Thuli n’Obutseme Erikolha Kutsibu Omubiiri wa Yehova!

¹ Omukwenda Paulo abya n’obutseme “eriyinubya” kutse erikolha kutsibu busana n’eriberererya omubiiri wiwe ow’Ekikrisitayo. (2 Kor. 12:15) Kuthya munabwire, Abakrisitayo abangyi bakakolha kutsibu ng’abatemburi. Nomwakine indi abandi bawithe olhukwamirwa lhunene olhw’eritheya amaaka, bakabana endambi ey’erisangira omw’ithulira obuli yenga. Abandi abawithe amakoni awakalha-kalire bakakolesaya akaghalha akabawithe erikulha-kulhania emyatsi ey’Obwami. Ka kikathuha omuhimbo erilhangira abandu ba Yehova, abakulhu n’abalere kutse abali omwa mibere yosi-yosi, bakahira mw’esyongakamulho erikolha omubiiri wa Yehova!

² Erianza Abaliranwa: Erikolha ekyosi-kyosi ekya thwanga thoka thukakolera Yehova, erikangania ngoku thwanzire Nyamuhanga n’abaliranwa, kikaleka ithwabya n’obunya muthima-thima obuwene. Kundi Paulo mwakolesya engebe yiwe ya kutsibu akathulha engulhu yuwene, iniakabugha iniana tsemire athi: ‘Ngabathuliragho munabwire nyithi, sindi kw’olhubanza lhw’omundu n’omughuma.’ (Emib. 20:24, 26; 1 Tes. 2:8) Erisangira omw’ithulira erihika okwa lhulengo olhwa thwanga thoka kikaleka ithwa yisangulha kw’omusasi w’abandu.​—Eze. 3:18-21.

³ Erikolha kutsibu busana n’eriwathikya abandi kikathulethera etseme. (Emib. 20:35) Mughalha wethu mughuma mwabugha athi: “Ngabya ngasuba eka y’omw’igholho-gholho, ingalhua omwa mubiiri wa Yehova, omwa kwenene nga yowa ingabirilhuha. Aliriryo nga tseme, kandi nga sima Yehova busana n’erinyihererya etseme ey’omundu athe anga nyilhusyako.”

⁴ Erianza Nyamuhanga: Eritsemesya Thatha wethu ow’elhubulha y’enzumwa nkulhu eyikaleka ithwa sangira kutsibu omwa mubiiri wa Yehova. Erianza Nyamuhanga likaleka ithwa kenga ebihano biwe, imwamuli erithulira n’eriyira abigha. (1 Yn. 5:3) Abandu n’omubangabya isibanzire kutse ibakahakanisaya omwatsi wethu, thukalholha embere erikolera Yehova ya kutsibu ithune n’obutseme.

⁵ Eno si y’endambi ey’erilhuhirira. Thuli omwa buthuku bw’erighesa. (Mt. 9:37) Mughulhu mungyi omulimi akakolha kutsibu omwa buthuku bw’erighesa kundi awithe obuthuku obubaririre obw’erihulhulha ebirimwa biwe bithe bya tsuka eribbolha. Obuthuku obwa thuwithe obw’erikolera mw’omubiiri ow’erighesa ow’obunyakirimu nabu bubaririre. Thune mulengekania okwa buthuku obwa thulimu, thulhole embere erikolha kutsibu omubiiri w’erithulira.​—Luka 13:24; 1 Kor. 7:29-31.