Ngoku Emisabe Yanga Kuwathikya

Pamela abere abirilhwalha obulhwere obukalire, mwasaba dokita y’obuwathikya. Aliwe kandi mwasaba na Nyamuhanga y’akaghalha k’erighuma. Omusabe mwanamuwathikya?

Pamela akabugha athi, “Omwa buthwanire bw’ekansa yaghe, mughulhu mungyi iningabya omwa buba bunene. Aliwe iningabya ingasaba Yehova Nyamuhanga, iningathekana kandi ingathoka erighuma. Ngakinawithe obulhumi obuthehwa, aliwe erisaba likaleka ingabya n’amalengekania awatholere. Abandu bakabya bakanyibulya nga ngayowa indi, ngabugha indi, ‘Nganalhwere aliwe nganatsemire!’”

Nomwabine, sithutholere thukalinda eritsuka eribana ekitsibu imuthwasaba. Ithwe bosi thukabana ebitsibu, ebinene-binene n’ebike-bike, kandi mughulhu mungyi thukayithagha obuwathikya bw’eribighumira. Mbwino erisaba lyangana wathikya?

E Biblia yikabugha yithi: “Wughusire Omwami Mukulhu y’amalighe wawu, nayu akendi kuhanganira; Syendi syaleka omundu mubuya akakindwa na kera.” (Esyonyimbo 55:22) Eki ka kikahumulikanaya! Neryo kwesi erisaba lyanga kuwathikya lithi? Wamasaba Nyamuhanga omo nzira eyitholere, iniakendi kuha ebyawukayithagha erighumira ebitsibu byawu.—Lebaya akasanduko “Ekyo Emisabe Yanga Kukolera.”

Ekyo Emisabe Yanga Kukolera

Erithekana

“Omo buli mwatsi mubwire Nyamuhanga obwagha bwenyu. . . . N’obuholho bwa Nyamuhanga, obulhabire amenge wosi, bwasyatheya emithima yenyu n’amaghaniryo wenyu omw’isi wa Kristo Yesu.” (Abanya Filipi 4:6, 7) Wamabwira Nyamuhanga y’amaghaniryo wawu, iniakendi kuwathikya eribya iwunathekene n’eribya n’amenge awanga kuwathikya.

Amenge erilhua oku Nyamuhanga

“Nikwa hamabya omundu omo kathi-kathi kenyu oyukabulha amenge, abulhaye Nyamuhanga oyukaha ndeke oko bandu bosi butsira buhemu; neryo omundu oyo asyahabwa amenge ayo.” (Yakobo 1:5) Omughulhu thuli omwa maghaniryo, mughulhu mungyi thukathwamu nabi. Wamasaba amenge, Nyamuhanga iniangana kwibukya emisingyi mingyi eyikawathikaya eyiri omwa Kinywe kiwe, e Biblia.

Akaghalha n’erihumulikana

“Omo byosi ngwithe amaaka busana n’oyukamba amaaka.” (Abanya Filipi 4:13, NW) Kundi Nyamuhanga ni muthoki w’ebyosi, anganakuha akaghalha ako wukayithagha erighumira ebitsibu byawu kutse erikulhabya mubyo. (Isaya 40:29) E Biblia kandi yikahulha Yehova mwa “Nyamuhanga w’erikirania lyosi.” Angana thuhumulikania “omo malighe wethu wosi.”—2 Abanya Korinto 1:3, 4.