Ebaruha Yakabiri Okwa Banya Korinto
12 Ngatholere ingayihalhamba. Sikiwithe mughaso, aliwe muleke ngakanaye okw’ibonokerwa n’eribisulirwa ly’Omukama. 2 Nganasi omulhume oyumathikene na Kristo, oyo emyaka 14 enyuma—mbulha ni w’omubiri kutse si w’omubiri, singasi; Nyamuhanga yuwasi—mwathwalhwa omwa lhubulha olhwakasathu. 3 Ee, nganasi omulhume ng’oyo—mbulha ni w’omubiri kutse si w’omubiri, singasi; Nyamuhanga yuwasi— 4 oyuwathwalhawa omwa paradiso, am’owa ebinywe ebithe byanga buwa kandi ebya mundu athalighirwe eribugha. 5 Ngendi yihalhambira omulhume ng’oyo, sinendi yihalhambira ekyo ngali aliwe obutseke bwaghe busa. 6 Kundi nomunanganza eriyihalhamba, isingali mukiru, kundi iningendibya iningabugha okwenene. Aliwe ngayikakiraya okw’ikolha ekyo, nuku sihabye oyukanyipipa kutsibu kwilhaba ebyo akanyilhangiramo kutse eriowa ingabugha, 7 habw’erithahebwa eribisulirwa erikaswekaya ng’eryo.
Erinyitheya okw’iyihalhamba kutsibu, munahebwa erihwa omwa mubiri, omumalaika wa Sitani, eribera erinyimathangulha,* nuku singayihalhambe kutsibu. 8 Mirundi isathu munalemba-lemba Omukama busana n’eki, indi ambi linyilhuemo. 9 Aliwe mwanyibwira athi: “Olhukogho lhwaghe lhukakughunza, kundi akaghalha kaghe kakahikanibawa omwa butseke.” N’omuhwa munene, ngendi yihalhambira obutseke bwaghe, nuku akaghalha ka Kristo kangasighalha ikananyiswikire ng’ehema. 10 Neryo ngatsema omwa butseke, omw’itsumwa, omwa mighulhu y’obuyithawa, omw’endereribwa n’omwa bitsibu, busana na Kristo. Kundi omughulhu indi mutseke, ibbwa ngawithe akaghalha.
11 Nabiribya mukiru. N’inywe mwaleka inabya indya, kundi mwabya mutholere imwanyihamyako. Mundalhangirika nga ngali wahisi oko bakwenda benyu abakayahulhamo ab’endatha, omwa kindu na kighuma, nomundawithe mughaso. 12 Omo kwenene, ebikaminyikalhaya omukwenda mubyalhangirika omo kathi-kathi kenyu omw’iyiyinia linene, n’omwa biminyikalho n’omwa bikathikaya n’omwa by’amaaka. 13 Ingye erithwamu erithendibya muheke okw’inywe, mbwino obo mukyamanyisya kithi simuthatsomanwa ng’ebindi bithunga? Kyamabya ikwakiri kithya, kisi munganyire busana n’esobya eyi.
14 Lebaya! Ono w’omurundi wakasathu ingayitheghekera eryasa eyo muli, kandi sinendibya muheke. Kundi ebindu byenyu sibyo ngasondekanaya, aliwe inywe; kundi sikitholere erilengekania indi abaana bo batholere ibabikira ababuthi babu, aliwe ababuthi bo batholere ibabikira abaana babu. 15 Ingye, inganatsemire ngendihayo ebyaghe byosi busana nenyu, n’eribakolera ingye wosi. Namabya ingabanzire kutsibu-tsibu indya, mbwino ngatholere inganzwa kuke? 16 Nomwabine, munathabya muheke okw’inywe. Aliwe, mukabugha muthi munakolesya “obuthebya” namabahamba omwa “bukodyo.” 17 Mundabaghoberako erilhabira omwa wosi-wosi oyo nabathumako, kwa bithe? 18 Munalemba-lemba Tito, namabathumirayo iniane n’owundi mughalha wethu. Tito mwathabaghoberako nahake, kwa bithe? Muthwalendera omwa mulimu mughuma, kwa bithe? Omwa lhughobe lhughuma, kwa bithe?
19 Mbwino eritsuka kera mwabiribya imunemulengekania muthi thukayilhwirako? Embere sya Nyamuhanga thukakanaya ithunamathikene na Kristo. Aliwe, banzwa, ebyosi ebya thukakolha ni busana n’eribahimba. 20 Kundi ngakwire obuba indi ngendibya ingahika eyo, nangana thendi beya ngoku nganzire imwabya, naghe nangana thend’ibya ngoku mwanzire ingabya, aliwe, hanganabya amalhwa, erihali, eritsurumirana, obuhaka, olhuthongo, ebwebwebwe, eryusulhamo emiyiheko, n’eputsu-putsu. 21 Obundi ngendi syabya ingathasyasa, Nyamuhanga waghe anganasyaligha inahemukira embere syenyu, kandi inanganasyalira busana n’abangyi b’okwa babya ibabirihalya aliwe isibathayisubamo erileka obukine bwabu n’eby’obutswatswa* n’emibere y’obukamya meso* ebyo babirikolha.