Ebaruha Okwa Banya Efeso
6 Abaana, mwowe ababuthi benyu omw’imathikana n’Omukama, kundi eki kithunganene. 2 “Wusikaye thatha wawu na mama wawu” ky’ekihano eky’erimbere ekihambene n’omulhaghe: 3 “Nuku emyatsi yanga kughendera* ndeke kandi wangabya okwa kihugho kwa mughulhu muuli.” 4 Abathatha, simubye mukahithania abaana benyu, aliwe mulhole embere erikulyabo omw’ikunga n’erihabulha* lya Yehova.
5 Abaghombe, mwowe abakama benyu abandu,* omw’ubaha n’omw’ithithimana omwa kwenene kw’emithima yenyu, nga mukowa Kristo, 6 butsira omughulhu musamalirwe lisa, habw’erithatsemesya abandu, aliwe nga baghombe ba Kristo abakakolha erisonda lya Nyamuhanga n’omuthima wosi. 7 Mukole imunawithe amalengekania awuwene, nga mukakolera Yehova butsira abandu, 8 kundi munasi ngoku obuli kibuya eky’obuli mughuma akakolha, Yehova akendi syamusubuliryakyo, mbulha ni mukobe kutse oyuli bwiranda. 9 Nenyu, inywe bakama, mulhole embere eribakolha ndeke omwa mibere iyan’eyo, butsira eribahayira, kundi munasi ngoku Omukama wabo kandi owenyu ane elhubulha, kandi syali mw’akasolholho.
10 Erighunzerera, mulhole embere eribana amaaka omo Mukama n’omwa buthoki bw’akaghalha kiwe. 11 Mwambale ekyambalho ky’amalhwa ekilhughirirene ekikalhua oku Nyamuhanga nuku mwanga thoka erimanira ebithegho bya Diabolo; 12 kundi thuli omwa malhwa,* is’ilhwa n’omusasi n’omubiri, aliwe thukalhwa n’amathabali, thukalhwa n’ab’ehamuli, thukalhwa n’abathabali b’ekihugho ab’omwirima ono, thukalhwa n’emirimu mibi y’amaaka eyiri omwa myanya y’elhubulha. 13 Busana n’eki, mwimaye ekyambalho ky’amalhwa ekilhughirirene ekikalhua oku Nyamuhanga, nuku mwanga syathoka eriyilhwirako okwa kiro kibi, neryo mukendibya mwabiriberererya obuli kindu, imwasika.
14 Busana n’ekyo, musike, omukabba w’ekwenene inianabohire ndeke omwa mbindi yenyu, imunambere ekitheya-kikuba eky’erithunganene, 15 kandi imunambere ebiryatho eriyitheghekera erithulhughania engulhu yuwene y’obuholho. 16 Eryongera okw’ebi, mwimaye engabo nene y’erikirirya, eyo mukendi kolesya erilimya emisoha yosi y’omuliro ey’omubi. 17 Kandi mwangirire ekisapeho ky’omulhamu, n’omuyali w’omulimu, ni bugha ambu, ekinywe kya Nyamuhanga, 18 omw’isaba ly’obuli mulingo n’erilemba-lemba mukasaba okwa buli mughulhu omwa mulimu. Kandi busana n’ekyo mubye imunalholire, mughulhu wosi erisaba omw’ilemba-lemba busana n’ababuyirire abosi. 19 Naghe munyisabire, nuku ngahebawe ebinywe omughulhu ngathanda obuno bwaghe, nuku ngathoke erikania buthubaha ingaminyikalya embitha yibuyirire ey’engulhu yuwene, 20 eyo ngathulha ng’omuambasada inganeko ebigyeghere, nuku kandi nangakania kuyo omwa buthubaha, ngoku ngatholere erikania.
21 Kandi nuku mwanga minya ebinyihambireko n’eriminya nga ngaliyo nyithi, Tikiko mughalha wethu mwanzwa kandi omughombe muthaleghulha omo Mukama, akendi babwira ebyosi. 22 Ngamuthuma eya muli busana n’ekighendererwa eki, nuku mwanga minya nga thuliyo thuthi kandi nuku angahumulikania emithima yenyu.
23 Ambi balikyethu ibabya n’obuholho n’olhwanzo haghuma n’erikirirya erilhua oku Nyamuhanga Thatha n’Omukama Yesu Kristo. 24 Ambi olhukogho ilhwabya okwa bosi abanzire Omukama wethu Yesu Kristo omwa buthahonda.