Kolesaya Obuthuku Bwawu bwa Ndeke Omwa Mubiiri w’Erithulira
1 Ahathe erithika-thika thuwithe omubiiri munene ow’Obwami ow’erikolha, aliwe endambi eyisighereyo ni nge. (Yn. 4:35; 1 Kor. 7:29) Thwamahira h’emitheghekere eyuwene n’erisangwa thwa yithegheka, ithwangana kolesya ndeke obuthuku obwa thwabirihiraho busana n’erithulira.
2 Wubye Iwuna Yitheghekire: Wuthe wa ghenda omwa muhindano ow’eriyathulira, lhangira wuthi wune n’ebitabu ebya wukendi yithagha n’eryibuka ebinywe ebya wukendi bugha wukabighaba. Omusabe ow’erihinda omuhindano akendibya akahwamu, kwa wunaghende wuthya omwirima. Eki kikendi leka iwe n’abawukakolha nabo imwakolha bingyi omwa buthuku obwa mukendi ghunza omwirima.
3 Wamabya iwabiri hebwa olhusunzo olhw’erisondolha omuhindano ow’eriyathulira, tsuka gho endambi yikanahika. Omuhindano atholere iniabya omwa bikuhi—butsira erilhaba okwa syodakika 10 erihika 15. Wuthe wabugha wuthi baghende, lhangira wuthi obuli mundu anasi ng’akendi kolha nandi n’aha bakendi kolera.
4 Imune omw’Ithulira: Omuhindano ow’eriyathulira akendibya akanahwamu, siwuyithimba-thimbaye, aliriryo ilhua wughende omwa bulhambu obwa mukaya thuliramu. Wamabya iwanzire erilhuayo lhuba, obundi wangana hira h’emitheghekere yawu ey’erisubulha nuku siwuleke abandi bakalhuayo lhuba. Mwamabya imukakolha banene, wutholere iwaleghana abandi abangabya ibakulindire erighunza omukania. Ekyo mwangabya imwamuli erikolesya amenge erisighania omundu oyuwithe esyambaka kutse erihira h’emitheghekere ey’erisuba eyiri oyukanzisibawa.—Mt. 10:11.
5 Wukasubayo, wangana yitheya okwi ghenda olhughendo lhuli-lhuli omw’itsuka erihika okw’abali omwa bulhambu bughuma wuthe wa ghenda omwa bundi. Kyangana yithaghisya eritsuka eritherera abandi b’esimu eriminya nga wune mwendi b’eyayo. (Emi. 21:5) Wamabya iwukalengekanaya eribya iwukendi kania omwatsi munene n’omundu, imwangana hira h’emitheghekere erilhangira indi abawukakolha nabu bakabya ibane muthulira hakuhi-hakuhi kutse ibasuba eyiri abandu aba babana.
6 Thuli omwa buthuku obw’erighesa linene ery’obunyakirimu. (Mt. 9:37, 38) Omubiiri oyu akisiya iniahwa. Busana n’ekyo, eriyisunza lyethu litholere iryabya iry’erikolesya obuthuku bwethu bwa ndeke omwa mubiiri w’erithulira.