Birên Cahil, Çev Bidine Markos û Tîmotêyo

1-2. Çi dikaribû riya Markos û Tîmotêyo bigirta, wekî xizmetiyêda hê zêde kar nekirana?

BIRÊN cahil, gelo hûn naxwazin xizmetiyêda diha zêde kar bikin û alî xûşk-bira bikin? Em bawer in wekî hûn dixwazin vê yekê bikin. Çiqas baş e ku gelek xort hazir in alîkariyê bidine kesên din! (Zebûr 110:3) Lê dibeke carna tu difikirî, wekî tera hêsa nîne alî xûşk-bira bikî. Yan tu xwe ji vê yekê paş dixî, çimkî nizanî ku ça ev yek wê ser emirê te hukum ke. Yan jî dibeke te cabdarî qebûl nekiriye, çimkî fikirî yî ku tuyê nikaribî vê cabdariyê bînî sêrî. Hergê usa ne, bawer be ku kesên din jî mîna te rastî wan çetinaya hatine.

² Mesele, qirna yekêda Markos û Tîmotêyo rastî çetinayên usa dihatin. Rast e wana nizanibû ku emirê wan wê ça bê guhastinê û ewana haqas cêribandî nîbûn, lê yeke ewana hazir bûn diha zêde xizmetiyêda kar bikin û alî kesên din bikin. Dibeke Markos tevî diya xwe maleke başda dijît, gava Pawlosê şandî û Barnabas gazî wî kirin, wekî tevî wan here rêwîtiya mîsyonêrtîye pêşin (Karên Şandiya 12:12, 13, 25). Seva ku xizmetiya xwe zêde ke, Markos hazir bû mala xwe bihêle. Berî pêşin, ew derbazî Entakyayê bû. Paşê ew tevî Pawlos û Barnabas çû ciyên diha dûr jî (Karên Şandiya 13:1-5). Gava Pawlos gazî Tîmotêyo kir wekî tevî wî here û mizgîniyê bela ke, Tîmotêyo jî dibeke tevî dê-bavê xwe dijît. Tîmotêyo hê cahil û necêribandî bû, lema jî ewî dikaribû bifikiriya, wekî ew hazir nîne tevî Pawlos here rêwîtiyê (Beramber ke 1 Korintî 16:10, 11 û 1 Tîmotêyo 4:12). Lê dîsa jî ew tevî Pawlos çû û gelek kerem standin (Karên Şandiya 16:3-5).

3. (a) Em ji ku zanin wekî Markos û Tîmotêyo bona Pawlos gelek qîmet bûn? (2 Tîmotêyo 4:6, 9, 11) (Binihêre usa jî şikil.) (b) Vê gotarêda emê cabên kîjan pirsa bistînin?

³ Markos û Tîmotêyo cahiltiya xweda hîn bûn, ku ça cûre-cûre cabdariya civatêda bînin sêrî û bûne kesên cêribandî. Pawlos gelek wan xortên cahil qîmet dikir. Gava ewî fem kir ku mirina wî îda nêzîk e, ewî gazî wan kir wekî bêne cem wî (Bixûne 2 Tîmotêyo 4:6, 9, 11). Gelo Pawlos çira Markos û Tîmotêyo hez dikir? Birên cahil ça dikarin çev bidine wan? Û ça birên cahil dikarin ji şîretên Pawlosê şandî karê bistînin? Vê gotarêda emê wan pirsa şêwir kin.

MÎNA MARKOS BI XÎRET XIZMET KE

4-5. Markos ça nîşan kir, wekî ew hazir e bi xîret xizmet ke û alî kesên din bike?

⁴ Li gora kanîkê, ev yek ku meriv kesên dinra xizmet dike, tê hesabê wekî ew bi dil û can alî wan dike. Vê yekêda Markos meseleke baş hîşt. Gava Pawlos nexwest Markos tevî xwe bive rêwîtiya duda, dibeke Markos xemgîn bû (Karên Şandiya 15:37, 38). Lê dîsa jî Markos terka xizmetiyê neda û berdewam kir alî xûşk-bira bike.

⁵ Markos tevî merivê xwe Barnabas, çû ciyê din xizmet ke. Weke 11 sal şûnda, gava Pawlos cara pêşin Romêda kete kelê, Markos û çend kesên din alîkarî dane wî (Filîmon 23, 24). Pawlos bona alîkarî û berdiliyê gelek ji Markos razî bû (Kolosî 4:10, 11).

6. Markos ji hevaltiya tevî xûşk-birên ruhanîda gihîştî çi kar distand? (Binihêre spartin.)

⁶ Markos ji hevaltiya tevî xûşk-birên gihîştî kareke mezin distand. Paşî vê yekê ku ew çendekê li Romê cem Pawlos mabû, ew çû Babîlonê, bal Petrûsê şandî. Markos û Petrûs haqas nêzîkî hev bûn, wekî Petrûs jêra got “lawê min Marqos” (1 Petrûs 5:13). Ça tê kifşê, Petrûs hevalê xweyî cahilra besa jîyîn û xizmetiya Îsa kir, û Markos ev yek Mizgîniya xweda nivîsî.a

7. Birakî cahil bi navê Sêng-Wû ça çev da Markos? (Binihêre usa jî şikil.)

⁷ Belê, Markos berdewam dikir bi xîret xizmet ke û xwe li birên gihîştî digirt. Gelo tu ça dikarî çev bidî Markos? Diqewime te dixwest bibî rûspî yan jî berdestiyê civatê, lê heta niha ev cabdarî tera nehatiye dayînê. Hergê usa ne, sebir ke û mecalên din bigere wekî Yehowara û civatêra xizmet kî. Were em dîna xwe bidine serhatiya birê me Sêng-Wû, yê ku niha rûspî ye. Gava ew cahil bû, ewî xwe beramberî birên din dikir. Ji wan bira, hineka pêşiya wî cabdarî standin. Ji bo vê yekê Sêng-Wû ber xwe ket, çimkî fikirî wekî şixulên wî navînin û çû dilê xwe birên gihîştîra vekir. Rûspîkî jêra got, ku hergê hine şixulên ku ew dike nayên dîtinê jî, bira ew berdewam ke çi ji destê wî tê bike, wekî alî kesên din bike. Sêng-Wû guh da vê şîretê û destpêkir xûşk-birên emirda mezin û kesên din bive civîna. Ew usa dibêje: “Min fem kir ku çi tê hesabê bi xîret xizmet kin û alî kesên din bikin. Çaxê min usa dikir, ez gelek bextewar dibûm”.

MÎNA TÎMOTÊYO BI HEZKIRINÊ BONA KESÊN DIN XEM BIKE

8. Pawlosê şandî çima Tîmotêyo bijart ku tevî wî here rêwîtiyê? (Fîlîpî 2:19-22)

⁸ Gava Pawlos vedigeriya wan şehera, kîderê ku ew rastî peyketinê hatibû, jêra hevalên mêrxas lazim bûn wekî tevî wî herin. Pêşiyê ewî birakî cêribandî bi navê Sîlas bijart, ku tevî xwe bive (Karên Şandiya 15:22, 40). Wext şûnda Pawlos Tîmotêyo jî bijart, wekî tevî wî here rêwîtiyê. Gelo çira? Menîk ev bû, ku Tîmotêyo xweyê navekî baş bû (Karên Şandiya 16:1, 2). Usa jî ewî ji dil dîna xwe dida hewcên meriva û bona wan xem dikir (Bixûne Fîlîpî 2:19-22).

9. Tîmotêyo ça dida kifşê, wekî ew dikete heyra xûşk-bira?

⁹ Tîmotêyo ji destpêka xizmetiya xweye tevî Pawlos, hê zêde dikete heyra kesên din, ne ku heyra xwe. Lema jî Pawlos ew li Beroyayê hîşt, wekî ew hêlanê bide wan meriva, yên ku teze hatibûn ser riya rastiyê (Karên Şandiya 17:13, 14). Wî çaxî Tîmotêyo bê şik ji mesela Sîlas kareke mezin distand, yê ku tevî wî Beroyayêda ma. Lê paşê Pawlos Tîmotêyo tenê şande Têsalonîkê, wekî xûşk-birên wêderê qewî ke (1 Têsalonîkî 3:2). Paşî vê yekê, nava 15 salada hezkirina Tîmotêyo hindava xûşk-bira diha qewî dibû û ew hîn bû “tevî yên digirîn [bigirî]”, dêmek ew dikete heyra wan meriva, yên ku kul-derd dikişandin (Romayî 12:15; 2 Tîmotêyo 1:4). Gelo birên cahil ça dikarin çev bidine Tîmotêyo?

10. Birakî bi navê Wû Cêy ça hîn bû ku diha zêde bikeve heyra meriva?

¹⁰ Birakî bi navê Wû Cêy, hîn bû ku diha zêde bikeve heyra meriva. Gava ew cahil bû, wîra çetin bû tevî xûşk-birên emirda mezin bikeve xeberdanê. Lema jî ewî Oda Civatêda tenê silav dida wan û diçû. Rûspîkî şîret da Wû Cêy, wekî ew bêje xûşk-bira ku çima wana qîmet dike, û usa tevî wan bikeve xeberdanê. Usa jî ewî jêra got, ku ew bifikire wekî derheqa çi dikare tevî xûşk-bira xeber de, ku wanra hewas be. Wû Cêy guh da vê şîretê û destpêkir diha zêde bikeve heyra xûşk-bira. Niha ew rûspî ye û usa dibêje: “Niha bona min diha hêsa ye him tevî cahila, him jî tevî kesên emirda mezin derheqa têmên kûr xeber dim. Ez şa me wekî ez halê xûşk-bira diha baş fem dikim, çimkî bi saya vê yekê ez dikarim alî wan bikim”.

11. Birên cahil ça dikarin bikevine heyra xûşk-bira? (Binihêre usa jî şikil.)

¹¹ Birên cahil, hûn jî dikarin hîn bin bikevine heyra meriva. Gava hûn diçin civata, him tevî kesên cahil him jî tevî kesên emirda mezin xeber din. Bipirsin ku ew çawa nin û guh bidine wan. Hêdî-hêdî hûnê têderxin ku ça dikarin alî wan bikin. Mesele, dibeke hûn bivînin ku xûşk yan birakî emirda mezinra alîkarî lazim e ku hîn be JW Library^® bide xebatê. Yan jî, dibeke hûn bivînin wekî wana xwera kesek nedîtiye ku tevayî derkevine xizmetiyê. Gelo hûn dikarin alî wan bikin, wekî ewana hîn bin hacetên xweye êlêktronîk bidine xebatê, yan ji tevî wan derkevin xizmetiyê? Gava hûn alî kesên din dikin, hûn bona civatê dibine meseleke baş.

JI ŞÎRETÊN PAWLOSÊ ŞANDÎ KARÊ BISTÎNE

12. Birên cahil ça dikarin ji şîretên, ku Pawlos dabûn Tîmotêyo, karê bistînin?

¹² Seva ku Tîmotêyo emir û xizmetiya xweda pêşdaçûyî bûya, Pawlos hine şîretên kêrhatî da wî (1 Tîmotêyo 1:18; 2 Tîmotêyo 4:5). Birên cahil, hûn jî dikarin ji şîretên Pawlosê şandî karê bistînin. Gelo çawa? Du nemên Pawlos Tîmotêyora, usa bixûnin qey tê bêjî ew wera hatine nivîsarê û têderxin ku hûn kîjan şîreta dikarin emirê xweda bidine xebatê. Niha emê çend mesela şêwir kin.

13. Seva ku em diha nêzîkî Yehowa bin, em gerekê çi bikin?

¹³ “Xwe xwedênasiyêda hîndar ke” (1 Tîmotêyo 4:7b). Em nayne bûyînê bi aminiya hindava Yehowada, lema jî lazim e vî hunurî nav xweda pêşda bînin. Xebera Yûnanî “hîndar ke”, ya ku vê rêzêda nivîsar e, gelek car bona sportsmênekî xîret didane xebatê. Seva ku sportsmên serketî bin, lazim e wekî ewana timê dîna xwe bidine nêta xwe. Mîna wan, lazim e wekî em jî dîna xwe bidine nêta xwe û tiştên usa xwera bikine xeyset, yên ku alî me dikin diha nêzîkî Yehowa bin.

14. Gava em Kitêba Pîroz dixûnin, nêta me gerekê çi be? Meselekê bîne.

¹⁴ Gelek ferz e wekî em xwera bikine xeyset, ku Kitêba Pîroz her roj bixûnin. Çaxê em Kitêba Pîroz dixûnin, gerekê nêta me ev be, ku diha nêzîkî Yehowa bin. Mesele, gava em serhatiya Îsa û xortê dewletî dixûnin, em derheqa Yehowa çi pêdihesin? (Markos 10:17-22) Ewî xortî bawer kir wekî Îsa bi rastî jî Mesîhê sozdayî ye, lê baweriya wî haqas qewî nîbû, wekî pey Îsa here. Lê dîsa jî, Îsa “hindava wîda bi hezkirinê tije bû”. Gelo ev yek ku Îsa ça tevî wî xortî xeber da, dilê te nagire? Eşkere ye, Îsa xwest wekî ew safîkirineke bîlan bike. Usa jî ev yek ku Îsa hindava wîda bi hezkirinê tije bû, nîşanî me dike, wekî Yehowa jî wî hez dikir (Yûhenna 14:9). Gava tu derheqa vê serhatiyê û ser derecên emirê xwe difikirî, ji xwe bipirse: “Ez çi dikarim bikim, wekî diha nêzîkî Yehowa bim û diha zêde alî kesên din bikim?”

15. Birê cahil çira gerekê bona xûşk-bira bibe mesele? Şiroveke. (1 Tîmotêyo 4:12, 13)

¹⁵ Bona xûşk-bira bibe mesele (Bixûne 1 Tîmotêyo 4:12, 13). Pawlos Tîmotêyora got, wekî ew ne tenê hunurên usada ça xwendin û hînkirinêda pêşda here, lê hezkirin, bawerî û helaliyêda jî. Gelo çima? Çimkî qewata kirên me diha mezin e, ne ku qewata xeberdanê. Mesele, bide ber çevê xwe wekî tu gerekê pê gotarekê derkevî, derheqa vê yekê ku xizmetiyêda diha xîret bin. Hergê tu xwexa jî xizmetiyêda yekî xîret î, tuyê bikaribî gotara xwe bi serfirazî bêjî, çimkî kirên te wê qîmeta xeberdana te zêde kin (1 Tîmotêyo 3:13).

16. (a) Birên cahil kîjan pênc tiştada dikarin bibine mesele? (b) Birê cahil ça dikare “xeberdanêda” bibe mesele?

¹⁶ Pawlosê şandî 1 Tîmotêyo 4:12-da, besa pênc tişta kir, kîjanada ku birê cahil gerekê bibe mesele. Dibeke tu dikarî wedê lêkolîna şexsî derheqa wan tişta bifikirî. Bide ber çevê xwe, wekî tu dixwazî “xeberdanêda” meseleke baş bî. Seva ku bigihîjî vê nêta xwe, bifikire ku tu ça dikarî kesên din bi giliyên xwe hêlan kî. Hergê tu hê mala dê-bavê xweda dijî, gelo tu dikarî diha zêde razîbûna xwe wanra bidî kifşê? Paşî civatê, gelo tu dikarî payê wan xûşk-bira bidî, yên ku pê ders yan gotarê derketibûn? Usa jî xîret bike ku bi giliyên xwe komêntariya bidî, ne ku ji abzasê bixûnî. Gava tu her tiştî dikî, wekî “xeberdanêda” bibî mesele, kesên din wê bivînin ku tu ruhanîda pêşda diçî (1 Tîmotêyo 4:15).

17. Çi dikare alî birakî cahil bike, wekî ew bigihîje nêtên xweye ruhanî? (2 Tîmotêyo 2:22)

¹⁷ Ji xwestinên cahiltiyê bireve û xwe li rastiyê bigire (Bixûne 2 Tîmotêyo 2:22). Xwestinên cahiltiyê dikarin zirarê bidine dostiya orta birên cahil û Yehowa, û bibine sebeb wekî ewana diha zêde xizmet nekin. Pawlosê şandî Tîmotêyora gotibû, wekî ew ji xwestinên usa bireve. Dibeke te jî dîna xwe dayê, wekî hine tiştên ku bi rastî xirab nînin jî, dikarin wedê te bidizin û mecalê nedin, wekî tu diha zêde xizmet kî. Mesele, hesab ke ku tu ser sportê, ser întêrnêtê yan ser lîstikên komputerê çiqas wede xerc dikî. Gelo tu nikarî hine ji vî wedeyî bona şixulê Yehowa jî xerc kî? Mesele, dibeke tu dikarî xweykirina Oda Civatêda kar bikî, yan jî ber stêndê xizmet kî. Gava tu şixulên usava mijûl bî, tuyê bikaribî xwera hevalên teze bivînî, yên ku dikarin te hêlan kin û alî te bikin nêtên ruhanî daynî pêşiya xwe û bigihîjî wan.

ALÎKARIYA KESÊN DINRA KEREMA TÎNE

18. Em ji ku zanin, wekî jîyîna Markos û Tîmotêyo gelek bextewar bû?

¹⁸ Markos û Tîmotêyo gelek guhastin emirê xweda kirin, wekî diha zêde xizmet kin û alî xûşk-bira bikin. Û ev yek emirê wan diha bextewar kir (Karên Şandiya 20:35). Markos diçû welatên dûr, wekî komekê bide xûşk-bira. Usa jî ewî kitêbeke hewas derheqa jîyîn û xizmetiya Îsa Mesîh nivîsî. Tîmotêyo alî Pawlosê şandî kir, wekî civatên teze saz bike û hêlanê bide xûşk-bira. Bê şik, Yehowa gelek ji Markos û Tîmotêyo razî bû, çimkî wana guhastinên mezin emirê xweda kir, wekî hê zêde bona Yehowa û xûşk-bira kar bikin.

19. Çira ferz e wekî birên cahil dîna xwe bidine şîretên ku Pawlos dabû Tîmotêyo, û hergê ewana usa bikin, axirî wê çi be?

¹⁹ Nemên ku Pawlos Tîmotêyora nivîsîn, eşkere nîşan dikin, wekî ewî hevalê xweyî cahil çiqas hez dikir. Bi rastî, Yehowa Pawlos da xebatê, wekî ev neme bêne nivîsarê, lema jî çi ku em wan nemada dixûnin, didine kifşê ku Yehowa çiqas we hez dike, xortên cahil! Ew dixwaze wekî hûn pêşdaçûyî bin. Lema jî şîretên Pawlosê şandî qîmet kin û xwestina xwe zêde kin, wekî diha zêde xizmet kin û alî kesên din bikin. Hergê hûn usa bikin, hûnê bi emirekî xweş bijîn û axiriyêda “jiyîna ku rastî jiyîn e qazinc kin” (1 Tîmotêyo 6:18, 19).