DINYA HALEKÎ GIRANDA NE

1 | Sihet-Qewatê Xwey kin

ÇIMA EV YEK FERZ E

Krîzîs yan jî qezî dikare xirab hukum be ser sihet-qewata meriva.

Kul-derd meriva dikine strêsê û ji bo strêsa ku dirêj dikişîne, meriv qidûm dikeve.
Krîzîs, teşqelên tebiyetê û çetinayên din dikarin xirab ser mêdîsînayê hukum bin û nexweşxanada dikare bona gelek nexweşa cî û derman tune bin.
Ji bo çetinaya merivara dikare zor be pera destxin seva ku tiştên lazim qazanc kin, mesele xwarin û dermana.

Tu Çi Gerekê Bizanibî

Nexweşiya giran û strês dikare ser hiş-aqilê te hukum be, ji bo çi jî tera dikare çetin be safîkirinên rast bikî. Axiriyêda diqewime tu hê zêde nexweş kevî.
Hergê tu dîna xwe nadî nexweşiyên xwe û xwe qenc nakî, ev yek dikare halê te diha xirab ke û hela hê emirê te jî bike bin qeziyê.
Çiqas tu sihet-qewat bî, haqas hê baş tuyê bona çetinaya hazir bî û bikaribî safîkirinên rast bikî.
Firqî tune çiqas destê teda heye, yeke tu dikarî tiştekî bikî, wekî miqatî sihet-qewata xwe bî.

Tu Çi Dikarî Nihada Bikî

Merivê serwaxt pêşda xofiyê divîne û tiştekî dike ku xwe xwey ke. Evê yekê em dikarin derheqa sihet-qewatê jî bêjin. Tu dikarî bi saya xweykirina temizayê, xwe ji nexweşiya xwey kî. Diha baş e pêşda pey siheta xwe binihêrî, ne ku serê xwe bêşînî û hewcê dermana bî.

“Çaxê em bedena xwe û mala xwe temiz xwey dikin, îda em haqas perên xwe ser derman û doxdira xerc nakin” (Andrêas).a

a Hine nav vê jûrnalêda hatine guhastinê.

ÇA QEWATÊ BISTÎNIN—Şîretên Kêrhatî

Seva ku wedê çetinaya sihet-qewata xwe xwey kin, van şîreta hildin hesab

TEMZAYÊ XWEY KIN

Temizayê xwey kin

Kitêba Pîroz dibêje: “Yê aqil xirabîyê ku dibîne hevza xwe dike” (Metelok 22:3). Bixebite ku têderxî çi dikare ziyanê bide sihet-qewata te û ji vê yekê xwe dûr bigire.

Gelek car pê sabûnê û avê destê xwe bişo, îlahî pêşiya ku destê xwe bidî xwarinê û paşî destavê.
Timê mala xwe temiz ke û dêzînfêksiya bike, îlahî wan tişta, kîjana gelek car destê xwe didinê.
Çiqas te tê, xwe dûr bigire ji wan meriya, nexweşiya kîjana dikare derbazî ser te be.

XWERINA KÊRHATÎ BIXWIN

Xwerina Kêrhatî Bixwin

Kitêba Pîroz dibêje: “Bedena tu kesî ber çevê wî ne reş e, lê wê têr dike û xwey dike” (Efesî 5:29). Em bi wê yekê nîşan dikin ku bedena xwe hiz dikin, gava em xwarin û vexwarinêda fesal in.

Êpêce av vexwe.
Cûre-cûre êmîş û pincara bixwe.
Tiştên rûnî, şor û şîrin kêm bixwe.
Titûn û narkotîkê nede xebatê, ne jî zef îçkê vexwe.

“Seva ku nexweş nekevin, em gerekê xwarina kêrhatî bixwin; hergê em usa nekin, emê mecbûr bin perê xwe ku usa jî hindik e, ser doxdira û dermana xerc kin. Me safî kiriye, wekî perê xwe ser xwarina kêrhatî xerc kin” (Karlos).

SPORTÊVA MIJÛL BIN Û HÊSA BIN

Sportêva mijûl bin

Kitêba Pîroz dibêje: “Mista tije ya bi rihetî, ji kulma tije ya bi zehmetî û ketina pey bayê çêtir e” (Waîz 4:6, ÎM). Hemikî em gerekê bixebitin, lê em usa jî gerekê hêsa bin.

Sportêva mijûl be. Tu dikarî bi wê yekê destpêkî, ku her roj hema hevekî rê herî. Hergê tu emirda mezin î, bêsihet î yan jî nexweşiya teye xronîkî heye, sport dikare sihet-qewata te baş ke.
Hêsa bin

Êpêce hêsa be. Cûrekî din bêjin, hergê tu xewa xwe nestînî, strêsa te dikare zêde be û tera çetin be dîna xwe bidî ser tiştekî. Wede şûnda jî ev yek wê problêmên diha giran pêşda bîne, yên sihet-qewatêva girêdayî.
Safî ke, ku tu siheta çenda razêyî û safîkirina xwe neteribîne. Bixebite ku her roj wededa razêyî û rabî.
Çaxê tu nav ciyada nî, têlêvîziyonê nenihêre û hacetên elektronîk jî nede xebatê.
Pêşiya razanê xwarina giran nexwe, tiştên bi kofêyînê û îçkê venexwe.

“Min têderxist wekî xewa min hemû aliyava ser sihet-qewata min hukum dibe. Çaxê ez xewa xwe nastînim, serê min û bedena min dêşe. Lê çaxê ez rind xewa xwe distînim, hingê ez xwe usa baş texmîn dikim ku hazir im çiya jî welgerînim! Qewata min cîda ne û ez zû nexweş nakevim” (Castîn).