî pê re hatin avêtin ser rûyê erdê” (Peyxam 12:9, 10, 12). Îcar xezeba Îblîs pir rabûye, çimkî ew dizane ku ewê bê tunekirin. Loma, ew bûye sebebê kul û derdên dinyayê. Ji ber vê yekê, em ecêbmayî nabin ku halê dinyayê ew qas xerab e! Lê Padîşahiya Xwedê wê ji hemû kul û derdan re bibe derman.

HÛR Û KÛR BIFIKIRE

4. Hesabkirina gotinên pêxemberan me dibe sala 1914an

VÎDEO: Padîşahiya Xwedê ji Sala 1914an ve Hukim Dajo (5:02)

Xwedê kir ku Padîşahê Babîla qedîm, yanî Nebûkadnetsar, xewnekê bibîne. Xwedê ji wî re nîşan da ku di pêşerojê de çi wê biqewime. Em ji vê xewnê û ji şîroveya Danîêl pêxember hîn dibin ku ev xewn ne tenê behsa hukimdariya Nebûkadnetsar dike, lê behsa Padîşahiya Xwedê jî dike (Danîêl 4:17 bixwîne).a

Danîêl 4:20-26 bixwîne, li resim mêze bikin û li ser van pirsan sohbetê bikin:

• (A) Nebûkadnetsar di xewna xwe de çi dît? (Li ayetên 20 û 21ê binêre.)

• (B) Çi wê bihata serê darê? (Li ayeta 23yan binêre.)

• (C) Piştî derbasbûna “heft deman” çi wê biqewimiya? (Li ayeta 26an binêre.)

Çi Eleqeya Xewna der Heqê Darê de bi Padîşahiya Xwedê ve Heye?

PÊXEMBERTÎ (Danîêl 4:20-36)

Hukimdarî

(A) Dareke mezin

Hukimdarî ji dest diçe

(B) “Darê bibirrin” û “bila heft dem di ser wî re derbas” bibin.

Hukimdarî dikeve dest

(C) “Wê padîşahiya te li te vegerînin”

Pêxembertî cara ewilî tê cih

• (D) Dar kê temsîl dike? (Li ayeta 22yan binêre.)

• (E) Hukimdariya wî çawa ji destê wî çû? ​(Danîêl 4:29-33 bixwîne.)

• (F) Piştî derbasbûna “heft deman”, çi hat serê Nebûkadnetsar? ​(Danîêl 4:34-36 bixwîne.)

PÊXEMBERTÎ CARA EWILÎ TÊ CIH

Hukimdarî

(D) Padîşahê Babîlê, Nebûkadnetsar

Hukimdarî ji dest diçe

(E) Berî Mîladê piştî sala 606an, Nebûkadnetsar hişê xwe winda dike û ji bo heft salan nikare hukim bajo

Hukimdarî dikeve dest

(F) Hişê Nebûkadnetsar tê serê wî û ew ji nû ve dest bi hukimdariyê dike

Pêxembertî cara diduyan tê cih

• (G) Dar kê temsîl dike? ​(1. Dîrokan 29:23 bixwîne.)

• (H) Hukimdariya wan çawa ji destê wan çû? Em ji ku dizanin ku gava Îsa Mesîh li dinyayê bû, hukimdarî hê jî neketibû destê wan? (Lûqa 21:24 bixwîne.)

• (I) Ev hukimdarî kengê û li ku derê dîsa ava bûye?

PÊXEMBERTÎ CARA DIDUYAN TÊ CIH

Hukimdarî

(G) Padîşahên Îsraêlê yên ku hukimdariya Xwedê temsîl dikin

Hukimdarî ji dest diçe

(H) Orşelîm wêran bûye, û xanedana Padîşahên Îsraêlê ji bo 2.520 salan tê qutkirin

Hukimdarî dikeve dest

(I) Îsa Mesîh li ezmên dest pê dike ku wek Padîşahê Padîşahiya Xwedê hukim bajo

5. Ji sala 1914an û vir ve, halê dinyayê xerabtir dibe

VÎDEOYÊ vêxe.

VÎDEO: Sala 1914an: Destpêka Rojên Dawîn (1:10)

Îsa Mesîh ji berê ve gotibû ku, piştî ku ew bibe Padîşah halê dinyayê wê çawa be. Lûqa 21:9-11 bixwîne û li ser vê pirsê sohbetê bikin:

• Gelo te di emrê xwe de tiştên wisa dîtine yan bihîstine?

Pawlosê şandî gotibû ku însanên di rojên dawîn de wê çawa bin. 2. Tîmotêyos 3:1-5 bixwîne û li ser vê pirsê sohbetê bikin:

• Gelo te di emrê xwe de însanên wisa dîtine?

6. Ji ber ku Padîşahiya Xwedê hukim dajo, gerek em çi bikin?

Meta 24:3, 14 bixwîne û li ser van pirsan sohbetê bikin:

• Kîjan karê muhîm nîşan dide ku Padîşahiya Xwedê niha hukim dajo?

• Tu çawa dikarî tev li vî karî bibî?

Padîşahiya Xwedê niha li ezmên hukim dajo, û di wexteke nêzîk de, ewê li ser temamiya dinyayê hukim bajo. Îbranî 10:24, 25 bixwîne û li ser vê pirsê sohbetê bikin:

• Ji ber ku em “dibînin ku roja Xudan nêzîk dibe,” gerek em çi bikin?

BI ÇEND GOTINAN

Pêxembertiyên Kitêba Pîroz, hesabkirina deman û halê dinyayê îsbat dikin ku Padîşahiya Xwedê niha hukim dajo. Eger em bi vê bawer bikin, emê behsa Padîşahiya Xwedê bikin û herin civînan.

Tu çi elimî?

• Piştî dawiya heft demên ku di kitêba Danîêl de derbas dibin, çi qewimî?

• Tu çima bawer dikî ku Padîşahiya Xwedê ji sala 1914an ve hukim dajo?

• Tu çawa dikarî nîşan bidî ku tu bawer dikî ku Padîşahiya Xwedê niha hukim dajo?

ZÊDETIR HÎN BIBE

Ji sala 1914an û vir ve, halê dinyayê çawa hatiye guhertin? Tarîxzan û kesên din li ser vê yekê çi dibêjin?

“Mirov ji Aliyê Exlaqê ve Pir Sist Bûne” (Hişyar Bin!, Nîsan 2007)

Zilamek dibêje ku gotinên ji Meta 24:14 çawa li ser jiyana wî tesîr kiriye.

“Min ji Her Tiştî Bêtir ji Beyzbolê Hez Dikir!” (Birca Çavdêriyê No. 3 2017)

Em ji ku dizanin ku pêxembertiya di Danîêl beşa 4an de behsa Padîşahiya Xwedê dike?

“Padîşahiya Xwedê ji Kengê ve Hukim Dajo? (Qisim 1)” (Birca Çavdêriyê, 1 Cotmeh 2014)

Çi nîşan dide ku “heft demên” ku di Danîêl beşa 4an de derbas dibin, di sala 1914an de xelas bûn?

“Padîşahiya Xwedê ji Kengê ve Hukim Dajo? (Qisim 2)” (Birca Çavdêriyê, 1 Mijdar 2014)

Padîşahiya Xwedê êdî hukim dajo. Di wexteke nêzîk de, Padîşahiya Xwedê wê halê dinyayê bi temamî biguherîne. Rojên xweş û geş li benda me ne! Ka em binêrin ku Padîşahiya Xwedê wê ji bo me çi bike.

1. Padîşahiya Xwedê wê çawa aştî û edaletê li dinyayê çêke?

Îsa Mesîh wê hemû însanên xerab û hukûmetên dinyayê di şerê Harmegedonê de tune bike (Peyxam 16:14, 16). Wê çaxê, ev soza Xwedê wê bê cih: “Di nêz de wê dawiya yê xerab bê” (Zebûr 37:10). Ji ber ku Îsa Mesîh Padîşahê Padîşahiya Xwedê ye, ewê aştî û edaletê bîne dinyayê (Îşaya 11:4 bixwîne).

2. Gava ku daxwaza Xwedê li ser rûyê erdê bê cih, jiyan wê çawa be?

Di bin hukmê Padîşahiya Xwedê de, “kesên rast wê rûyê erdê, bi mîrasî bistînin û her û her li ser bijîn” (Zebûr 37:29, Wergera Weşanên Do). Xeyal bike ku jiyana me wê çi qas xweş be! Tenê kesên rast wê li dinyayê hebin. Ewê ji Yehowa û ji hevdû hez bikin. Tu kes wê nexweş nekeve, û her kes wê heta bi hetayê bijî.

3. Piştî tunekirina însanên xerab, Padîşahiya Xwedê wê çi bike?

Piştî tunekirina însanên xerab, Padîşahê me, Îsa Mesîh, wê ji bo 1.000 salî hukim bajo. Di wê wextê de, Îsa Mesîh û 144.000 hevhukimdarên wî wê alî însanan bikin ku ew gav bi gav bigihîjin bêqisûriyê. Di dawiya 1.000 salî de, temamiya dinyayê wê bibe ceneteke bedew. Hemû însan wê bextewar bin, çimkî ewê guh bidin Yehowa Xwedê. Dû re, Îsa Mesîh wê hukimdariyê teslîmî destê Bavê xwe Yehowa bike. Hingê, navê Yehowa Xwedê wê bi temamî bê pîrozkirin (Meta 6:9, 10). Ev yek jî wê bê îsbatkirin: Yehowa Hukimdarê herî baş e, ew bi rastî xema xizmetkarên xwe dixwe. Paşê, Yehowa wê Şeytan, cinan û hemû kesên ku li hemberî hukimdariya wî serî radikin, helak bike (Peyxam 20:7-10). Û ev halê pir xweş wê heta bi hetayê dewam bike.

HÛR Û KÛR BIFIKIRE

4. Padîşahiya Xwedê wê hukûmetên dinyayê tune bike

“Serweriya zilamekî, li ser yekî din, bi xesara wî ye” (Waiz 8:9). Lê Yehowa wê bi destê Padîşahiya xwe vê neheqiyê bi dawî bike.

Danîêl 2:44 û 2. Selanîkî 1:6-8 bixwîne û li ser van pirsan sohbetê bikin:

• Yehowa Xwedê û Kurê wî, Îsa Mesîh, wê çi bînin serê hukûmetên însanan û alîgirên wan?

• Heta niha, tu li ser Yehowa û Îsa Mesîh hînî gelek tiştan bûyî. Tu çima dikarî bawer bî ku ewê bi awayekî adil hereket bikin?

5. Îsa Mesîh Padîşahê herî baş e

Padîşahê me, Îsa Mesîh, wê ji bo xêra însanan gelek tiştên baş bike. Ew hem dixwaze û hem jî qudreta wî heye ku alî însanan bike, çimkî Yehowa Xwedê çavkaniya qudreta wî ye. VÎDEOYÊ vêxe û bibîne ku Îsa Mesîh ev yek çawa nîşan daye.

VÎDEO: Îsa Mesîh Nîşan Da ku Padîşahiya Xwedê wê Çi Bike (1:13)

Wexta ku Îsa Mesîh li dinyayê bû, wî nîşan da ku ewê di pêşerojê de çi bike. Ji nav van xêr û bereketan, kêfa te herî zêde ji kîjanê re tê? Van ayetan bixwîne û li ser wan bifikire:

6. Rojên xweş û geş li benda me ne

VÎDEO: Rojên Xweş li Benda Me ne (4:38)

Zebûr 145:16 bixwîne û li ser vê pirsê sohbetê bikin:

• Fikra ku Yehowa wê daxwaza hemû mexlûqatên xwe bîne cih, li ser te çawa tesîr dike?

BI ÇEND GOTINAN

Padîşahiya Xwedê wê hemû hedefên xwe bîne cih. Ewê tevahiya dinyayê bike cenet. Însanên baş wê li ser rûyê erdê bijîn. Ewê heta bi hetayê ji Yehowa re îbadetê bikin.

Tu çi elimî?

• Padîşahiya Xwedê wê navê Yehowa çawa pîroz bike?

• Em çima dikarin bawer bikin ku Padîşahiya Xwedê wê hemû sozên Xwedê bîne cih?

• Ji nav xêr û bereketên Padîşahiya Xwedê, dilê te dixwaze kîjanê bibîne?

ZÊDETIR HÎN BIBE

Harmegedon çi ye?

“Şerê Harmegedonê Çi ye?” (Meqaleya Înternetê)

Çi wê di tengasiya mezin de biqewime? (Meta 24:21)

“‘Tengasiya Mezin’ Çi ye?” (Meqaleya Înternetê)

Dê û bav û zarok xeyal dikin ku ew di cenetê de dijîn.

Xwe di Cenetê de Xeyal Bike (1:50)

Serhildêrekî siyasî çawa cewabên pirsên xwe dîtine? Bala xwe bide meqaleya bi navê “Gelek Pirs û Meseleyan Hişê Min Xwaribû.”

“Kitêba Pîroz Jiyanê Diguherîne” (Birca Çavdêriyê, 1 Çile 2012)