Thulhughanaya Emibiiri Yuwene eya Yehova
1. Ekikaleka ithwa thulhughania emibiiri mibuya eya Yehova niki?
1 ‘Obukulhu, n’obuthoki, n’olhukengerwa, n’erikinda, n’erikengwa, ni byawu iwe Mwami Mukulhu; kusangwa ebyosi ebiri omwa lhubulha n’ebiri omwa kihugho ni byawu.’ (1 Emy. 29:11) Ithwe erianza Yehova n’erimusima kikathuhamba kwa kithi? Kikaleka ‘ithwa kangya emibiiri mibuya ya Nyamuhanga oyuwathubirikira erilhua omwa mwirima n’er’ingira omwa kyakakalha eky’eriswekera.’ (1 Pet. 2:9) Sithwanga leka eribwira abandi oku Nyamuhanga wethu! Thukendi bana akaghisa akuwene ak’erithulhughania emibiiri mibuya eya Yehova omwa kwezi kwa Makyi, Aprili, na Meyi.
2. Ni thulhughania lyahi ery’embaghane eryabiri theghekwa erithererera Eryibuka, kandi ni bahi abanga sangira mulyo?
2 Erithulhughania ery’Embaghane ery’Erithererera Eryibuka: Kyabbalaza, ebiro 2 Aprili, thukendi syakangania emibiiri mibuya eya Yehova thukibuka Ekihulho ky’Omukama eky’Erigholho-gholho. Erikokya ly’embaghane busana n’omukonga oyu likendi syakolhwa omwa kihugho kyosi erilhua Makyi 17 erihika Aprili 2. Ithwe abosi thutholere ithwa sangira omwa mubiiri oyu. Buno bukendi syabya buthuku obuwene okw’abahya-bahya eritsuka erithulira engulhu yuwene bamabya ibana tholere. Wamabya wuwithe Abigha be Biblia kutse abaana angana tholera eribya bathuliri, lhangira wuthi wukakanaya n’abasyakulhu.
3. Ni byahi ebya thwanga bugha thukakokya abandu b’okw’Ibuka?
3 Erithulhughania eri likendibya ng’eryakolhawa thukakokya abandu b’okwa Lhuhindano Olhwe Disitrikiti “Omulhamu Ali Hakuhi-kuhi!” Ebithunga bikendi thumirwa obupapura obukaghunza nuku obuli muthuliri anga hebwa 50 n’obuli mutemburi angana hebwa 150. Wukakaghaba, kanaya omwa bikuhi, wangana bugha wuthi: “Kano ni kapapura ak’erikukokya okwa mukonga mukulhu owakabya obuli mwaka. Thukendi syatsema wamasa. Omwatsi mungyi ane okw’akapapura kano.” Eryongera okw’ekyo, omwinye nyumba amabya awithe ebibulyo, lhangira wuthi wukabisubiraya. Omwatsi owali omwa nyongezyo owakakanaya okwa Ekihulho ky’Omukama eky’Erigholho-Gholho eritsuka okwa lhupapura 206 olhwe ekitabu Biblia Yikakangiriraya angana kuwathikya erikolha eki. Okwa syowikendi, thukendi syabya thukaghaba esyogazeti haghuma n’akapapura ak’erikokya ak’embaghane. Minya abakanzisibawa, neryo wana hira h’emitheghekere ey’erisuba eya bali.
4. Obupapura bw’embaghane obw’erikokya abandu okw’Ibuka bukendi syaghabwa buthi?
4 Kikathokekana, iwe iwuwene-wene wutholere iwaha akapapura ak’embaghane ak’erikokya aka k’omundu oyuwukeghaya okwa muyi. Busana n’ekyo, handika emiyi eya wutheghaya kw’abandu wanathegheka erisubayo okwa bundi buthuku. Abakendibya ibakine n’obupapura bungyi obw’erikokya abandu, bangana busigha okwa miyi eya bathegheya kw’abandu omwa yenga y’erighunzerera nyisa Eryibuka lithe lyabya. Lhangira wuthi wukakokaya, abakanzisibawa, abigha be Biblia, abahughu, abawukakolha nabu, abaliranwa, n’abandi bandu abawasi.
5. Busana naki thutholere ithwa tsuka erithegheka lino eribya batemburi abawathikya?
5 Obutemburi obw’Eriwathikya: Wangana kolha ng’omutemburi omuwathikya omw’ithulhughania emibiiri mibuya eya Yehova omwa kwezi okwa Makyi, Aprili, na Meyi? Erikolha eki kikendi yithaghisya erikolha esyombinduka omwa ndegheka yawu. (Efe. 5:15-17) Wutholere iwakiminya indi erikolha bingyi omwa mubiiri wa Yehova kikaletha etseme n’emighisa yiwe. (Emi. 10:22) Kundi obuthuku obw’Eryibuka bukisiya ibwa hika, eno y’endambi ey’eritsuka erithegheka.—Emi. 21:5.
6. Ni kyahi ekya thwang’ighira oku mwali wethu ow’emyaka 90 oyuwakolha ng’omutemburi omuwathikya omw’omwaka owahwere?
6 Mwali wethu mughuma ow’emyaka 90 mwabya mutemburi omuwathikya omw’omwaka owahwere. Akabugha athi: “Nomwakine indi ngabya nganzire obulime n’eritsuka eriyahera, muna yitheghererya ngoku nga tholere eriminya ebindu ebya nanga hira embere. Kundi ngabya nganzire erihira Obwami bw’embere, munga thwamu eribya mutemburi omuwathikya omwa Makyi.” Mbwino mwana tsumulhwa busana n’akaghalha akahiraho? Akabugha athi, “Ngayowa ingali mughuma w’okwa kithunga, kandi eki kyabiri nyithunda hakuhi na Yehova.” Mbwino thwangana lebya ebya thuhirire embere nuku thwanga kolha esyombinduka ngoku kikayithaghisaya?
7. Kinakalire erikolha ng’omutemburi omuwathikya?
7 Erikolha esyosaha 50 esikayithaghisibawa okwa batemburi abawathikya kyanganabya isikikalire ngoku wukalengekanaya. Saba Yehova n’erilebya ebyawukakolha buli kiro, kolha endegheka, n’erihandika yo okwa ndegheka ey’emibiiri yawu ey’obunyakirimu. Wunasi emibere yawu ya ndeke. Wamabya iwutsikire kandi isiwuwithe akaghalha, obundi wangana sangira omwa mubiiri w’erithulira ahabw’esyosaha ndebe buli kiro. Wamabya iwuwithe omubiiri owakakuyithaghisaya erikolha buthuku bwosi kutse iwuli munya sukuru, wanganabya mutemburi omuwathikya omw’isangira omw’ithulira omw’igholho-gholho kutse okwa syowikendi.
8. Ekya wathikaya omulhume na mukali wiwe eribya batemburi abawathikya ni kyahi?
8 Amaka manene abirithoka erikolha ng’abatemburi abawathikya. Omwa myaka eyihwere omulhume na mukali wiwe mubathika-thika eribya batemburi abawathikya kundi mubayowa emibere yabu nga siyanga balighira erikolha bathya. Ekyababya bakolire niki? “Mubasaba Yehova nuku abawathikaye erikolha ekyababya ibabirianza erikolha ahabw’omughulhu muuli.” Busana n’eriyithegheka ndeke, mubathoka erihika okwa kilhubirirwa kyabu. Mubongera bathi: “Mukya thutsemesya kutsibu. Muthwabana mighisa minene. Ekya thukababwira kya kino, mulengesaye. Thwamabya imuthwana thoka eribukolha, nenyu mwangana thoka.”
9. Muk’igha ng’eka ni kyahi ekya mwanga kolha mukayitheghekera erithulira ery’embaghane omwa myezi eyikasa?
9 Muk’igha ng’eka mwangana hira h’obuthuku obw’erikaniryamu ngoku mwang’ongera erisangira omwa mubiiri wenyu ow’erithulira omwa myezi eyikasa. Eka yenyu eyosi nomuyithe yanga kolha obutemburi obw’eriwathikya, obundu omughuma w’okw’inywe angana kolha athya abandi ibane mumuwathikya n’erikolangana nayu. Kyamabya isikyanga thokekana, mwangana hira h’ekilhubirirwa eky’erighunza endambi nene omw’ithulira erikendibya omwa myezi ey’embaghane.
10. Busana naki ithwa bwira abandi okw’iyisunza lyethu ery’eribya batemburi abawathikya omwa buthuku bw’Eryibuka?
10 Muwathikanaye: Omuhwa wethu angana leka abandi ibabya n’omuhwa. Kanaya okwa kilhubirirwa kyawu eky’eribya omutemburi omuwathikya. Eki kyangana leka abandi ibabya batemburi. Eryongera kw’ekyo, ababiribya batemburi omwa buthuku obuhwere bangana kuha amenge awanga kuwathikya eriyithegheka ndeke nuku wanga hika okwa kilhubirirwa kyawu. (Emi. 15:22) Wamabya iwangana thoka eribya mutemburi omuwathikya, busana naki iwutha kania n’owundi muthuliri, obundi oyuwithe emibere eyiri ng’eyawu, erisangira haghuma nawu omwa mubiiri w’etseme oyu?
11. Abasyakulhu banga hira bathi omw’abandi mw’omuhwa ow’erikolha obutemburi obw’eriwathikya omwa myezi eyikayasa?
11 Abasyakulhu bangyi babirihira h’emitheghekere eyikayithaghisibawa nuku banga sangira omwa mubiiri ow’embaghane oyu. (Ebr. 13:7) Omwa kwenene, eki kikahimba ebithunga! Kandi abasyakulhu bakabya bakakania n’abandi bakaleka ibabya n’omuhwa. Eribwira abandi b’ebinywe bike eby’olhwanzo ebikahimba kutse eribaha amenge awa banga kolesya kyangana leka ibabya batemburi abawathikya. Omulebererya w’omubiiri angana thegheka erihira h’eyindi mihindano ey’eriyathulira nuku abosi bathoke erisangira omwa mubiiri oyo, nibya n’okwa ndambi y’erilhua okwa mubiiri kutse okwa sukuru. Esyondegheka esi sitholere isyarangwa mughulhu wosi. Kandi akendi lhangira athi abosi banawithe ebitabu n’obulhambu obw’erithuliramu obukaghunza.
12. Ni kyahi ekya wanga kolha wamabya isiwanga thoka erikolha obutemburi obw’eriwathikya?
12 Emibere yawu nomuyangabya isyanga kulighira eribya mutemburi omuwathikya, wangana himba abakabya, n’eribasabira. (Emi. 25:11; Kol. 4:12) Obundi wangana hira h’emitheghekere ey’erikolha nabu kiro kighuma omwa yenga kutse iwa kolha kwilhaba ngoku wulhue wukakolha.
13. Ekihugho kyawu kiwithe ekilhubirirwa ki, kandi ekithunga kyawu kyanga wathikya kithi eriberererya kyo?
13 Ekilhubirirwa eky’Erihikya Abatemburi Abawathikya 6,400 Omwa Aprili: Omughanzo w’abatemburi abawathikya e Burundi mwahika 792, e Kenya, 2,601, e Tanzania, 1,297 ne Uganda, 455. Busana n’ekyo, omwa Aprili eyikayasa thuwithe ekilhubirirwa kino, e Burundi abatemburi abawathikya 1,000, e Kenya, 3,300, e Tanzania, 1,400 ne Uganda, 700. Thwangana hika okwa kilhubirirwa ekyo 1 okwa bathuliri 6 omwa buli kithunga amingira omwa mubiiri ow’obutemburi bw’eriwathikya. Ni kwenene, omwa bindi bithunga mukendibya abathuliri bangyi abawithe emibere eyikendi balighira eribya abatemburi abawathikya. Ebithunga bingyi byangana thoka erihika okwa kilhubirirwa ekyo. Thalengekania okwa tseme eyikendi lhwiririra omw’eki ey’ekithunga kikendi bana, n’omubiiri munene owa mukendi kolha omwa bulhambu bwenyu mukathulira!
14. Busana naki kyuwene erikolha omwa okwezi okwa Aprili ng’omutemburi omuwathikya?
14 Busana naki kyuwene erikolha omwa kwezi okwa Aprili ng’omutemburi omuwathikya? Eryibuka likendi syabya okwa nzuko ey’okwezi oko, erithuha akaghisa ak’eriyasondekania abahindana. Thukendi syaghaba esyogazeti, ithunawithe ekilhubirirwa eky’erighabira abathukasubirira b’ekitabu e Biblia Yikakangiriraya n’eritsuka erigha nabu e Biblia. Busana n’ekyo, erikolha obutemburi ab’eriwathikya omwa kwezi kwa Aprili kikendi thuha akaghisa ak’erigha n’abandu e Biblia. Eryongera kw’ekyo, omwezi owe Aprili awithe ebya Sabiti bithanu n’ekiro kikulhu eky’ekihugho, neryo kyangana lhobera abakakolha emibiiri n’abakasoma erikolha obutemburi obw’eriwathikya.
15. Busana naki thutholere ithwa yithegheka eryongera erikolha bingyi omwa buthuku bw’Eryibuka obukayasa?
15 Eryibuka erya thukakolha obuli mwaka likabya likahwa n’enduli ey’omughulhu mubi ono iyathwika kw’omwaka mughuma. Obuthuku obwa thuwithe obw’eribwirira mw’abandi oku Nyamuhanga wethu mukulhu bwabiri kuhiha. (1 Kor. 7:29) Obuthuku buno obw’Eryibuka bukendi byabirihwa, akaghisa ak’embaghane ak’eripipa Thatha wethu ow’elhubulha akathwabana omwa buthuku obwo sithwendi syaswakabana. Ka thuhire h’emitheghekere lino erikolha ngoku thwanga thoka omwa kwezi okwa Makyi, Aprili, na Meyi erithulhughania emibiiri mibuya eya Yehova!
[Akasanduko okwa lhupapura 4]
Thwangana Hika Okwa Kilhubirirwa Kyethu eky’Abatemburi Abawathikya?
◼ Lebaya ebya wukahira embere
◼ Mukanaye ebilhubirirwa byenyu ng’eka
◼ Bwira abandi okwa ebya wukathegheka erikolha