Ebaruha Yakabiri Okwa Banya Korinto

2 Nabirithwamu indi sinendithasyasa eyo muli erisyab’itha obulighe. 2 Kundi namab’itha obulighe, inindi oyukendi nyitsemesya athe iy’oyo n’itha obulighe? 3 Munahandika ebyo nakolha, nuku ngendi syabya ingasa, abatholere erinyitsemesya isibany’itha obulighe, kundi ngayikethere ngoku ebikanyilethera etseme nenyu inywe bosi bikabalethera etseme iyan’eyo. 4 Kundi omo malighe manene n’omw’isimba ly’omuthima munabahandikira inganemuthoghongya emisoni mingyi, isi busana n’erib’itha obulighe, aliwe erianza muminye obunene bw’olhwanzo olho ngabawithire.

5 Neryo owosi-wosi amabya iniabirikolha ekik’itha obulighe, s’ingye am’itha obulighe, aliwe iniamabw’itha inywe bosi oko lhulengo lhulebe—singanzire eribakalirya engebe omwa bya ngabugha. 6 Erikunga eryo abangyi bakaha eri litholere okwa mundu ng’oyo; 7 omwakanya k’ekyo, mumughanyire omwa lhukeri n’erimuhumulikania, nuku obulighe bunene si bumubundamiraye.* 8 Neryo, ngabahira mw’omuhwa w’erimukangania olhwanzo olhwa mumuwithire. 9 Kundi eki ky’ekyaleka inathasyabahandikira: erilebya nga munemwendi kangania ku muli bowa omo myatsi yosi. 10 Mwamaghanyira omundu wosi-wosi busana n’ekyosi-kyosi, naghe ngabya ingamamughanyira. Kundi nibya ekyosi-kyosi ekyo nabirighanyira (namabya inabirighanyira ekyosi-kyosi) kyabiribya busana nenyu embere sya Kristo, 11 nuku Sitani syathuthebaye, kundi si bugha indi sithwasi amathebo* wiwe.

12 Nabere ingahika e Troa eriyathulhughania engulhu yuwene eyihambire oku Kristo, munakyungulirwa olhuyi omo Mukama, 13 mundayowa buholho omwa muthima kundi mundabana Tito mughalha wethu. Neryo munabalhagha, namaghenda e Makedonia.

14 Aliwe ewasingya oku Nyamuhanga, oyukathusondolha mughulhu wosi omw’ilhondekana lyethu ly’erisingura ithune na Kristo kandi erilhabira omw’ithwe akalhandaghanaya akakumbo k’eriminya liwe omwa buli mwanya! 15 Kundi oku Nyamuhanga thuli kakumbo ka Kristo akuwene omwa kathi-kathi k’abakalhamibawa n’omwa kathi-kathi k’abakathoghotha; 16 okwa bakathoghotha ni kikumbo ky’olhuholho ekikakolhaya okwa lhuholho, n’okwa bakalhamibawa ni kakumbo k’engebe akakakolhaya okwa ngebe. Kandi nindi oyutholere ndeke emyatsi eyi? 17 N’ithwe, kundi sithuli ghulhaya* ekinywe kya Nyamuhanga ng’abangyi, aliwe thukabugha ithunakakasirye ng’abamathumwa na Nyamuhanga, ee, embere sya Nyamuhanga kandi ithune na Kristo.