Suuny a Diikumy

Bikaady bikukasakeenok bwa kukooyel eeny? Ki cilongel Mukaleng Davih, uleebel ney: “Juul mund mwaam lungeny lwa kukukooyel.” (Mis. 51:12, NWT) Davih waakady mukat Yehow. Ning naak, kwaakady biisang byaakady Davih wiiyumvw kay mukumban bwa kukooyel, ning tut byeet tudy mwa kwiiyumvw naak. Bwabingany? Cyaakuuhal, tudy bahyaan lungeny lwa kulek kukooyel. Ciibiidy, Sataan utuutungunuk ni kuteet bwa kwiitusak bwa kutombokel Yehow teng mulongeley. (2 Kor. 11:3) Ciisaat, i biitunyunguluk kudy biin mu bulongolody oobw bady kabay ni lungeny lwa kukooyel, ‘mwiin spirit mubiih oow, i yiy ukaakal mudimw kaabaak mund mwa baat baleelek ku diiy dya Mawej.’ (Efez. 2:2) Bikaam twiikashishomw bikasakan bwa kulwiish lungeny lwa kulong mpeekaat ni bwa kutantameen cikwaabw mishind yidy Dyaabol ni bulongolody oobw bakal naay mudimw bwa kwiitusak ku makand bwa kulek kukooyel. Bikaam twiikashishomw bwa kukooyel kudy Yehow ni kudy baat badyey mwaakish bukookesh. w23.10 diib. 6 cik. 1

I biny bitudy mwa kulongel ku cishim cilongel Yeez cyaakadyey mwaalabul mwanz ni kushaaley maal? Tuloolongeloh dilongweesh habitaatal kwiihweekesh. Yeez kaakadyoh bend mwiiyumb mwiiwul bwa cishim cilongeley; ni kaakadyoh bend mwiitumbish bwa bwaal boos bulongeley. Hamut a kulongey nook, ni kwiihweekesh koos, waakady waakish teng Taat indiy lutumb ni buneem. (Jah 5:19, 30; 8:28) Tut twiidikij Yeez hakwiikal ni meej ma kwiihweekesh, katwaakwiikal twiiyumb mwiiwul bwa myand yituloolong. Twiitumbishaay, kiin bwiitut kaayeet, ki habitaatal Mawej mulengel menmen udy mwiitwaakish dyaakatook dya kumukadil mudimw. (Jer. 9:23, 24) Tumwaakishaay buneem budy bumukumbanyin. Cikwaabw, katwiinoh bend mwa kulong bwaal bulengel kakuy dyambulwiish dya Yehow (1 Kor. 1:26-31) Tut biikal ni kwiihweekesh, katwiin mwa kwangat buneem bwa myand yilengel yituloolongel baat bakwaabw. Tudy ni musangal bwaal tudy bamanyik ney Yehow utaatal ni wangangat myand yituloolong ni buseeb. (Fwanyikij ni Matewus 6:2-4; Ebr. 13:16) Biin-biin, tusaasangeej Yehow hatwiididikij Yeez hakwiikal ni kwiihweekesh.—1 Py. 5:6. w23.04 diib. 4 cik. 9; diib. 5 cik. 11-12

Ku dyambulwiish dya spirit mujilang, mupostol Pool waakady mukashish biin Krist bwa kutalobw myand yilengel ya bakwaabw. I mushind kaay utudy mwa kukooyel mubel oow hatudy mu bisangil? I hakwiikal bamanyik ney baat bakwaabw, i bakat kwaalabul byaabw teng bu tut byeet. Langil ha bwaal aabw mu mushind oow. Hawiisaasamb ni balund neeb, udy mwa kukat bwa wiikal wiisamb teng uw bikasakan eeny? Waakweeh, kwiin mwa kulong nook! Udy mukat bwa biikal biisamb byaabw. Mu mushind mukwaabw, bady mwa kwiiyumvw ney kwiishoh bend mwiibateek mu meej. Bya mushind haakaabumw, mu bisangil tudy bakat bwa baat bavul biikal ni dyaakatook dya kwaalabul. Cya biin, mushind mulengel wa kukashish biin-kweet i kwiibaakish dyaakatook dya kuleejobw diitabij dyaababw. (1 Kor. 10:24) Nook, maalabul miitut miikal mihiih, kulong nook kudy mwa kulong bwa baat bavul bahet byaabw mushind a kwaalabul. Ning uw utwaal dyaalabul dihiih, lek kuleeb myand yikahit-hit. Uw muleeb myand yoos yidy mu cikos, bakwaabw kabakwiikaloh bend ni bivul bya kuleeb. w23.04 diib. 22-23 cik. 11-13

Bikaam tuvuluk nang-nang buseeb bwa kutungunuk ni kwambulwiish baat bakwaabw ha kwiibadiil musah mulengel. Mu mudimw iitut, bikaam twiikal twiibidilangan ni shikacil hadyey ushintuluk. Baat batudiidiil musah mulengel, bady ni kwiitabij kushiilangan habitaatal Mawej ni i baaluk ha byaab bishiilangan ni bady ni bilel bishilangan. Mupostol Pool waakady wiibidilangan ni shikacil yoos ni tudy mwa kuhetel malongweesh ku cileejel cindiy. Yeez uteekel Pool bu “mupostol a baat bakiish biin Yuud.” (Rom 11:13) Nook Pool waakady udiil biin Yuud, biin Krek, baat bady balong mukand, biin ku misok ni batam ba mbul-matady musah mulengel. I bwiin kuleeb ney: Bwa Pool kuhet baat ba mishind yoos, waakady ‘wiitwaal yiy woos bwa baat ba mishind yoos.’ (1 Kor. 9:19-22) Waakady ulang bikasakan habitaatal cyaab cyaakady baat baakadyey wiisamb naabw balukil ni ha myand yidyobw biitabij. Biineeby bimwambulwiishil bwa kwiikal ni kacy-kacy ni kwiisamb ni muut woos mu mushind waakady mwa kumukok kudy Mawej. Tut byeet, tudy mwa kulengej mudimw iitut a bukajaady tut twiibidilangan ni shikacil yoos ni tuteet bwa kulangil ha mushind mulengel utudy mwa kwambulwiish muut woos. w23.07 diib. 23 cik. 11-12

Muut mutalal myand kiishoh bend mutaatakan, ki i mukasakan mu myand ya mu spirit. Bimuloolomb bwa kwiikaley ni bukash bwa kubatamij micim hadyey kuuhal kwa lutat kaahand. Kwiikal mutalal myand i cimw cituh cya “diimum dya spirit.” (Kal. 5:22, 23, NWT) Mwaak a mu ciin Krek udyobw bakal nend mudimw bwa kwaalabul ciikadil eecy “kutalal myand” bakadil nend mudimw mu biisang bikwaabw bwa kuleeb bwa kabal ka mwiit kaakadyobw bamun hanj. Lang bwa nyam a mwiit udy ni lonj wiiy kushaal kay ni lonj. I bwiin kuleeb ney, kabal kadyobw bamun hanj aak, kakiin ni lonj ki kady teng ni bukash. Mutudy baat, i mushind kaay utudy mwa kwiikal batalal myand ni biikal cikwaabw ni bukash? Katwiin mwa kwiikal nook ku bukash bwiitut kaayeet. Bikaam tulomb Mawej bwa iitwaakish spirit indiy, bwa iitwambulwiish bwa kwiikal ni ciikadil cilengel eecy. Kukaady baat bavul baakady balong nook bwa kwiikal batalal myand. Biin-kweet bavul i baleej mudyobw batalal myand haakadyobw bibalwiish, ni kulong nook, i kwambulwiish baat baakady biibatal bwa kuleebobw bilengel bwa Baatemw ba Yehow.—2 Tim. 2:24, 25. w23.09 diib. 15 cik. 3

Mu bwaal butal bu mu cilot bwaakady bukemesh, mupostol Jah utadil bakul 24 mu diiwul bend ni kuhambidil Yehow. Baakady batumbish Mawej, ni baakady baleeb ney: I muwaakan bwa kumuh “lutumb, kukalakany, kukuleej bukash.” (Bal Myand yisokolweel Jah 4:10, 11.) Banjel ba lulamat bady cikwaabw ni tubingil tuvul twiibasaasak bwa kuh Yehow lutumb. Bady nend mu diiwul ni i bamumanyik bilengel. Bataatal biikadil bindiy mu myand yidyey ulong. Hadyobw batal ni balangil ha myand yidy Yehow mulong, kulong nook kwiibasaasak bwa kumuh lutumb. (Yoobw 38:4-7) Tut byeet tudy bakat kuh Yehow lutumb mu masambil miitut. Tudy mwa kulong nook hakumwambil bitudy bakat ni bwabiny tumuneeneemek. Hawubaabal ni hawuloolong Bibl, long bwa kumanyik biikadil bya Yehow biwanyanyish bikasakan. (Yoobw 37:23; Rom 11:33) Kuunyim ambil Yehow bwa muwiiyumvumvw bwa biikadil aaby. Tudy mwa kutumbish cikwaabw Yehow bwa mudyey wiitwambulwiish ni bwa mudyey wambulwiish cisak cituutul cya biin-kweet baan-balum ni baan-bakaj.—1 Sam. 2:1, 2. w23.05 diib. 3-4 cik. 6-7

Mu muvw a 1919, Babiloon Mutam ukaakeel kwiikakal ni bukookesh kudy baat ba Mawej. Muvw aaw, i yiy uteekelobw ‘muhik a lulamat udy mudimuk,’ ni teng diib aab, muhik oow utwaadijil kukal mudimw ni kiihacil ka ney baat ba micim yilengel bahet mushind aabab kwendel mu ‘Njil a Bujilang.’ (Mat. 24:45-47; Ye. 35:8) “Mudimw ukadil bakwaabw bwa kulongolol njil oow” wambulwiishil baat bwakutwaadij kwendel mu njil aaw bwa kumanyikobw myand yivul habitaatal Yehow ni myand yidyey mulongolol bwa kwiiy kulong. (Tus. 4:18) Baakady mwa kulong cikwaabw bwa kwiikal ni shikacil umvumvwangan ni lukat lwa Mawej. Yehow kiin ukaam teng ney baat bindiy bashintuluk teng musang aakaabumw. Hamut a kulong nook, i mwambulwiish baat bindiy bwa kumumanyikobw teng ku bikeeh ku bikeeh. Twiiyiiy kwiikal ni musangal tut boos diib ditwiikal ni mushind a kusangeej Mawej mu myand yituloolong! Njil woos ukaakaam biikal teng bamulongolol bwa kwiikaley mulengel. Kacy mu muvw a 1919, mudimw a “Njil a Bujilang” batungunukil ni kumulong, ni kiihacil ka ney baat bavul bahet mushind a kuhatukobw mu Babiloon Mutam. w23.05 diib. 17 cik. 15; diib. 19 cik. 16

Kasumbw Kaludik kaloolongweesh biin-kweet bakwaabw biibakwaakwanjok bwa kumanyik midimw yivul ya mu ma Komiteh yishiil-shiilangan ya mu Kasumbw Kaludik. Bakwanjok aab, bakaakal ni lulamat loos mudimw udyobw biibaakish. I biibalongolol bilengel bwa kutungunuk ni kukal mudimw bwa kulam mikook ya Krist. Hiikal bashaadil bashing diisaby mwa kuy mu diiwul haabwiih ni bulekel bwa Mal miimiin meeh, baat ba Yehow biikal ha bulab, biiyiiy kutungunuk ni kumuhambidil ni lulamat. Ku dyambulwiish dya bukookesh bwa Yeez Krist, baat ba Yehow biiyiiy kutungunuk ni kumuhambidil ni lulamat. Biin-biin, ciisang aacy biiyiiy kwiitulwiish kudy Kok wa mu bulab bwa Makok, bibunj biikong biikal mwa kulwiish baat ba Mawej. (Ezek. 38:18-20) Ki bulwiish bwa mu cikos oobw, bwiiyiiy kukaakal kiihacil kaabubw; kabwiish bwiiy bukaakeeshoh bend baat ba Mawej bwa kuhambidilobw Yehow. Wiiyiiy biin-biin kwiibalam! Mu bwaal butal bu mu cilot, mupostol Jah utadil “cisumbw citam” cya mikook yikwaabw ya Krist. Bambiil Jah ney: “baat bavul beeh aab” [cisumbw citam] baalaalukil “mu mal miimiin meeh.” (Yis. 7:9, 14) Ing, biiyiiy kwiibakuuloh! w24.02 diib. 5-6 cik. 13-14

I biny bitudy mwa kulong bwa kuhet spirit mujilang? Tudy mwa kusambil bwa kumuhet, kulong Diiy dya Mawej difundish ku dyambulwiish dya spirit mujilang, ni tushaal mu bulongolody bwindiy budy bulombol ku dyambulwiish dya spirit mujilang. Kulong nook kwiiyiiy kwiitwambulwiish bwa kwiikal ni “diimum dya spirit.” (Kal. 5:22, 23, NWT) Mawej utwaatwaal spirit indiy mujilang teng kudy baat bady ni meej malengel ni bady ni bilong bilongel. Kakutungunukoh bend ni kwiitwaakish spirit indiy tut tutungunuk ni kulangil ha myand yibiih ni twiiyilong. (1 Tes. 4:7, 8) Bwiitut kuhet spirit mujilang, bikaam tulek cikwaabw ‘kudingulul may maleebelobw kudy baprofet.’ (1 Tes. 5:20) “May maleebelobw kudy baprofet” mu verseh oow, umvumvwiij misah ya Yehow yidyey wiitwaakish ku dyambulwiish dya spirit indiy, mudy cikwaabw misah yikwaabw yitaatal diifuk dya Yehow ni myand yitudy mwa kulong lwang-lwang mu mafuk miitut aam. Katwiish mwa kulangoh bend ney diifuk dya Yehow, eecy Harmakedon kiish wiiy kukumban mu mafuk matucidy ni buumy ha bulab aah. Hamut a kulang nook, twiidilaalam mu meej hakutungunuk ni kwiikal ni bivul bya kulong ni ‘kushikat bu baat bajilang bimweek ney tudy balamat Mawej.’—2 Py. 3:11, 12. w23.06 diib. 12 cik. 13-14

Bu mutudy biin Krist, i biny bitudy ni bwa kulong hatutaatal cifwaatul cya baat kabay bizang cimweek musang umw mu lumween lwa cyaamw ciitut? Bikaam twiiciful musang umw. Biiyiiy kwiikal biheehel menmen bwiitut kulong naak tut bavuluk ney bulund bwiitut ni Yehow i bwaal budy ni buseeb buvul menmen kutudy. Leeloow, ning bifwaatul bikwaabw bidy kabiy menmen bya baat kabay ni bizang bidy mwa kujuul kwaalakan kubiih. Bwabiny bikaam tulek kwiibital? Bwaal katwiish bakatoh bend kulong bwaal budy mw kwiitusak bwa kwend masandy mu mucim mwiitut. (Mat. 5:28, 29) Mukul mukwaabw wa mu Thailand diijin dindiy David uleeleeb ney: “Nadyaakal niiyihanguj ney: ‘Ning bifwaatul biby mwa kwiikal bya baat kabay bizang, Yehow wiiyiiy kwiikalok ni musangal mum mutungunuk ni kwiibital eeny?’ Kweel meej mushind oow i kuuyambulwiish bwa kulong myand ni meej.” Kuciin kwa kulong bwaal bubiih budy mwa kubungamij Yehow, kwiiyiiy kwiitwambulwiish bwa kulong myand ni meej. Kuciin kwa Mawej i bub “butambwiil,” “bwa meej.” w23.06 diib. 23 cik. 12-13

Hadyobw baleeb bwa “mu mazubw miinun” bady mwa kwiikal baleeb bwa mazubw ma Bukaleng miitut. Mu ciisang cya mal miimiin Yehow wiiyiiy kwiitulam tut tutungunuk ni kumukadil mudimw mu kaacyumw ni biin Krist neet. Nook, bikaam twiikashishomw bikasakan kaabaak bwiitut kwiitab bwa kushikat ni biin-kweet teng mudyebw aamw, ni twiibakat. Kulong nook, kudy mwa kwiitukuuloh byeet! “Diifuk ditam dya [Yehow] Mawej “ diiyiiy kwiikal ciisang cikasakan menmen bwa baat boos. (Sef. 1:14, 15) Baat ba Yehow biiyiiy kutaatameen byaabw makab. Ki tut biilongolol teng kaabaak, twiiyiiy kwiikal ni micim yibatam mund ni twiiyiiy kwiikal ni mushind a kwambulwiish bakwaabw. Twiiyiiy kutaatameen makab moos matudy mwa kutwiilangan naam. Hady biin Krist neet bakab, twiiyiiy kulong mwiitut moos bwa kwiibambulwiish hakwiibaleej lus ni hakwiibaakish biit bidyobw naaby diikeng. Ni tut bakat biin-kweet baan-balum ni baan-bakaj leeloow, twiiyiiy cikwaabw kwiibakat mu mafuk maciiyiiy. Nook, Yehow wiiyiiy kwiituh buumy bwa mwendeleel mu bulongolody mwiikal kamuy bikumin ni mal miimiin.—Ye. 65:17. w23.07 diib. 7 cik. 16-17

Diiy dya Mawej didyaakal dileeb ney baat bady ni lulamat i bakasakan. Ki ning aab baakady bakasakan menmen mukacy mwaababw kabaakady teng biiyumvw bakasakan. Cileejel, misang yikwaabw Mukaleng Davih waakady mwiiyumvw ney waakady “mukasakan bu mulund,” ki misang yikwaabw “waakady ni mooy i mwiin weeh.” (Mis. 30:7, NWT) Ning naak Samuson waakady ni makand ma habwaah diib diheteley spirit a Mawej, ni waakady mumanyik ney yiy mwiikal kay ni bukash bwa kudy Mawej, waakady mwa kwiiy “kujimbaj diikand ni kushaaley bituh bu baat boos aab.” (Zuj. 14:5, 6; 16:17) Baat ba lulamat aab baakady bakasakan teng bwaal Yehow waakady wiibaakish bukash aabw. Mupostol Pool umanyikil ney waakady ukaam byend bukash bwa kudy Yehow. (2 Kor. 12:9, 10) Waakady utat byend bwa myand ya mabenj. (Kal. 4:13, 14) Ha biisang bikwaabw, waakady wul cikwaabw diivit bwa kulong myand yivul. (Rom 7:18, 19) Cikwaabw, waakady wiiyumvw ni kaakunying ni kay mumanyik cya kulong. (2 Kor. 1:8, 9) Ki, haakady Pool wiiyumvw mukooyel, waakady wiiyumvw mwiikal ni diikand. Mushind kaay? Yehow waakishil Pool diikand dyaakadyey kay naady. Ulongel nook ni Pool kushaaley mukasakan. w23.10 diib. 12 cik. 1-2

Tut biikal misang yikwaabw tul diivit ni meej ma kulek kwiiyangat ni buseeb, tuvuluk ney Yehow kaayend-kend i yiy udy mwiitukok kudyey. (Jah 6:44) I mutal biikadil bilengel bitudy naaby, bitudy katuy mwa kutal ning tut biin kaayeet, tuleeb ney i mwiitumanyik bilengel menmen. (2 Cif. 6:30) Nook, twiikalaay bamuteekel micim hadyey uleeb ney: tudy ni buseeb. (1 Jah 3:19, 20) Kuuhal kwiitut kulong myand ya biin-biin, bakwaabw mukacy mwiitut oomw balongel myand yicibafiifikish ku kwiiyumvw bafw naay. (1 Py. 4:3) Ning biin Krist ba lulamat bacilwaal teng diivit ni meej ma kulong mpeekaat. Mucim iibuh ukufwiifwiijok naay eeny? Biby biikal naak, ukaakasakan ku micim hawumaamanyik ney, ning biin mudimw ba lulamat ba Yehow baakady bal diivit ni meej ma mushind kaabumw aam. Cileejel, mupostol Pool waakady wiital bu cimon-a-mal haakadyey ulangil ha bibiih bindiy. (Rom 7:24) Biin-biin, Pool waakady mwiifwiij naay bwa mpeekaat yindiy ni mwaalabul micim ni muhet ni baatiisumw. Ki waakady wiileeb yiy kaayend ney: “nady mukeeh wa ku bapostol” ni nady “mubiih wa ku boos.”—1 Kor. 15:9; 1 Tim. 1:15. w24.03 diib. 27 cik. 5-6

Diilongweesh ditudy mwa kulongel ku diihangadik dibiih dyangacil Mukaleng Yowas i dya ney bikaam tusungul balund biikal mwa kwiitusak ku myand yilengel, bady bakat Yehow ni aab bady bakat kumusangeej. Kabiish bikaam twiikal teng ni balund ba bidimw byumw neet. Vuluk ney Yowas waakady mutofw menmen kudy mulund nend Yoyadah. Uw ukaam kusungul balund, iiyiihanguj ney: ‘Baayambambulwiishok bwa kukashish diitabij dyaam kudy Yehow eeny? Baakaakashishok bwa kwiikal ni shikacil umvumvwangan ni mikenj ya Mawej eeny? Baleeleebok bwa Yehow ni bwa myand yindiy ya biin-biin yidy ni buseeb eeny? Baleeleejok kaneemw bwa may ma Mawej eeny? Baayambambil teng bwa cinady mwa kwiiy kumvw eeny, eecy badyok ni mucim mukasakan bwa kuubel hanakaakaam kulong bwaal bubiih?’ (Tus. 27:​5, 6, 17) Biin-biin, balund neeb bab biikal kabay bakat Yehow, kaay wiibakat byeeb. Ki uw mwiikal ni balund bady bakat Yehow iibalamat, bwaal biiyiiy kwiikal balund balengel bwiibuh!— Tus. 13:20. w23.09 diib. 9-10 cik. 6-7

Dilet dya alfah i dya kuuhal mu alfabeh wa ciin Krek, ni dilet dya Omekah i dilet dya bulekel dya alfabeh. Hady Yehow ukal mudimw ni dyumvwiij dya “Alfah ni Omekah,” uleeleej ney hadyey utang kulong bwaal kaahand, wiibumaaman mu mushind mulengel. Ahangil Yehow Adam ni Eev, Wiibambiil ney: ‘Lelanganaay, nuvulanganaay, nwiiwujaay bulab teeteet, dyaacilaay bya ha bulab byoos haash.’ (Kbwa. 1:28) Nook, ha ciisang aacy, Yehow uleebel ney: “Alfah.” Uleejel biin-biin kiihacil kindiy ka ney: Kwiikaakal ciisang ciikaal baan Adam ni Eev bakookoyel Mawej mwa kushaalobw bawaakan ni kwiiwuj bulab ni kwiibufutulul Paradiiz. Mu mafuk ma ciiyiiy Yehow wiiyiiy kuleeb mu mushind kaahand ney “Omekah.” Hamanyiney kuhang “diiwul ni bulab, ni byoos bidy ha bulab,” Yehow utwaadil cijaadik. Yehow uleebel ney diifuk dya mwandamuteket dyaakady dijilang. Yehow wiitujaajaadikil ney wiiyiiy kukumbaj kiihacil kindiy bwa baat ni bulab. Kiihacil aak kaakady mwa kwiiy kukumban koos ku bulekel kwa diifuk dya mwandamuteket. —Kbwa. 2:1-3. w23.11 diib. 5 cik. 13-14

Lwend lukasakan lwa kwaaluk mu Babiloon kuy mu Izaleel lwaakady mwa kwangat suuny 4, ki Yehow waakady mulay baat bindiy ney bwaal bubiih ning bwaakaabumw kabwaakady mwa kwiibalongekel mukacy mwa njil. Mu meej mwa biin Yuud ba lulamat, baakady bamanyik ney mabenesh miiyiiyobw kuhet hadyobw bahingomw mu Izaleel, maakady mavul menmen mashilangan ni midimw yoos yaakadyobw mwa kulong. Mu mabenesh matam miimiin aam, mudy cikwaabw kuhambidil kwaababw. Mu Babiloon kamwaakadyoh bend tempel a Yehow. Kakwaadyoh bend cilambwiil cyaakady biin Izaleel mwa kulambwiil nyam yaakadyobw ni bwa kutwaal bilondeshel May ma Mawej maheeley Moyiz, ni kakwaakadyoh bend baat boomekel bujit bwa kulambul milambw yaakady baat biiy naay eey. Cikwaabw, kwaakady baat bavul bapangaan baan-balum ni baan-bakaj baakady bahambidil baamawej ba makos, ni bakeeh ki baakady baneemek Yehow ni mikenj yindiy. Nook, biin Yuud bavul baakady baciin Mawej, baakady batakamin bwa kuhingobomw mu bulab bwaababw cyaab cyaakadyobw mwa kuteek cikwaabw kuhambidil kujilang. w23.05 diib. 14-15 cik. 3-4

Tut byeet, bikaam tulomb dyambulwiish dya spirit mujilang a Mawej bwa tuhet mushind a kutungunuk ni kwiikal ni bilong bileeleej ney tudy “baat bady mu citookej.” Bwaabiny? Bwaal kabiishoh bend biheehel bwa kutungunuk ni kwiikal bajilang mu bulongolody bwa myand yibiih oobw. (1 Tes. 4:3-5, 7, 8) Sprit mujilang udy mwa kwiitwambulwiish bwa kulwiish meej ma ha bulab, ni meej ma biin ha bulab makiish mahetangan ni meej ma Mawej. Spirit mujilang udy mwa kwiitwambulwiish bwa kwiikal ni ‘myand yilengel ni yiwaakan.’ (Ef. 5:9) Mushind a kaabumw udy mwa kwiitwambulwiish bwa kuhet spirit mujilang i hakusambil Yehow bwa iitwaakishey. Yeez uleebel ney Yehow wiiyiiy ’kwaakish woos waakamulomb spirit mujilang.’ (Luuk 11:13) Ni hatutuutumbish Yehow haakaabumw mu bisangil biitut bya biin Krist, tuheehet byeet spirit mujilang. (Ef. 5:​19, 20.) Bukash budy naabw spirit a Mawej bwiiyiiy kwiitwambulwiish bwiitut kwiikal ni shikacil umvumvwangan ni lukat lwa Mawej. w24.03 diib. 23-24 cik. 13-15

Udy mukat kwiikal mwiin mu diis mutuuk eeny? Biby biikal naak, sambil bwa bwaal oobw. Kutukij mu diis i cyumw cya ku bituh bya diimum dya spirit. (Kal. 5:22, 23) Nook tudy mwa kusambil bwa kuhet spirit mujilang ni bwa kulomb Yehow bwa kwiitwambulwiish bwiitut kwiikal ni biikadil bitwaatwaal spirit indiy. Tut biikal tutwiilangan ni shikacil kaahand uteeteek kutukij kwiitut mu diiteet: Bikaam ’tutungunuk ni kulomb’ Yehow bwa iitwaakish spirit indiy bwa iitwambulwiish bwiitut kwiikal ni kutukij kwa mu diis. (Luuk 11:13) Tudy mwa kulomb cikwaabw Yehow bwa iitwambulwiish bwa kutal myand mu mushind udyey wiiyital. Kuunyim kwa tut baman kusambil, bikaam tulong mwiitut moos bwa kwiikal ni kutukij kwa mu diis diifuk dyoos. Civul hatusaasambil bwa kwiikal ni kutukij kwa mu diis ni twiikashishomw bwa kwiikal ni ciikadil eecy, ciiyiiy kwaas mij mu micim yiitut ni ciiyiiy kushaal cyumw cya biikadil bya buumuut bwiitut. Byambambulwiish cikwaabw bwa kulangil ha bileejel bya mu Bibl. Mu Bibl mudy bileejel bivul bya baat badyobw bateel baakady ni kutukij kwa mu diis. Kulangil ha myand yidyobw balond bwaababw, kudy mwa kwiitwambulwiish bwiitut kumanyik byeet bwa kwiikal ni kutukij kwa mu diis. w23.08 diib. 22 cik. 10-11

Yeez ujaadikil mupostol Pyeel ney Yehow wiiyiiy kumwambulwiish. Hasangukil Yeez, waakady mulongel Pyeel ni bapostol bakwaabw cishim bwa kukwaatobw misaany yivul. (Jah 21:4-6) Biin-biin, cishim eecy cijaadikil Pyeel ney Yehow udy mwa kwiibambulwiish biheehel ha kwiibah biit biikaakaamobw. Misang yikwaabw Mupostol Pyeel wiiyil kuvuluk may maleebel Yeez ma ney: Yehow wiiyiiy kwambulwiish aab batuutungunuk ni “kukaam cya kuuhal-a-hal Bukaleng.” (Mat. 6:33) Bilondeshel may aam, Pyeel uteekel mudimw a bukajaady ha cyaab cya kuuhal, ki kiin mudimw a kulob misaany. Waakady mudiil baat musah mulengel kay ni mooy mu diifuk dya Pantekoot mu muvw a 33 H.H.Y., waakady wend ni kwambulwiish baat bavul beeh bwa kwiitabobw musah mulengel. (Yil. 2:14, 37-41) Kuunyim, wiiyil kwambulwiish biin Samarih ni baat bakiish biin Yuud bwa kwiikalobw ni diitabij kudy Yeez. (Yil. 8:14-17; 10:44-48) Yehow ukadil biin-biin mudimw ni Pyeel mu mushind mukasakan bwa kufikish baat ba mitah yoos mu cisumbw cya biin Krist. w23.09 diib. 20 cik. 1; diib. 23 cik. 11

Bu mivw yibidy kuunyim kwa biin Babiloon baman kubutul Yeruzalem, Mukaleng a Babiloon Nabukodonozor ulotel cilot cyaakady cimulong mooy habitaatal luhing lutam. Ubikeen boos baakady ni meej teng ni Danyel, kwiimbambiley ney wiiyiiy kwiibazuh bab bakaakal kumwambil bwa cilot eecy ni bakaakal bwa kumumvwiijecy. (Dan. 2:3-5) Danyel waakady ni bwa kulong myand ni lwang; hamut ha baat bavul kufwebw. Danyel “uyiil kudy mukaleng bwa kumwiisanjil bwa ney anj amwaakish mafuk bwa amon mwa kumumvwiijey cilot cindiy.” (Dan. 2:16) Bimulombel bwa kwiikaley ni mucim mukasakan ni diitabij. Kabiishoh bend baleeb mu Bibl ney Danyel waakady mumvwiijok bilot kaahand. Ulombel balund nend “bwa kudidilobw Mawej udy mu diiwul bwa kwiibumvwiiley lus kwiibasokolweel cilot cisokot eecy.” (Dan. 2:18) Yehow waalabwiil masambil aam. Ku dyambulwiish dya Mawej, Danyel umvwiijil Nabukodonozor cilot cindiy. Kabaakadyoh bend bazuh Danyel ni balund nend. w23.08 diib. 3 cik. 4

Tutalaay myand yilengel yituheehet tut biikal biin mu diis mutuuk. Hatudy ni micim yitukij, tudy ni musangal muvul ni micim yiitut i yibatam menmen. Kwiikal ni micim yitukij kudy mwa kulong bwiitut kwiikal bilengel ku nyeet ni mu meej. Hatutukijil bakwaabw, bulund bwiitut naabw bwiiyiiy kwiikal bulengel menmen. Biin mu cisumbw ciitut biiyiiy kwiikal mu kaacyumw menmen. Muut yiy mwiitulongel bibiih, kwiikal ni ciineng kwiitut habitaatal kufulul kwa mund kwiiyiiy kwiitulekesh bwa kaay twaalong myand kuh kuh bibiih. (Mis. 37:8; Tus. 14:29) Ki tut boos, twiidiidikij Taat iitut a mu diiwul ni tufweefweej nend habwiih bikasakan. Kwiikal ni micim yituukij i ciikaadil cilengel cyambambulwiish! Tut batal ney kabiish bitukooyedyel bwa kwiikal ni kutukij, bikaam tumanyik ney Yewow yiy mwitwambulwiish tudy mwa kutunguk ni kwiikal ni ciikadil eecy. Ning mutudy biimanyin ni micim yitukij bulongolody buhyaabuhy, tudy ni bwa kwiikal bajaadik ney: “Diis dya [Yehow] Mawej i dital aab bamuneeneemek, i dital aab bady batakamin ku lukat lwindiy lwa bulamat.” (Mus. 33:18) Tut boos tudy mwa kwiiswiik bwa kutungunuk ni kwiikal ni micim yitukij. w23.08 diib. 22 cik. 7; diib. 25 cik. 16-17

Jak uleebel ney, muut udy mwa kuleeb ney udy ni diitabij, ki bilong bindiy bileeleejok ney, udy naady eeny? (Jak 2:1-5, 9) Jak uleebel bwa muut utadil ‘mwanaabw mwaan-mulum eecy mwaan-mukaj mususuk mubudilok ni byaakudy’ ki kay umwaakish ciit. Ning biby biikal ney muut oow waakady uleeb ney udy ni diitabij ki myand yilongeley yileejel ney kaakadyoh bend ni diitabij. (Jak 2:14-16) Jak uteelel Rahab bu cileejel cilengel cya diitabij dimweemweekel mu bilong. (Jak 2:25, 26) Umvwiil bwa Yehow ni bwa mushind waakadyey mwambulwiish biin Izaleel. (Joz. 2:9-11) Uleejel diitabij dindiy mu bilong—ni ulamin baakateetekel babidy biin Izaleel haakady buumy bwaababw mu buuhund. Rahab ni Abraham biibabadil bu baat bawaakan ning mwaakadyobw kabay bawaakan ni kabay balond may ma Mawej maheeley Moyiiz. Cileejel cya Rahab ciituloolongweesh ney bidy ni buseeb buvul bwa diitabij diitut dimweekel mu myand yituloolong. w23.12 diib. 5-6 cik. 2-13

Bu mutudy biin Krist katwiin tusangal bituh teng bwa kumanyik myand ya hamut hamut ya mu Bibl bwaal. Ki spirit mujilang a Mawej wiitukwaakwanjok bwiitut kwiikal tuzukil bwa kulong myand ’yondok yidy mu mukand mwa Mawej.’ (1 Kor. 2:9, 10) Bwabingany kwiin mwa kwiilongololokoh bwiibuh kutang kwiilongel kaayeeb keeb myand yikal mwa kukukwanjok bwiibuh kufweej habwiih ni Yehow? Cileejel, udy mwa kukontonon mwaakadyey muleej baat baakady bamuhambidil kal lukat ni mudyey uleej ney i mukukat uw byeeb leeloow. Udy mwa kufwanyikij mushind waakady Yehow mulongolol bwa kumuhambidilobw kudy biin Izaleel ni mudyey mulongolol bwa biin Krist baaleel. Misang yikwaabw bikaakaam ney ulong mu bondok may ma buprofet maakady makumbanyin Yeez mu shikacil indiy ni mu mudimw indiy a bukajaady akadyey ha bulab aah. Udy mwa kuhet musangal muvul wa kwiilongel uw mukal mudimw ni bimw bya ku biin bwaal bidy mu Mukanda wa makebulula wa Bantemu ba Yehowa. Kondol myand ya mu Bibl kwiiyiiy kukashish lwiitabij lwiibuh ni “wiiyiiy kumanyik bilengel Mawej.”—Tus. 2:4, 5. w23.10 diib. 18-19 cik. 3-5

Mwaak udy mupostol Pyeel mukal nend mudimw “bikasakan” umvumvwiij bituh ney “kuvudij.” Cituh ciibiidy cya verseh cileeleej citudy mwa kulong hatudy ni lukat luvul bwa bakwaabw. Lujiijimbakany bibiih bya biin-kweet. Twangat cijleejel eecy: Lang ket ney: Ha mees hady bukooy. Kudy mushind a kwangat cihes cya cizang cinaananik ni kwiicikok bwa kwiicibwiikil ha mees oos. Kiish bwa cibwiikil teng bukooy ha cyaab cyumw, eecy byaab bibidy, ki i bwa cibwiikil bukooy boos budy ha mees. “Kujimbakany” kudyobw baleeb hiinah, i mushind udyobw bumvwiij bwa kufwiilangan lus. Bya mushind aakaabumw, teng mudy cihes cya cizang mwa kujimbakany ha bukooy, tut biikal ni lukat luvul bwa biin-kweet baan-balum ni baan-bakaj, tudy mwa kujimbakany bibiih byoos bidyobw balong, eecy tudy mwa kwiibafwiil lus, kiin teng bwa bubiih bwaakaabumw, eecy myand yibiih yibidy, ki i bwiitut “kujimbakany myand yibiih yivul” yidyobw balong. Lukat lwiitut kudy biin-kweet lwiikal lukasakan bwiitut kwiibafiil lus hadyobw biitulongel myand yibiih ning iikaleby bimweek ney i bikasakan menmen. (Kol. 3:13) Hatufwiifwiil bakwaabw lus, tuleeleej ney tudy ni lukat lukasakan ni tudy bakat kusangeej Yehow. w23.11 diib. 11-12 cik. 3-15

Hakumbajil Mukaleng Joziyas bidimw 26, utangil kulongolol tempel. Haakadyey ulong mudimw oow, “umween mukand a may ma Mawej mambiiley baat muka mwa Moyiz.” Umvwiil mukaleng byaakadyobw baleeb mu mukand oow, wiitabil bwa kushintulukey bwa kukooyeley may maakadyobw bafundomw. (2 Cif. 34:14, 19-21) Udy mukatok kubal Bibl ha cimbidil eeny? Biby biikal ney wiikaakashish bwa kulong nook, umvumvw bicy? Utuutungunukok ni kukaam verseh yidy mwa kukwambulwiish eeny? Haakady Joziyas ni bidimw bu 39, ulongel cilem cyaakady cimwiitish boong. Waakady mwiiteekel micim kaayend hamut a kulomb buludik kudy Yehow. (2 Cif. 35:20-25) Kudy dilongweesh iinah. Ning biby biikal ney tukaady ni bidimw bivul eecy tukaady ni mafuk mavul mu bulongolody, bikaam tutungunuk ni kulomb buludik kudy Yehow. Tudy mwa kulong nook hakumusambil bwa kulomb buludik bwindiy, hakulong Diiy dindiy, ni hakuhet dyambulwiish ku mibel ya biin Krist neet bakuluuh mu diitabij. Katwaakwiiyoh bend kulong misang yikwaabw bilem bitam ni twiiyiiy kwiikal ni musangal misang yikwaabw.—Jak 1:25. w23.09 diib. 12 cik. 15-16

Bibl uleeleeb bwa baan-bakaj ba biikadil bilengel baakady bakat Yehow ni bamukadil mudimw. Baakady “bady ha kadiil, ban ha kanwiin” ni “biikal bakooyel mu myand yoos.” (1 Tim. 3:11) Cikwaabw, biin-kweet baan-bakaj bady mwa kwiikal ni biin-kweet bakwaabw biin Krist bakuluuh mu diitabij mu cisumbw cyaabab badyobw mwa kwiidikij. Nun, baasand baan-bakaj, nudy bamanyikok biin-kweet baan-bakaj biin Krist ba biikadil bilengel banudy mwa kwiidikij eeny? Longel ku biikadil byaabab bilengel aaby, ni tal muwudy mwa kwiibileej.Ciikadil cya buseeb cidy naacy mwiin Krist mukuluuh mu diitabij i kwiihweekej. Mwaan-mukaj yiy mwiikal ni kwiihweekesh, wiiyiiy kwiikal bilengel ni Mawej ni baat bakwaabw. Cileejel, mwaan-mukaj udy mukat Yehow wiiyiiy kukooyel ni kwiihweekesh koos diiy ditam habitaatal buufumw didy 1 Kor. 11:3, mu diiy eedy Yehow i muleej muut udyey mwaakish bujit bwa kulombol cisumbw ni bwa udy ku mut kwa cisak. w23.12 diib. 18-19 cik. 3-5

Yehow i mukat bwa mwaan-mulum akat mukaj indiy ni amutabaleel bwa biit bikaakaamey, bwa kwiikal mulund nend mulengel, ni bwa kumwambulwiish mu myand ya mu spirit.Biikadil ni myand yitubaman kwiisamb mu ciin bwaal eecy, bu mudy kwiikal ni kulang kwa meej, kuneemek baan-bakaj, kwiikal baat ba kuteekel micim bwa kukal mudimw bilengel, biiyiiy kwiinwambulwiish hanwiikal mu maluw. Kuunyim kwiinun baman kutweel mu maluw, wiiyiiy kushaal taat. I biny biwudy mwa kulongel kudy Yehow habitaatal kwiikal taat mulengel? (Ef. 6:4) Yehow uleebel hatook ney: Yeez i Mwaan indiy udyey mukat ni udyey mwanyish. (Mat. 3:17) Uw mushaal taat, iikal mutwiishibw ney wiiyiiy kwiikal ni ciibidil cya kujaadikil baan-biibuh ney udy mwiibakat. Ni lukat, iikal ni ciibidil cya kwiibeel kalumbandy bwa myand yilengel yoos yidyobw balong. Baataat biidiidikij cileejel cya Yehow, bambambulwiish baan baababw bwa kwiikalobw baan-balum ni baan-bakaj bakuluuh mu diitabij. Udy mwa kwiilongolol teng kaabaak bwa kukukumbaj mudimw oow hakukat biin mu cisak ciinun ni biin-kweet ba mu cisumbw ni hakwiibambil neey udy mwiibakat ni hakwiibanyish, hakwiibaleej ney bady ni buseeb kunudy. w23.12 diib. 28-29 cik. 17-18

Ning mutudy biin mudimw ba Yehow ba lulamat, tuheehet makab, ni tubeebeel teng bu baat boos. Tudy mwa kuhet cikwaabw bulwiish bwa kudy baat bady bakin baat ba Mawej. Ning mudy Yehow kay wiitweehul ku makab aam, wiitulaalay bwa kwiitwambulwiish. (Ye. 41:10) Hadyey wiitwambulwiish, tudy mwa kutungunuk ni kwiikal ni musangal iitut, twangat mahangadik malengel ni tushaal teng bamulamat ning hatumoomon makab makasakan menmen. Yehow i mwiitulay bwa kwiitwaakish cidy Bibl ubiikan ney “diitalal dya Mawej.” (Fili 4:6, 7, NWT) Diitalal eedy, dileeleej kubatamij kwa mu micim ni kwa mu lungeny kutuheehetel ku bulund bulengel butudy bady nend. Diitalal eedy “i dihitok meej moos malaalang baat”; I dilengel mu mushind utudy katuy mwa kuleeb. Ukaady musambiloh Yehow bikasakan menmen ni uw kumvw musang umw diitalal dya mu micim kuunyim kwa diisambil eeny? Ciwumvwiil aacy i cicy cibiibiikanobw ney: “diitalal dya Mawej.” w24.01 diib. 20 cik. 2; diib. 21 cik. 4

Baat bady bakat Mawej, batuutumbish diijin dindiy ni mucim aababw woos. Mukaleng Davih waakady mumanyik ney, hatutuutumbish diijin dya Yehow, i bya mushind aakaabumw ni hatutuutumbish Yehow kaayend kend. Hatumvumvw diijin dya Yehow, tulaalang bwa buumuut bwindiy ni bwa biikadil bindiy byoos bilengel ni myand yilengel yidyey mulong. Bwa Davih diijin dya Taat indiy dyaakady dijilang ni waakady mukat kwiiditumbish. Waakady mukat kulong nook ni “biit byoos bidy mund” mwindiy—i bwiin kuleeb ney, ni mucim aakaabumw. Bya mushind aakaabumw, biin Leevy ki baakady ku mut kwa myand yaakady yital kutumbish Yehow. Biitabil ni kwiihweekesh ney, may maabab kamaakadyoh bend makumban bwa kwaakish diijin dijilang dya Yehow lutumb ludyedy diwaakanyin. (Neh. 9:5.) Biin-biin, Yehow umvumvw musangal adyobw bamutumbish ni kwiihweekesh ni mucim aakaabumw. w24.02 diib. 9 cik. 6

Yehow kakwiiy kukutal bu udy mukaakal bwaal mukumbaj kiihacil kawaakady kuy mwa kukumbaj. (2 Kor. 8:12) Tal bwaal budy bukukooyesh mu mabok bu dilongweesh diwudy muhet. Vuluk myand yiwukaady muman kulong. Bibl uleeleeb ney: “Mawej kiishoh bend kabow. Kiish uvulamin midimw yiinun.” (Ebr. 6:10) Nook, uw byeeb kuvulaminoh bend myand yoos yiwukaady mulong. Langil ha biihacil biwukaady muman kukumbaj—yidy mwa kukwambulwiish bwa kudy bulund ni Yehow, bwa kwambil baat bakwaabw myand yindiy, eecy bwa kuhet baatiisumw. Teng muwudy muy kuuhal ni mukumbaj biihacil bya mu spirit ha kal, udy mwa kutungunuk ni kuy kuuhal bwiibuh kukumbaj kiihacil kawudy naak kaabaak. Ku dyambulwiish dya Yehow, udy mwa kukumbaj kiihacil kiibuh. Bya mushind aakaabumw, uw utungunuk ni kukal mudimw bwa kukumbaj kiihacil kiibuh ka mu spirit, kuvulaminoh bend hawutaatal mudy Yehow ukwambulwiish ni ukufiil kis hawukaakal mudimw bwa kukumbaj biihacil biibuh. (2 Kor. 4:7) Uw mulek kuhing haanyim, manyik neey wiiyiiy kuhet cikwaabw mabenesh mavul menmen.—Kal. 6:9. w23.05 diib. 31 cik. 16-18

Yehow i mukat kuleej baat bindiy neey i mwiibakat ni wiibanyanyish. Bibl uteeteel biisang bibidy haakadyey mwambil Yeez neey waakady mwaan indiy waakadyey muhit kukat, ni wanyish. (Mat. 3:17; 17:5) Ukaakaam neey Yehow akujaadikil neey ukwanyanyish eeny? Yehow kiish mwa kwiisamb neet tut bumvwok, ki wiisaasamb neet ku dyambulwiish dya Bibl. Tudy mwa “kumvw” diiy dya mudy Yehow wiitwanyish hatubaabal may ma Yeez mady mu musah mulengel. Yeez waakady uleej biin-biin buumuut bwa Taat indiy. Nook hatubaabal neey Yeez wanyishiil biiyij bindiy ba lulamat baakady baat bakiish bawaakan, tudy mwa kwiifwanyikijil bu Yehow wend wiitwambil may aam. (Jah 15:9, 15) Makab mam miitukwaat, kabiish bileej ney Yehow kaciish wiitwanyish, ki miitwaakaakish mushind iitut kuleej mutudy bakat Mawej bikasakan ni bamuteekel micim. w24.03 diib. 28 cik. 10-11