Mwibuke Muka Loti

Loti abya ikere na Abrahamu, somukulhu wiwe, omwa kihugho kye Kanana. Erighunzerera, Abrahamu na Loti mubabya n’ebisoro binene indi habya isibakiwithe ekithaka ekikaghunza eky’eribirisiryamu. Abrahamu mwabwira Loti athi: ‘Sithwanga thasyikalha omwa kitsweka kighuma. Ngakusaba wusombole ekitsweka ekya wanzire iwayamu, naghe ngendi ghenda omwa kindi.’ Abrahamu iyo isyali yitsomana iyuwene, kwa bithe?

Loti mwalhangira ekitsweka ekyuwene eky’ekihugho ekyo hakuhi n’etawuni eyikahulhawamu Sodomo. Yabya amaghetse manene n’omuyonga. Neryo mwasombolha ekitsweka ekyo, amahumirayo n’eka yiwe.

Abandu be Sodomo n’ab’omwa yindi tawuni eya hakuhi eye Gomora babya babi kutsibu. Erithwalira haghuma, babya babi kutsibu indi Yehova mwathwamu erithoghothya esyotawuni ibiri esyo. Aliwe Nyamuhanga aby’anzire erilhamya Loti n’ab’eka yiwe, neryo mwathuma abamalaika biwe eriyabakunga bathi: ‘Mwanguhe! Mulhue omwa tawuni eno! Yehova akayathoghothayayo.’

Loti mwathalhuaho akaghenda. Mwayithimbya-thimbya. Neryo abamalaika mubathwalha Loti, mukali wiwe, n’abali biwe babiri ibanabahambire oko byalha, eribanguhya erilhua omwa tawuni eyo, ibanemubugha bathi: ‘Muthibithe! Mulhamaye engebe yenyu, kandi isimwakebera enyuma. Mwamakeba, imukendi holha!’

Babere bahika omwa tawuni eyikahulhawamu Zoari, Yehova mwawisya embulha y’ekibiriti n’omuliro oko Sodomo na Gomora. Esyotawuni ibiri esyo musyathoghothibirwa ighuma. Erithendiowa Yehova mulyaleka muka Loti iniakebera enyuma neryo mwahinduka mwa kighugha ky’omunyu! Aliwe Loti na bali biwe mubalhama kundi mubowa Yehova. Kyangabya imukyabitha obulighe muka Loti erithendiowa. Aliwe mubatsema busana n’eribya imubaghondera obusondoli bwa Yehova.