3 Thutholere Ithwasaba Thuthi?

BIKABYA bikahika okw’isaba, amadini mangyi akahira omuwatho okwa bindu nga bino: ngoku wutholere iwayitheka wukasaba, ebya wangabugha, n’amakinga w’edini. Nomwabine, e Biblia yikathuwathikaya erithendihira amalengekania w’okw’ebyo, aliwe erihiragho okwa kibulyo kikulhu kino, “Thutholere ithwasaba thuthi?”

E Biblia yikakanaya okwa baghombe ba Nyamuhanga bakasaba omwa myanya mingyi n’eriyitheka omwa mibere eyithasosene. Ibakasaba bukuthu kutse omwa mulenge owakowika erikwamana n’emibere eyo balimo. Ibakasaba ibanasamalire omo kyanya kutse ibanunamire. Omwakanya k’erikolesya ebisosekanio, ebikwangyi, kutse ebitabu by’emisabe bakasaba, ibakakwama kyasaba omwa binywe byabu erilhua okwa muthima. Ni kyahi ekyaleka Nyamuhanga iniabya akowa emisabe yabu?

Ngoku kiri omo mwatsi w’ahanyuma, ibakasaba Nyamuhanga mughuma musa​—Yehova. Hane eyindi nzumwa eyaleka Nyamuhanga iniowa emisabe yabu. Thukasoma omu 1 Yoane 5:14, hathi: ‘Eki kikaleka ithwasika embere sya Nyamuhanga, kusangwa thwamabulya kindu omw’isonda liwe, akathowa.’ Emisabe yethu yitholere iyahambangana n’erisonda lya Nyamuhanga. Ekyo kikamanyisayaki?

Erisaba erikwamana n’erisonda lya Nyamuhanga, thutholere ithwaminya erisonda liwe nga ly’eryahi. Neryo erigha e Biblia, ni kitsweka kikulhu omwa musabe. Mbwino eki kikamanyisaya kithi Nyamuhanga iniakendi ghana eriowa emisabe yethu thwamabya isithuli basomi be Biblia? Eyihi, aliwe Nyamuhanga anzire ithwaminya erisonda liwe, erianza eriminyalyo n’erighendera kulyo. (Matayo 7:21-23) Thutholere ithwasaba erikwamana n’ebya thuk’igha.

Thukabya thukongera erigha oku Yehova n’erisonda liwe, erikirirya lyethu likongera​—nakyo iky’ekindi kundu kikulhu omwa musabe. Yesu mwabugha athi: ‘Emyatsi yosi eyo mukabulhaya omw’isaba, imukikiriraya, mwasyabanayo.’ (Matayo 21:22) Erikirirya si kwamana kya ligha ebya bandi bakabugha. Omwakanya k’ekyo, kikamanyisaya eriligha ekindu nomukyangabya isikirilhangirawa, aliwe ihane obwema obughumire obukakanganaya ku kineho. (Abaebrania 11:1) E Biblia muswire obwema obukakanganaya ngoku Yehova, oyo thuthelhangira, aneho, ku ni muyiketherwa, kandi kwanzire erisubirya emisabe y’abakamwikiriraya. Eryongera okw’ekyo, mughulhu wosi ithwangana saba Yehova thuthi akanyaye erikirirya lyethu, kandi Yehova anzire erithuha ebya thukayithagha.​—Luka 17:5; Yakobo 1:17.

Hano hane ekindi kindu kikulhu ekihambire okw’isaba. Yesu mwabugha athi: “Sihali mundu oyukahika oku Thatha waghe athe kwingye.” (Yoane 14:6) Neryo Yesu ya nzira eyikathuhikaya oku Thatha, Yehova. Kwesi ky’ekyaleka Yesu iniabwira abigha biwe athi ibasaba omwa lina liwe. (Yoane 14:13; 15:16) Ekyo sikirimanyisaya kithi thutholere ithwasaba Yesu. Omwakanya k’ekyo, thukasaba omo lina lya Yesu, ithun’ibukire ngoku Yesu yukaleka ithwathoka erihika oku Thatha wethu oyuhikene kandi oyubuyirire.

Buthuku bughuma abakwenda ba Yesu mubamubulya bathi: “Mukama, wuthukangiriraye erisaba.” (Luka 11:1) Kilhangirikire ngoku sibabya bakamubulya eribakangirirya ebya thwamabirikaniako ebi. Okwenene kuli kuthi babya ibakanza eriminya ebya batholere ibahira omo misabe yabu​—ni bugha ambu, babya ibakabugha bathi, ‘Thutholere ithwasabaki?’