TÊMA JI RÛYÊ JÛRNALÊ
Xwedê Ça Dinihêre ser Şer?
Hûnê ça caba vê pirsê bidin? Gelek meriv difikirin ku Xwedê şera qebûl dike. Çimkî ewana dibêjin ku berê Xwedê temî daye hine xizmetkarên xwe, seva ku ewana şer bikin. Û Kitêba Pîroz ewê yekê înkar nake. Lê hinek jî difikirin ku nihêrandina Xwedê li ser şer hate guhastinê û roja îroyîn ew şera qebûl nake. Çimkî ewana dîna xwe didine li ser vê yekê ku Kurê Xwedê, dêmek Îsa peyçûyên xwe hîn kir ku dijminê xwe hiz bikin (Metta 5:43, 44).
Lê hûn çi difikirin? Xwedê şera qebûl dike? Hergê erê, ew di şerên îroyînda piştgiriya kê dike? Hergê hûn caba wan pirsa pêbihesin, nihêrandina we hindava şer dikare bê guhastinê. Mesele, hergê di şerda Xwedê piştgiriya wî alî bikira, kîjan ku hûn piştgiriyê dikin, hingê hilbet hûnê şa bûna. Lê weyê xwe ça texmîn kira, hergê Xwedê piştgiriya wî alî bikira, piştgiriya kîjanî hûn nakin?
Dêmek, ew yek ku em ça fem dikin derheqa nihêrandina Xwedê hindava şer, dikare hukum be li ser nihêrandina me hindava Xwedê. Hergê hûn yek ji wan mîlyona meriva ne, yên ku ji bo şer rastî kul-derda hatine, bêşik weyê jî bixwasta bizanibûya caba wan pirsa: “Gelo şer bi hêlankirina Xwedê dibin, û gelo ew qebûl dike wan kul-derdên ku ji şer tên? Yan dibeke qe xema Xwedê nîne ku çi halîda nin ew merivên ku ji bo şer zîyanê distînin?”
Dibeke hûnê ecêbmayî bimînin çaxê pêbihesin caba Kitêba Pîroz ser wan pirsa. Bi rastiyê, çawa berê usa jî roja îroyîn nihêrandina Xwedê hindava şera nehatiye guhastinê. Werên binihêrin ku nihêrandina Xwedê ça bû ser şera berê û qirna yekêda. Û ew yek wê alî me bike, ku em fem kin hela Xwedê niha ça dinihêre ser şera, û gelo şer wê timê hebin yan na.