Ebaruha Eyakabiri oku Timoteo
1 Paulo, omukwenda wa Kristo Yesu omw’isonda lya Nyamuhanga erikwamana n’omulhaghe w’engebe eyikasa erilhabira omu Kristo Yesu, 2 oku Timoteo, omwana mwanzwa:
Ambi olhukogho, obughanyiri, n’obuholho erilhua oku Nyamuhanga Thatha na Kristo Yesu Omukama wethu ibyabya nawu.
3 Ngasima Nyamuhanga oyo ngakolera omubiiri owabuyirire ngoku abathatha-kulhu baghe bakolha, kandi ingane n’obunyamuthima-thima obuhenirye, sindi nathaleka erikwibuka omwa misabe yaghe y’erilemba-lemba omwa kiro n’omw’ithungyi. 4 Ngabya ing’ibuka emisoni yawu, ngakandira erikulholhako nuku nangatsema kutsibu. 5 Kundi ng’ibuka erikirirya lyawu erithemo mathebo, eryatsuka omu mukaka wawu Loisi n’omu mama wawu Yunisi, eryo ngayikethere ngoku line n’omw’iwe.
6 Busana n’enzumwa eyi, ngakw’ibukaya indi ekihembo kya Nyamuhanga ekiri omw’iwe ekyawahebawa omw’ikuhirako ebyalha byaghe, kibye ikinemwaka ng’omuliro. 7 Kundi Nyamuhanga mwathathuha omulimu w’eryubaha, aliwe ow’amaaka n’ow’olhwanzo n’ow’obulengekania bw’amenge. 8 Neryo isiwakwa esisoni sy’eriha obwema oko Mukama wethu kutse okw’ingye, omunya-ngomo busana nayu, aliwe wubye iwunayitheghekire eriheka omuheke wawu w’eriaghalhwa busana n’engulhu yuwene omw’iyikethera obuthoki bwa Nyamuhanga. 9 Mwathulhamya n’erithubirikira omw’ibirikira eribuyirire, isi busana n’ebya thukakolha, aliwe busana n’ekighendererwa kiwe n’olhukogho. Muthwahebwalho erisighikira oku Kristo Yesu erilhua kera, 10 aliwe lino lhwabirilhangirika ndeke-ndeke erilhabira omw’iminyikalibwa ly’Omulhamya wethu, Kristo Yesu, oyuwabirighunzaho olhuholho kandi abiriletha ekyakakalha okwa ngebe n’obuthahonda erilhabira omwa ngulhu yuwene, 11 eyaleka inasombolhwa mwa muthuliri kandi mukwenda kandi mukangirirya.
12 Kandi eki ky’ekikaleka ebi ibyanyaghalya, aliwe singakwire esisoni. Kundi nganasi Oyo nabirikirirya kandi ngayikethere ngoku akathoka eritheya ebyo nabirimuwathya erihika okwa kiro ekyo. 13 Wulhole embere ery’amakirira omusingyi w’ebinywe ebihikire* ebyo wowa erilhua okw’ingye omw’ikirirya n’omo lhwanzo ebikasa busana n’erimathikana na Kristo Yesu. 14 Wutheghaye eby’obughuli ebi ebyo wabiriwathibwa erilhabira omwa mulimu abuyirire, ow’ikere omw’ithwe.
15 Wunasi kino, ngoku abalhume abosi ab’omwa provisi ye Asia babirinyisighania, imwamune na Figelo na Hermogene. 16 Ambi olhukeri lhw’Omukama ilhwabya haghuma n’ab’omwa nyumba ya Oniziforo, kundi mughulhu mungyi iniakanyihumulikanaya, kandi mwathayowa ng’akendi hemuka busana n’ebigyeghere byaghe by’engomo. 17 Omwakanya k’ekyo, omughulhu abya e Roma, mwanyisondya kutsibu kandi mwanyibana. 18 Ambi Omukama iniamulighira erisyabana olhukeri lhwa Yehova ekiro ekyo. Kandi wunasi ndeke ebyosi ebyo akolha e Efeso.