Ebaruha Okwa Banya Kolosai
3 Aliwe, mwamabya imumwalhubukibwa haghuma na Kristo, mulhole embere erisondekania emyatsi y’endatha, eyo Kristo ikere okwa byalha by’amali bya Nyamuhanga. 2 Muhweraye obulengekania bwenyu oko myatsi eyiri endatha, butsira oko myatsi eyiri okwa kihugho. 3 Kundi mumwaholha, n’engebe yenyu yabiribiswa haghuma na Kristo erimathikana na Nyamuhanga. 4 Omughulhu Kristo, engebe yethu, akendi syaminyikalibwa, neryo nenyu mukendi syaminyikalibwa haghuma nayu omwa lhukengerwa.
5 Busana n’ekyo, mwithe ebitsuku byenyu by’omubiri ebiri okwa kihugho erikwamana n’obusingiri,* obukine, esyongumbu esy’emyatsi y’engyingo esitheko eriyikakirya, eriyisunza libi, n’omururu, nagho in’iramya esyosanamu. 6 Busana n’emyatsi eyo, erihithana lya Nyamuhanga linemwasa. 7 Nenyu kumwanabya mukayithwalha muthya* omwa ngebe yenyu ya kera.* 8 Aliwe mutholere imwayilhusyako ebyosi ebi: erihiririkana, erihithana, obubi, eritsuma, n’omwa buno bwenyu isimwalhua ebinywe by’esisoni. 9 Isimwathebana. Mulhusaye omundu wakera n’emikolere yiwe, 10 kandi mwambale omundu muhya-muhya, oyukayirawa mwa muhya-muhya erilhabira omw’iminya erihikire erikwamana n’ekisosekanio ky’Oyuwamuhangika, 11 sihali Mugiriki kutse Omuyuda, oyubanibwe kutse oyuthabanibwe, omubunga, omusikite,* omukobe, kutse oyuli bwiranda; aliwe Kristo ni myatsi yosi kandi omwa byosi.
12 Busana n’ekyo, ng’abasombolhwa ba Nyamuhanga, ababuyirire kandi abanzibirwe, mwambale olhwanzo lhw’eribuya-buya olhw’eritsomana abandi, olhukeri, eriyikehya, obwolho n’erighumisirizya. 13 Mulhole embere erighumirana kandi mughanyirane ahathe eriyikukumirira nomumwangabya imwabirisoberania. Ngoku Yehova anabaghanyira ahathe eriyikukumirira, nenyu ku mutholere imwakolha muthya. 14 Aliwe eryongera okwa byosi ebi, mwambale olhwanzo kundi lhw’olhukamathanaya ndeke-ndeke haghuma omwa bughuma.
15 Kandi muleke obuholho bwa Kristo buthabale omwa mithima yenyu,* kundi mumwabirikirwa eribya omwa buholho obo omwa mubiri mughuma. Kandi muyikanganaye ng’abandu abakasima. 16 Muleke ekinywe kya Kristo k’ikale ndeke omw’inywe omwa menge wosi. Mulhole embere erikangirirya n’erihimbana* omwa syonyimbo, omw’ipipa Nyamuhanga, omwa syonyimbo sy’obunyakirimu esikimbawa omw’isima, eryimbira Yehova omo mithima yenyu. 17 Mbulha ni kyahi ekya mukakolha omwa binywe kutse omwa mikolere, mukole obuli kindu omwa lina ly’Omukama Yesu, mukasima Nyamuhanga Thatha erilhabira omw’iyo.
18 Inywe bakali bathahibwa, mughondere bira benyu, ngoku kitholere omo Mukama. 19 Inywe abiba, mulhole embere erianza bakali benyu kandi isimwabahithanako itsibulyabuhithane.* 20 Inywe baana, mwowe ababuthi benyu omwa buli mwatsi, kundi eki kikatsemesaya kutsibu Omukama. 21 Inywe bathatha, isimwaghaliranaya* abaana benyu, nuku sibabbunike muthima.* 22 Inywe baghombe, mwowe abakama benyu abandu omwa buli kindu, isi mw’omughulhu babalhangire lisa, erithanza eritsemesya abandu,* aliwe omwa muthima w’okwenene, omw’ubaha Yehova. 23 Ekyosi-kyosi ekya mukakolha, mukikole n’omuthima wosi nga mukakolera Yehova, butsira abandu, 24 kundi munasi ngoku Yehova yukendi syabaha omwandu ng’olhuhembo. Mubye bakobe b’Omukama, Kristo. 25 Ahathe erithika-thika oyukakolha nabi akendi syalihwa busana n’erikolha nabi liwe, kandi sihali kasolholho.