Yehova Akahemba Abakamusonda-sonda

1, 2. (a) Olhwanzo n’erikirirya bihambene bithi? (b) Thukendi kania okwa bibulyo byahi?

THWANZIRE Yehova “kusangwa . . . mwatsuka erithwanza.” (1 Yn. 4:19) Ng’enzira nguma y’erikangania olhwanzo lhwiwe, Yehova abirithwamu eritsumulha abaghombe biwe abathaleghulha. Thukabya thukongera eryanza Nyamuhanga wethu, n’erikirirya lyethu ku likanayongera lithya, butsira busana n’erithabya inialiho, aliwe kundi akatsumulha abo anzire.—Soma Abaebrania 11:6.

² Erihemba, ni kighuma ky’okwa mibere eya Yehova awithe kandi ikyabya kighuma ky’okwa by’akakolha. Erikirirya lyethu irikindibya isirilhuyirirene thwamabya isithuyikethere n’eriminya kundu ngoku Nyamuhanga akendi syahemba abakamusonda-sonda n’omuhwa kundi “erikirirya n’iminya kundu emyatsi eyo thukahira kw’amaha.” (Ebr. 11:1) Omwa kwenene, erikirirya mwamuli n’eriligha ndeke-ndeke ngoku ebya Nyamuhanga abirilhagha bikendi syabya. Aliwe, eribya n’amaha w’erisyahembwa kikathughasira kithi? Yehova abirihemba athi abaghombe biwe abakera n’abamunabwire? Thulebaye.

YEHOVA AKAYILHAGHA ERITSUMULHA ABAGHOMBE BIWE

3. Omu Malaki 3:10 muli mulhaghe wahi?

³ Yehova abiriyilhagha erihemba abaghombe biwe bathaleghulha, ky’ekikaleka iniathubwira athi thusimbirire emighisa yiwe. E Biblia yithi: ‘Munyilenge lino omw’eki, Omwami Mukulhu w’emilhondo athya, nga singendi syabakyungulira amadirisa w’elhubulha n’erib’uthulirako omughisa, isihangathasyabanika obwagha.’ (Mal. 3:10) Thukakanganaya nethu ngoku thukasima ekihembo ekyo omw’ikirigha n’erikolha ngoku amabugha.

4. Busana naki thutholere ithwayikethera ebya Yesu abugha omu Matayo 6:33?

⁴ Yesu mwalhaghanisya abigha biwe athi bamahira Obwami bw’embere, Nyamuhanga iniakendi basighika. (Soma Matayo 6:33.) Yesu erilhaghanisya inianakakasirye athya, abya inianasi ngoku Yehova ni muyiketherwa eritsuka kera. Yesu abya inianasi ngoku emilhaghe ya Nyamuhanga siyiribya yithethabererera. (Isa. 55:11) Nethu thutholere ithwayikethera ngoku thwamabya n’erikirirya omu Yehova, akendi berererya omulhaghe wiwe ono, athi: “Singendisyakuleka na kera, kandi singendi syakusighania nahake.” (Ebr. 13:5) Ithwangana hambania ebinywe ebyo n’ekya Yesu abugha eky’eritsuka erisondya Obwami n’erithunganene lya Nyamuhanga.

5. Busana naki ekya Yesu asubiraya Petero kikaghumaya erikirirya?

⁵ Omukwenda Petero mwanabulya Yesu athi: “Lebaya ithwe thwabirisigha ebyosi, thwamakukwama, nikwa thwasyabanaki kwehi?” (Mt. 19:27) Omwakanya k’eritsweba Petero, Yesu mwabwira abigha biwe athi bakendi syahembwa busana n’eriyihayo lyabu. Abakwenda abathaleghulha abo, n’abandi bakendi syathabalha na Yesu omwa lhubulha. Na lino hane emighisa eya thukabana. Yesu mwabugha athi: “N’obuli mundu oyuwabirisigha amanyumba, kutse baghalha babu, kutse bali babu, kutse ise, kutse nyinya, kutse abaana kutse ebithaka busana naghe asyabanabyo ngendo ighana, kandi asyahebwa engebe y’erikotha.” (Mt. 19:29) Abigha biwe bangabwene emighisa eyilengire kutsibu ebyo bangayithalyako busana n’eriyihayo. Mbwino sithwanga ligha ngoku abathatha, abamama, baghalha bethu na bali bethu, n’abaana ab’obunyakirimu balengire kutsibu ebyo thwabiriyithalyako busana n’Obwami?

AMAHA AWAKASIKAYA EMITHIMA

6. Ni kyahi ekikaleka Yehova iniayilhagha erihemba abaghombe biwe?

⁶ Yehova eribya iniabirilhaghanisya erihemba abaramya biwe, kikabawathikaya omughulhu bakabana ebikalenga okwa buthaleghulha bwabu. Eryongera okwa mighisa eyo baghombe ba Yehova banemubana munabwire, banalindirire ibbwa n’eyilhabire okw’aho obuthuku obukasa. (1 Tim. 4:8) Ni kwenene, eribya ithunasi ndeke Yehova “kw’akahemba abakamusonda-sonda” ikikendi leka ithwaghuma omw’ikirirya.—Ebr. 11:6.

7. Amaha angana kolha athi ng’enanga?

⁷ Omwa Mukania wiwe w’Okwa Kithwe, Yesu mwabugha athi: “Mutseme, mutsange kutsibu, kusangwa olhuhembo lhwenyu ni lhungyi elhubulha, ko ban’endereraya bathya abaminyereri ababya embere syenyu.” (Mt. 5:12) Eryongera oko maha w’erisyaghenda elhubulha, amaha w’erisyabyaho kera na kera omwa paradiso nawu akaletha etseme n’eritsanga kutsibu. (Esy. 37:11; Lk. 18:30) Mbulha thuli b’erisyaghenda elhubulha kutse b’erisyabya okwa kihugho, amaha agho thuli nagho anganabya ng’ekindu ‘ekikasikaya emithima yethu,’ kundi ni w’ekwenene kandi asikire. (Ebr. 6:17-20) Ng’enaanga eyikasikaya obwathu nuku sibusegha-seghane omwa kiyagha, amaha wethu awasikire aw’erisyahembwa angana thuwathikya erisika, ithwathunga amaaka w’erighumira ebitsibu.

8. Amaha awithe athi amaaka w’erikehya amaghaniryo?

⁸ Amaha wethu awaseghemere okwa Biblia anawithe amaaka w’erikehya amaghaniryo. Emilhaghe ya Nyamuhanga yikakolha ng’ehibatsi hy’obunyakirimu ehikahumulikanaya emithima yethu eyiri mw’erihangya-hangya. Ka kikahumulikanaya eribya ithwangana ghusira Yehova y’amalighe wethu, ithunasi kw’akendi thuwathikya! (Esy. 55:22) Thutholere ithwayikethera ngoku Nyamuhanga awithe “obuthoki bw’erikolha ebyosi ebyo thukabulhaya kutse ebyo thukalengekanaya.” (Efe. 3:20) Thalengekania okw’ekyo—sihathabugha hathi awithe obuthoki bw’erikolha ebya thukabulhaya, aliwe hathi awithe obuthoki bw’erikolha ebyosi ebya thukabulhaya!

9. Thwanga yikethera thuthi emighisa ya Yehova?

⁹ Erithoka erisyahembwa, thutholere ithwabya n’erikirirya erighumire omu Yehova n’erighendera okwa busondoli bwiwe. Musa mwabwira Abaisraeli athi: “Omwami Mukulhu asyabatsumulha kwenene omo kihugho ekyo akabaha eribya mwandu, ogho mukasighalhaya, ekighuma mwamahulikirira n’omuhwa omulenge w’Omwami Mukulhu Nyamuhanga wenyu, erikenga erihana lyosi eri erya ngabahana munabwire. Kundi Omwami Mukulhu Nyamuhanga wenyu asyabaha omughisa ngoku abalhagha.” (Ebi. 15:4-6) Wunayikethere kutsibu ngoku Yehova akendi kutsumulha wamalholha embere erimukolera buthaleghulha? Sihali ekyanga leka iwuthathunga eriyikethera eryo.

YEHOVA MWABAHEMBA

10, 11. Yehova mwahemba athi Yozefu?

¹⁰ E Biblia yahandikawa busana n’erithughasira. Muli emyatsi mingyi eyikakanganaya ngoku Nyamuhanga mwahemba abaghombe biwe bathaleghulha. (Abar. 15:4) Yozefu abya mughuma w’okw’ibo. Busana na baghalha babu erimughoberya, na mukali wa Potifari erimuhira kw’amabehi, mukyaleka iniabanika omwa ngomo ye Misiri. Ekyo mbwino mukyana mubisa oku Nyamuhanga wiwe? Eyihi nahake! “Omwami Mukulhu mwabya haghuma na Yozefu, mwamukangya erighanyira liwe . . . Omwami Mukulhu abya haghuma na Yozefu. Ebyosi akolha, Omwami Mukulhu mwatsumulhabyo.” (Enz. 39:21-23) Omwa bitsibu ebyosi ebyo, Yozefu mwayikethera Nyamuhanga.

¹¹ Habere halhaba myaka mirebe, Farao mwalhusya Yozefu y’omwa ngomo, n’eriha omughombe mwolho oyu y’ekitsumbi ky’eribya wakabiri oko muthabali we Misiri. (Enz. 41:1, 37-43) Mukali wiwe abere amubuthira abaghalha babiri, “Yozefu mwalhuka erina ly’akambere mo Manase, kusangwa abugha athi, ‘Nyamuhanga abirileka inibirirwa erinuba lyaghe lyosi, n’ekithunga kya thatha waghe kyosi. Neryo mwalhuka akambale mo Efraimu, kusangwa athi, Nyamuhanga abirinyikanyirirya omo kihugho ky’obulighe bwaghe.” (Enz. 41:51, 52) Kundi Yozefu mwabya muthaleghulha oku Nyamuhanga, Yehova mwamuha omughisa owaleka esyongebe sy’ab’enyumba ya Yakobo n’esy’Abanya Misiri isyalhama. Aliwe Yozefu mwaminya ngoku Yehova yuwamuhemba n’erimutsumulha.—Enz. 45:5-9.

12. Yesu mwasighalha athi muthaleghulha omw’irengwako?

¹² Na Yesu Kristo kw’anakanganaya athya obuthaleghulha oku Yehova omw’irengwako, mwahembwa. Ni kyahi ekya muwathikya erighuma? Ekinywe kya Nyamuhanga kikabugha kithi: ‘Mwayiyinia okwa muthi, abya asi obutseme obwasyabya bwiwe, kandi mwathalebya esisoni syagho nga kindu.’ (Ebr. 12:2) Mukyatsemesya Yesu eribya imwaleka erina lya Nyamuhanga iryabya libuyirire. Kandi Yesu mwahembwa omw’isimwa na Thatha wiwe n’eyindi mighisa mingyi. E Biblia yikathubwira yithi lino “ikere okwa lhuhandi lhw’amali lhw’ekithumbi ky’Obwami kya Nyamuhanga.” Kandi yikabugha yithi: “Kyaleka Nyamuhanga inamuhamya kutsibu n’erimuha erina erilhabire awandi mena.”—Fil. 2:9.

YEHOVAH SYALIBIRIRAWA EBYO THUKAKOLHA

13, 14. Yehova akayowa athi okwa bya thukamukolera?

¹³ Thutholere ithwayikethera ngoku Yehova akasima obuli kaghalha akathukahiraho erimukolera. Akayitheghereraya eriyilhalikirira lyosi-lyosi erya thwangabya nalyo. Akathukwira obulighe thwamabya n’ebitsibu by’esyosente kutse amaghalha, kutse eriyowa lyethu, byamabya nga byamathulemesya erimukolera. Kandi ithwangana yikethera ndeke ngoku Yehova atsomene eby’abaghombe biwe bakakolha bakanza erisighalha bathaleghulha okw’iyo.—Soma Abaebrania 6:10, 11.

¹⁴ Ambi iwibuka ngoku thwangana kania na Nyamuhanga oyukasubiraya emisabe n’eriyikethera ngoku akendyowa ekiriro kyethu. (Esy. 65:2) “Thatha w’erighanyira na Nyamuhanga w’erikirania lyosi” akendi thuwathikya bunyakirimu n’erithuhumulikania ahathe eriyikukumirira, obundi ng’erilhabira omwa baramya balikyethu. (2 Kor. 1:3) Kikatsemesaya omuthima wa Yehova omughulhu thukatsomana abandi. ‘Oyukaghanyira abera akabweka Omwami Mukulhu, Akendi syamuthuha omubiiri wiwe uwene.’ (Emi. 19:17; Mt. 6:3, 4) Neryo thwamawathikya abali omwa bitsibu, Yehova akakithwalha nga thwamamubweka. Kandi akayilhagha athi akendi syahemba omuthima oyo.

ERIHEMBWA LINO N’ERIHIKA KERA NA KERA

15. Ni lhuhemboki olhwa wulindirire kutsibu? (Lebaya ekisasani ekiri okw’itsuka.)

¹⁵ Abakristayo abahakabibwa bakasikira oko maha w’erisyabana ‘embitha y’erithunganene, ey’Omukama, Omutsweri oyuthunganene asyabaha oko kiro ekyo.’ (2 Tim. 4:7, 8) Iwe Nyamuhanga amabya iniakuhere awandi maha, sikirimanyisaya kithi syathakuhemba ndeke. Esyomiliyoni ‘sy’ab’esindi mbuli’ banalindirire n’omuhwa munene erisyabana olhuhembo lhw’erisyabya n’engebe y’erikotha okwa kihugho paradiso. Kandi omwa kihugho ekyo, “basyayitsemera omwa buholho bunene.”—Yn. 10:16; Esy. 37:11.

16. Ebiri omu 1 Yoane 3:19, 20 bikathuhumulikanaya bithi?

¹⁶ Ihanganayira ithwaghaya ebya thukakolera Yehova, kutse ithwayowa nga syanga tsemera akaghalha akathukahiraho. Nibya ithwangana yowa nga sithutholere lhuhembo lhwosi-lhwosi. Aliwe thutholere ithwabya ithun’ibukire ngoku “Nyamuhanga ni mukulhu, alengire emithima yethu kandi asi emyatsi yosi.” (Soma 1 Yoane 3:19, 20.) Akahemba ekyosi-kyosi ekikakolhawa omwa mubiiri wiwe busana n’erikirirya n’olhwanzo, oyukakikolha nomwangabya inianakighayire.—Mk. 12:41-44.

17. Ni mighisa yahi eya thunawithe na munabwire?

¹⁷ Nibya n’omwa biro by’enyuma-nyuma ebitsandire kutsibu bino ebithaberweko na Sitani, Yehova anemutsumulha abandu biwe. Akalhangira athi abaramya biwe ab’okwenene bakabya ibane ndeke omwa paradiso yabu y’obunyakirimu eyitsoghire mw’ebyalya by’obunyakirimu. (Isa. 54:13) Ngoku Yesu analhaghanisaya, munabwire Yehova abirithuhemba omw’ithuha akaghisa k’eribya omw’ihika eriri mw’olhwanzo, ery’abaghalha bethu n’abali bethu b’obunyakirimu omwa kihugho kyosi. (Mk. 10:29, 30) N’ekindi, abakasonda-sonda Nyamuhanga bakahebawa olhuhembo olhulengethukire, olhw’eribya n’obulengekania obuthekene, eritsemera ebya bawithe, n’obutseme.—Fil. 4:4-7.

18, 19. Abaghombe ba Yehova bakayowa bathi busana n’emighisa eyo bakabana?

¹⁸ Abaghombe ba Yehova omwa kihugho kyosi bakaligha ngoku Yehova akabya inianemubahemba. Ng’eky’erileberyako, Bianca owe Germany akabugha athi: “Ngasima Yehova isingwithe busubuliro busana n’erinyiwathikya omwa maghaniryo waghe n’eribya okwa lhuhandi lhwaghe obuli kiro. Omwa kihugho muswire akatabanguko, kandi kyabiritsanda. Aliwe omw’ikolha haghuma na Yehova, ngayowa ingali omwa butheya bw’ebyalha biwe. Ngabya namayihayo mw’imukolera, akamba mighisa mingyi.”

¹⁹ Kutse thalengekania oku Paula ow’emyaka 70, owe Kanada oyuli n’obulhwere obukalire obw’erikuha ly’omughongo obwa spina bifida. Akabugha athi, “Eribya isinanga thoka erighenda, sikirimanyisaya kithi sinanga thoka erithulira. Ngakolesaya eyindi mibere y’erithulira, ng’erithulira okwa simu n’erya kitsumbukirania. Busana n’eryanza eribya inganemuyighumya bunyakirimu, nganawithe akatabu omwa ngahandika amasako n’emyatsi erilhua omwa bitabu byethu eyo ngabera erilebya nuku yinyighumaye. Nabirikalhuka mwa ‘Akatabu k’Omulhamu Waghe.’ Ebikalhuhaya omuthima bikalindawa ibyahwa thwamahira amalengekania okwa bya Yehova abirithulhagha. Yehova akabya inianayitheghekire erithuwathikya omwa mibere yosi-yosi eya thwangabyamu.” Obundi iwe emibere eya wulimu si yiri ng’eya Bianca na Paula. Aliwe nawu wangan’ibuka ngoku Yehova abirikuwathikya n’abandi abawasi. Ka kyangabya kibuya erilengekania okwa syonzira esya Yehova anemukuhera mw’emighisa lino, kandi ngoku akendi syakuhemba n’omwa buthuku obukasa!

20. Thukendi syabanaki thwamalholha embere erikolera Yehova n’omuthima wosi?

²⁰ Isiwibirirawa ngoku Nyamuhanga akendi syakuha “olhuhembo lhunene” busana n’emisabe yawu eyikalhua okwa muthima n’eribugha ebyosi ebiri omwa muthima. Wutholere iwayikethera ngoku wamabirikolha ‘erisonda lya Nyamuhanga, iwukendibana ebyo Nyamuhanga alhagha.’ (Ebr. 10:35, 36) Neryo kwesi, ka thulhole embere erighumya erikirirya lyethu n’erikolera Yehova n’omuthima wosi. Eki ithukendi kikolha ithunasi ngoku Yehova yukendi syathuhemba.—Soma Abanya Kolosai 3:23, 24.