Ebaruha y’Erimbere eya Yohana

3 Lhangira omulingo w’olhwanzo olho Thatha abirithuha, ithwe eritholera eryahulhwamo baana ba Nyamuhanga! Kandi kwenene thuli baana biwe. Ky’ekikaleka ekihugho ikithathuminya, kundi sikiri kyathamuminya. 2 Banzwa, lino thuli baana ba Nyamuhanga, aliwe sikiri kyaminyikalibwa nga thukendi syabya thuthi. Thunasi ngoku omughulhu akendi syaminyikalibwa thukendi syabya ng’iyo, kundi thukendi syamulhangira ngoku ane. 3 Kandi owosi-wosi oyuwithe amaha aya omw’iyo, akayeraya, ngoku oyo nayu erire.

4 Obuli mundu oyukabera erikolha ekibi akabya iniamasangira n’omwa bubi, kandi ekibi ni bubi. 5 Kandi munasi ngoku mwaminyikalibwa erilhusyaho ebibi byethu, kandi syalimo ekibi. 6 Obuli mundu oyukasighalha inianamathikene nayu syali kolha ekibi; owosi-wosi oyukabera erikolha ekibi syali athamulholhako kutse erimuminya. 7 Baana balere, sihabye oyukabathebaya; oyukabera erikolha ebithunganene athunganene, ngoku oyo nayu athunganene. 8 Oyukabera erikolha ekibi ni wa Diabolo, kundi Diabolo abiribya inianemuhalya eritsuka okwa nzuko.* Busana n’ekighendererwa eki Mughalha wa Nyamuhanga mwaminyikalibwa, eritsutsanga* emikolere ya Diabolo.

9 Obuli mundu oyukabuthawa na Nyamuhanga syalibera erikolha ekibi, kundi embutho* Yiwe yikasighalha omwa mundu oyo, kandi syangabera erikolha ekibi, kundi akabuthawa na Nyamuhanga. 10 Abaana ba Nyamuhanga n’abaana ba Diabolo baminyikere omwa kino: Oyuthekolha ekithunganene si wa Nyamuhanga, kuthya n’oyuthanzire mulikyabo. 11 Kundi oyu w’omwatsi ogho mwabiriowa erilhua okwa nzuko, indi thutholere ithwanzana; 12 butsira nga Kaina oyuwabya w’omubi kandi oyuw’itha mughalha wabo. Ni nzumwa yahi eyaleka iniamw’itha? Kundi emikolere yiwe yabya mibi aliwe eya mughalha wabo yabya yithunganene.

13 Balikyethu, isimwasweka, ekihugho eribya ikibaponire. 14 Thunasi ngoku thwabirilhua omwa lhuholho thwabiryasa okwa ngebe, kundi thwanzire balikyethu. Oyuthawithe olhwanzo akasighalha iniane omwa lhuholho. 15 Obuli mundu oyukapona mulikyabu ni mwithi,* kandi munasi ngoku sihali omwithi oyuwithe engebe y’erikotha omw’iyo. 16 Omw’eki thwabiriminya olhwanzo, kundi oyo mwahayo engebe yiwe busana nethu, neryo nethu thuwithe olhukwamirwa lhw’erihayo esyongebe syethu busana n’abalikyethu. 17 Aliwe oyuwithe ebindu by’ekinyamubiri eby’ekihugho kino kandi akalhangira mulikyabo iniane omwa buyithawa aliwe akaghana erimukwira obulighe, olhwanzo lhwa Nyamuhanga ilhukendibya ilhumulimo lhuthi? 18 Baana balere, thutholere ithwakangania olhwanzo, butsira omwa binywe kutse omwa lhulimi, aliwe omwa mikolere n’omwa kwenene.

19 Busana n’eki ithukendi minya ku thuli b’ekwenene kandi ithukendi kakasya* emithima yethu embere siwe 20 okwa kyosi-kyosi ekyo emithima yethu yanga thuhandikiriramo, kundi Nyamuhanga alengire emithima yethu kandi anasi emyatsi yosi. 21 Banzwa, emithima yethu yamathendi thuhandikirira, ithuwithe obwiranda bw’erikania embere sya Nyamuhanga; 22 kandi ekyosi-kyosi ekyathukamusaba akathuhakyo, kundi thunemughendera okwa bihano biwe n’erikolha ebikamutsemesaya. 23 Ni kwenene, ekihano kiwe kyakino: athi thwikiriraye omwa lina lya Mughalha wiwe Yesu Kristo kandi thwanzane, ngoku anathuha ekihano. 24 Eryongera okw’ekyo, oyukaghendera okwa bihano biwe akasighalha inianamathikene nayu, nayu inianamathikene n’omundu oyo. Kandi erilhabira omwa mulimu ogho abirithuha, thunasi ngoku akasighalha inianamathikene nethu.