Thegheka Lino Erisyakolha Bingyi omw’Ithulira
1. Ni kaghisa kahi akathukabana omwa buthuku bw’Eryibuka, kandi thwanga yitheghekera ko thuthi?
1 Obuli mwaka, obuthuku obw’Eryibuka bukathuha akaghisa ‘ak’erisumba omulenge wethu eriha ewasingya kutsibu oku Yehova.’ (Esy. 109:30) Wune mwendi ongera erikolha bingyi omw’ithulira omw’Okwakasathu ng’enzira ey’erikangania ngoku wukasima oyuwathuha embanulho? Eno y’endambi ey’erisangwa thwayithegheka.—Emi. 21:5.
2. Iwe kutse abandi mumwakolhaki emitheghekere ey’omw’Okwakani okw’omwaka owahwere yikarangwa?
2 Obutemburi bw’Obuwathikya: Omwaka owahwere, ebithunga mubyatsema kutsibu bikowa ngoku habirihirwa emitheghekere ey’abatemburi abawathikya eriha esyosaha nyike omw’Okwakani. Mughalha wethu mughuma mwahandika athi: “Ngakine omwa sukuru, kandi kikinanyikalire erikolha obutemburi obw’omughulhu wosi. Aliriryo, ngendi sulirirya erikolha esyosaha 30 n’erilengaho erikolha esyosaha 50 omw’Okwakani.” Mwali wethu oyuwithe omubiiri owakamuhambirira mwahandika athi: “Lero naghe nangana thoka esyosaha makumi asathu!” Eki kyabere kikarangwa, omuthuliri oyuwabya mutemburi, eyawithe emyaka 80 lino, mwabugha athi: “Eki kyo ngalhue inga linda! Yehova anakyasi ngoku nabya nganzire obutemburi!” Abandi abathathoka erikolha obutemburi obw’obuwathikya mubahira h’emitheghekere ey’erikolha bingyi omw’ithulira.
3. Ni nzumwa syahi esyanga leka iwanza erikolha obutemburi obw’obuwathikya omw’Okwakasathu, Okwakani, n’omw’Okwakathano?
3 Okwezi Okwakasathu bukendibya buthuku obuwene obw’erikolha obutemburi bw’obuwathikya kundi thukendi thasyahebwa akaghisa ak’erithwamu erikolha esyosaha 30 kutse 50. Eryongera okw’ekyo, eritsuka Kyamukagha, biro 17 Okwakasathu, thukendi syasangira omw’ithererera ery’embaghane ery’erikokya abandu b’okw’Ibuka erikendi syabya biro 5 Okwakani. Abangyi bangana syanza erilholha embere erikolha bingyi omwa mubiiri w’erithulira omw’Okwakani n’omw’Okwakathano, ibane mukolha esyosaha 50.
4. Thwanga kolha thuthi bingyi omw’ithulira, kandi ni mighisa yahi eyanga lhwiririramu?
4 Mukendibya mukathasyakolha Eriramya ery’Eka, busana naki imuthakania ngoku obuli mughuma omw’eka ang’ongera erikolha bingyi omw’ithulira omwa buthuku obw’Eryibuka? (Emi. 15:22) Musabe Yehova atsumule akaghalha kenyu. (1 Yn. 3:22) Mune mwongera erikolha bingyi omw’ithulira, mukendi ongera eripipa Yehova kandi imwongera eritsema.—2 Kor. 9:6.