Gelo Wê Bê Ev Roj ku Têrorîzm Îda Tune be?

Çaxê derheqa têrorîzmê dibihêyî, dibe pirs bal te pêşda tên: “Gelo xema Xwedê nîne, ku çi diqewime? Çima ew tişt diqewimin? Gelo têrorîzma wê bê hildanê? Meriv ça dikare bin vê tirsêda bijî? Kitêba Pîroz zelal caba wan pirsa dide.

Xwedê ça dinihêre ser têrorîzmê?

Xwedê zorbetiyê û têrorîzmê nefret dike (Zebûr 11:5; Metelok 6:16, 17). Wekîlê Xwedê, Îsa jî carekê şagirtên xwe hilat, çaxê wana xwe mîna zorbeta dane kifşê (Metta 26:50-52). Hinek meriv dibêjin ku ewana bi navê Xwedê zorbetiyê dikin, lê Xwedê îzin nedaye wan ku vê yekê bikin. Bi rastî Xwedê ne jî duayên merivên usa dibihê (Îşaya 1:15).

Xwedê xem dike bona wan meriya, yên ku diçerçirin û usa jî yên ku ji bo têrorîzmê zirarê ketine (Zebûr 31:7; 1 Petrûs 5:7). Kitêba Pîrozda usa jî tê gotinê, wekî Ew wê zorbetiyê kuta ke (Îşaya 60:18).

Sebebê têrorîzmê

Kitêba Pîroz sebebê têrorîzmê eyan dike. Ew dibêje wekî serwêrtiya meriva ziyanê tîne (Waîz 8:9). Nava terîxiya însanetêda, merivên xweyîhukum pê têrorîzmê zorbetî meriva kirine. Merivên ziyanketî jî seva ku heyfê hildin, pê têrorîzmê zorbetî kirine (Waîz 7:7).

Kutakirina têrorîzmê

Xwedê soz dide, ku wê zorbetiyê û tirsê bide hildanê, û dewsê edilayê bîne ser temamiya erdê (Îşaya 32:18; Mîxa 4:3, 4). Xwedê wê:

• Sebebê têrorîzmê bide hildanê. Ew wê dewsa serwêrtiya meriva, serwêrtiya xwe ser temamiya dinyayêra kifş ke. Serwêrê vê serwêrtiyê Îsa Mesîh, wê hindava hemûyada heq be û zorbetiyê bide hildanê (Zebûr 72:2, 14). Hingê wê tu kes têrorîzmê neke. Meriv “xêr-xweşîyêva wê xinê bin û şa bin” (Zebûr 37:10, 11).

• Hemû ziyanê ji têrorîzmê bide hildanê. Xwedê wê meriya ji ziyana têrorîzmê aza ke, him aliyê fîzîkîda, him jî êmosiyalîda (Îşaya 65:17; Eyantî 21:3, 4). Ew usa jî soz dide, ku wê miriya paşda vegerîne jîyînê,û ewana wê edilayêda ser erdê bijîn (Yûhenna 5:28, 29).

Kitêba Pîrozda hene îzbatiyên vê yekê, ku Xwedê zûtirekê wê destpêke hereket bike. Dibe ku pirs cem we pêşda tê: “Çima Xwedê heta niha têrorîzm kuta nekiriye?” Seva ku caba vê pirsê bistînin, binihêrin vîdêo “Çima Xwedê Dihêle Wekî Em Biçerçirin?”