Ebaruha Yakabiri Okwa Banya Korinto
3 Mbwino thwamatsuka eriyihamyako kandi? Kutse ng’abandi bandu, mbwino thunayithaghire eribakangya esyobaruha sy’erihamibwako kutse eribasabasyo? 2 Inywe inywibene-bene muli baruha yethu, eyisakire okwa mithima yethu kandi eyasibwe kandi eyikasomawa n’abandu abosi. 3 Kundi mukakanganibawa eribya baruha ya Kristo eyo ithwe ng’abaherezya thwahandika, eyisakire, butsira omwa bwino, aliwe omwa mulimu wa Nyamuhanga oyuliho, butsira okwa bisayi by’amabwe, aliwe okwa bisayi by’omubiri, okwa mithima.
4 Thuwithe eriyikethera ly’omulingo oyu omu Nyamuhanga erilhabira omu Kristo. 5 Si bugha indi ithwe okwa lyethu thwabiritholera ndeke erilengekania thuthi hane ekyosi-kyosi ekyangalhua okw’ithwe, aliwe eritholera lyethu ndeke likalhua oku Nyamuhanga, 6 oyuwabirileka ithwatholera ndeke eribya baherezya b’endaghane nyihya-nyihya, butsira ab’emighambo eyihandikire aliwe ey’omulimu; kundi emighambo eyihandikire yikatswera omundu y’olhw’erikwa, aliwe omulimu akaha engebe.
7 Neryo Emighambo eyikaletha olhuholho kandi eyabya yisakire okwa mabwe omwa syonyughuta yamabya imuyanasa n’olhukengerwa lhunene indi abaana be Israeli isibanga samalira obusu bwa Musa busana n’olhukengerwa lhw’obusu bwiwe, olhukengerwa olhwabya lhw’erilhusibwaho, 8 mbwino ekikalethawa n’omulimu isikyendibya n’olhukengerwa olhulhabire aho? 9 Kundi Emighambo eyabya yikahira okwa bandu kw’olhubanza yamabya iyabya n’olhukengerwa, ibbwa ekikaletha erithunganene ikikendibya ky’olhukengerwa bungahi! 10 Kundi nibya ebyanayirawa mwa by’olhukengerwa mubyasaghulhwako olhukengerwa busana n’olhukengerwa olhulengirebyo. 11 Kandi ebyabya by’erilhusibwaho byamabya imubyasa n’olhukengerwa, ibbwa kwesi ekyasa ini isiky’erihwaho kyangabere ky’olhukengerwa bungahi!
12 Kundi thuwithe amaha ng’ayo, thuli n’obwiranda bunene bw’erikania, 13 butsira erikolha ebya Musa akolha omughulhu aby’akahira ekitambara ky’okwa busu bwiwe nuku abaana be Israeli sibalhangire ndeke erihwaho ly’ebyabya by’erilhusibwaho. 14 Aliwe obulengekania bwabu mubwayirwamo bukiru. Kundi erihika namunabwire, ekitambara ikyan’ekyo kikasighalha ikikine oko busu endaghane ya kera yikasomwa, kundi kikalhusibawako erilhabira omu Kristo musa. 15 Kundi erihika namunabwire, Musa akabya akasomwa, ekitambara kikabya ikinathekire okwa mithima yabo. 16 Aliwe omundu akabya akabindukira Yehova, ekitambara kikalhusibawako. 17 Yehova ni Mulimu, n’aho omulimu wa Yehova ali, hali obwiranda. 18 Kandi ithwe bosi thukahindukibawa mwa kisosekanio kighuma erilhua okwa lhulengo lhughuma lhw’olhukengerwa erisuba okwa lhundi, ngoku kyanakolhawa na Yehova oyuli Mulimu, ithwe thutheko ekitambara okwa busu ithunemulhuako emisalhalha y’olhukengerwa lhwa Yehova ng’ebiyo.