Bisa geʼ Urakng Mati Idup Agiʼ?

AHE NANG ALKITAB NGATAATN

”Ana samua urakng mati diidupatn agiʼ.”​—Kisah 24:15, Terjemahan Baru.

GUNANYA UNTUʼ KITAʼ

Tahibur biarpun urakng nang diriʼ nyayakngiʼ koa dah mati.​—2 Korintus 1:3, 4.

Nanaʼ galiʼ agiʼ kaʼ kamatiatn.​—Ibrani 2:15.

Ada arapatn pasti, batamu agiʼ man urakng nang dah mati.​—Yohanes 5:28, 29.

AHE GEʼ DIRIʼ BISA PUCAYAʼ KAʼ AHE NANG ALKITAB NGATAATN?

Auʼ. Sainaʼnya ada talu alasan:

• Allah koa pamuat kaidupatn. Alkitab nyabut Allah Yehuwa ”pamareʼ kaidupatn”. (Mazmur 36:9; Kisah 17:24, 25, Terjemahan Dunia Baru) Jadi, Ia pasti bisa ngidupatn agiʼ urakng nang dah mati.

• Allah dah ada ngidupatn urakng mati. Alkitab nyatat lapan kajadiatn urakng-urakng nang dingidupatn agiʼ kaʼ bumi, ada nang tuha, muda, laki man nang bini. Ada nang baruʼ mati, ada nang dah ampat ari dinyubur!​—Yohanes 11:39-44.

• Ana Allah maoʼ sidi ngidupatn urakng nang dah mati. Yehuwa teget kaʼ kamatiatn, Ia neleʼnya lea musuh. (1 Korintus 15:26) Ia dah nanaʼ sabar agiʼ ngalahatnnaʼ musuh koa. Ia batol ”reho” ngidupatnnaʼ urakng-urakng nang ada kaʼ dalapm ingatatn-Nya untuʼ idup kaʼ bumi.​—Ayub 14:14, 15.