EBIBULYO ERILHUA OMWA BASOMI

Gogi owe Magogi oyukanibweko omwa Ezekieli nindi?

Ahabw’emyaka mingyi, ebitabu byethu byabirisoborera ngoku Gogi owe Magogi ni rina eryahebawa Sitani abirithibithwako elhubulha. Erisoborera eri lyabya lithya, kundi ekitabu ky’Eribisulirwa kikakanaya oku Sitani Diabolo ng’oyukasondolha amalhwa aw’erilhwa n’abandu ba Nyamuhanga omwa kihugho kyosi. (Erib. 12:1-17) Neryo mukyalengekanibwa indi Gogi lyangabya ini rindi rina lya Sitani.

Aliriryo, ekyo mukyahulhukya ebibulyo eby’erithasya lengekaniako. Busana naki? Ng’eky’erileberyako: Erikindwa lya Gogi likabya likakanibwako, Yehova akabugha athi: ‘Nasyakuha mo kalyo okwa syonyonyi esikalire esy’emihanda yosi n’okwa syonyama esy’omoli.’ (Eze. 39:4) Kandi Yehova akongerako athi: ‘Okwa kiro ekyo nasyaha Gogi ah’eritha abandu omwa Israeli. N’aho basyatha Gogi n’endeko yiwe yosi.’ (Eze. 39:11) Aliriryo ekihangikwa ky’ekirimu kyangalibwa kithi ‘n’esyonyonyi n’esyonyama sy’omoli’? Sitani anga tsikirwe athi okwa kihugho? E Biblia yikakanganaya ndeke-ndeke ngoku Sitani akendi syaghuswa omwa buhya obuthawithe kabuno habw’emyaka 1,000​—syendi syalibwa kutse eritsikwa.​—Erib. 20:1, 2.

Thukyasi ngoku Sitani akendi syaboholhwa emyaka 1,000 yabihwa, kandi ‘asyahulhuka eritheba ebihanda ebiri omwa kihugho kyosi, Gogi na Magogi. Sitani asyahindaniabyo omwa malhwa.’ (Erib. 20:8) Sitani angathebya athi Gogi kandi iyana Gogi? Kwesi, obuminyereri obuli omwa Ezekieli n’Eribisulirwa sibulimanyisaya Sitani bukakania oku Gogi.

Neryo kwesi, Gogi owe Magogi nindi? Eribana eky’erisubirya, thutholere ithwasekulya omwa Masako erilebya nga nindi oyukendi syabambira abandu ba Nyamuhanga. E Biblia siyiri kanaya okw’ibambirwa na ‘Gogi owe Magogi’ lisa aliwe yikakanaya n’okw’ibambirwa ‘n’omwami ow’elhuthambi lhw’endatha’ n’okw’ibambirwa ‘n’abami b’ekihugho.’ (Eze. 38:2, 10-13; Dan. 11:40, 44, 45; Erib. 17:14; 19:19) Mbwino eribambirwa eri likendi syabya okwa buthuku muthina-muthina? Kwa kithe kithya. Ahathe erithika-thika e Biblia yikakanaya okw’ibambirwa lighumerere omwa mena muthina-muthina. Busana naki ithwabugha thuthya? Kundi Amasako akathubwira athi ebihanda byosi by’ekihugho bikendi syasangira omw’ibambira ly’erighunzerera erikendi syakolya okwa Harmagedoni.​—Erib. 16:14, 16.

Thwama hamba-hambania Amasako wosi aya awahambire okw’ibambirwa ly’erighunzerera okwa bandu ba Nyamuhanga, kikalhua ikyalhangirika ngoku erina Gogi owe Magogi, si Sitani, aliriryo ni bihanda ebiyiyungire haghuma. Mbwino ebihanda ebi bikendi syasondolhwa ‘n’omwami w’elhuthambi lhw’endatha’? Ekyo sithwanga kikakasya. Aliriryo kyanganabya kithya erikwamana n’ebya Yehova akabugha oku Gogi athi: ‘Nawu wasyalhua aha wawu omwa bihanda by’enduli y’elhuthambi lhw’endatha, iwe n’ebihanda bingyi haghuma nawu, abosi abali okwa syosabayiri, endeko nene n’omulhondo w’amaaka w’abasirikali.’​—Eze. 38:6, 15.

Kuthya n’omuminyereri Danieli, oyuwabyaho omwa buthuku bughuma na Ezekieli, akabugha bino okwa mwami w’elhuthambi lhw’endatha: ‘Esyongulhu esikalhua ebwanga bw’endatha n’ebwanga bw’elhuthambi lhw’endatha syasyahanga-hangya omuthima wiwe, neryo asyahulhuka n’erihithana linene, eriherya n’er’itha abandu bangyi. Neryo asyahanda amahema w’ekikali kiwe omwa kathi-kathi k’engetse n’Ekithwe Kibuyirire kibuya. Nikwa asyahika oko nduli yiwe, isihali mundu wasyamuwathikya.’ (Dan. 11:44, 45) Eki kihamba-hambene ndeke n’ebya kitabu kya Ezekieli kikabugha okwa bya Gogi akakolha.​—Eze. 38:8-12, 16.

Ni kindi kyahi ekikakwamako eribambirwa eri lyabiribya? Danieli akathubwira athi: ‘Nikwa okwa mughulhu oyo, omunya-mwami mukulhu ya Mikaeli [Yesu Kristo] oyukatheghaya abandu benyu [eritsuka 1914] asyahangana [okwa kiro kye Harmagedoni]. Neryo hasyabya endambi y’obulighe [obulighe bunene] obuthe bwathabya eritsuka omughulhu ekihanda kyatsuka, n’erihika okwa mughulhu ono; kandi okwa mughulhu oyo abandu benyu basyalhamibwa, obuli mundu oyukabanika iniabirisakwa omwa kitabu.’ (Dan. 12:1) Ekya Yesu, omwimaniri wa Nyamuhanga akakolha eki kinakanganibwe n’omwa Eribisulirwa 19:11-21.

Neryo ibbwa “Gogi na Magogi” oyuli omu Eribisulirwa 20:8 nindi? Okw’irengesibwa ly’erighunzerera, emyaka 1,000 yikahwa, abandu abakendi syayisamambulha oku Yehova bakendi syakangania emibere y’obwithi eyiri ng’eya ‘Gogi owe Magogi,’ oyuwasibwe ng’ebihanda ebikabambira abandu ba Nyamuhanga okw’ihwererera ly’obulighe bunene. Esyogurupu esyosi ibiri sikendi syahikwako kino: Erithoghothibwa kera na kera! (Erib. 19:20, 21; 20:9) Neryo kwesi kyangabya ikihikire erighunzerera thuthi “Gogi na Magogi” b’abosi abakendi syayisamambulha okw’ihwererera ly’Emyaka Rukumi.

Ithwe ng’abigha be Biblia abakasamalira emyatsi ya ndeke, thulindirire erisyaminya nga nindi oyukendi syaminyikalha ‘ng’omwami w’elhuthambi lhw’endatha.’ Nomwakine indi sithwasi nga nindi oyukendi syasondolha eriyiyunga haghuma ly’ebihanda, thunasi ebindu bibiri bino: (1) Gogi owe Magogi n’abalhwi biwe bakendi syakindwa n’erithoghothibwa; ne (2) Omwami wethu Yesu Kristo, oyunemuthabalha na lino, akendi syalhamya abandu ba Nyamuhanga n’eribingirya omwa kihugho kihya-kihya eky’obuholho n’obwiranda obw’okwenene.​—Erib. 7:14-17.