Ebaruha y’Erimbere eya Yohana
4 Banzwa, simw’ikiriraye obuli mwatsi w’ekirimu, aliwe mulebaye emyatsi ey’ebirimu eriminya nga yinalhuire oku Nyamuhanga, kundi abaminyereri bangyi ab’amabehi babiryasa omwa kihugho.
2 Ku mukaminya muthya ngoku omwatsi w’ekirimu akalhua oku Nyamuhanga: Obuli mwatsi w’ekirimu owakaligha Yesu Kristo ng’oyuwasa omwa mubiri, akalhua oku Nyamuhanga. 3 Aliwe obuli mwatsi w’ekirimu owatheligha Yesu syalilhua oku Nyamuhanga. Eryongera okw’ekyo, oyo w’omwatsi w’ekirimu ky’omuhakanisya wa Kristo oyo mwowa kw’anemwasa, kandi lino abirihika omwa kihugho.
4 Baana balere, mulhuire oku Nyamuhanga, kandi mwabiribakinda, kundi oyumathikene nenyu alengire oyumathikene n’ekihugho. 5 Balhuire omwa kihugho; ky’ekikaleka ibabugha ebikalhua omwa kihugho kandi ekihugho kikabahulikirira. 6 Thukalhua oku Nyamuhanga. Oyuwabiriminya Nyamuhanga akathuhulikirira; oyuthelhua oku Nyamuhanga syali thuhulikirira. Omw’eki, thukaghabulha omwatsi w’ekirimu ow’ekwenene okwa mwatsi w’ekirimu ow’amabehi.
7 Banzwa, thulhole embere erianzana, kundi olhwanzo lhukalhua oku Nyamuhanga, n’obuli mundu oyuwithe olhwanzo akabuthawa na Nyamuhanga kandi anasi Nyamuhanga. 8 Oyuthawithe olhwanzo syali athaminya Nyamuhanga, kundi Nyamuhanga ni lhwanzo. 9 Omw’eki, olhwanzo lhwa Nyamuhanga mulhwabisulhwa okw’ithwe, indi Nyamuhanga mwathuma Mughalha wiwe ekyusa omwa kihugho nuku thwanga bana engebe erilhabira omw’iyo. 10 Olhwanzo lhuli lhuthi, si bugha indi muthwanza Nyamuhanga, aliwe mwathwanza kandi mwathuma Mughalha wiwe ng’ekihongo ky’erighonga-ghonga* busana n’ebibi byethu.
11 Banzwa, Nyamuhanga amabya imwathwanza athya, neryo nethu thuwithe olhukwamirwa lhw’erianzana. 12 Sihali oyuwabirithalhangira Nyamuhanga kiro na kighuma. Thwamalholha embere erianzana, Nyamuhanga akasighalha iniane omw’ithwe kandi olhwanzo lhwiwe lhukahikana omw’ithwe. 13 Omw’eki thunasi ngoku thukasighalha ithunamathikene nayu, nayu inianamathikene nethu, kundi abirithuha omulimu wiwe. 14 Eryongera okw’ekyo, ithwe ithwibene-bene thwabiriyilhangira kandi thunemuha obwema ngoku Thatha abirithuma Mughalha wiwe ng’omulhamya w’ekihugho. 15 Oyukaligha ngoku Yesu ni Mughalha wa Nyamuhanga, Nyamuhanga akasighalha inianamathikene n’omundu oyo, nayu inianamathikene na Nyamuhanga. 16 Kandi thwabiriminya n’erikirirya olhwanzo olho Nyamuhanga abirithuha.
Nyamuhanga ni lhwanzo, kandi oyukasighalha omo lhwanzo akasighalha inianamathikene na Nyamuhanga na Nyamuhanga inianamathikene nayu. 17 Omwa nzira eyi, olhwanzo lhwabirihikana omw’ithwe, nuku thwangabya n’obwiranda bw’erikania* okwa kiro ky’eritswera, kundi ngoku oyo ane, nethu kwa thune thuthya omwa kihugho. 18 Olhwanzo silhulibya mw’eryubaha, aliwe olhwanzo olhuhikene lhukahighitha eryubaha, kundi eryubaha likathukakiraya. Ni kwenene, oyukubaha syali athahikanibwa omo lhwanzo. 19 Thuwithe olhwanzo, kundi mwatsuka erithwanza.
20 Omundu amabugha athi, “Nganzire Nyamuhanga,” aliwe iniaponire mulikyabo, ini mubehi. Kundi oyuthanzire mulikyabo, oyo abirilhangira syanganza Nyamuhanga oyo athe athalhangira. 21 Kandi thuwithe ekihano kino erilhua okw’iyo, kithi oyuwanzire Nyamuhanga atholere inianza na mulikyabo.