Leka Obuthuku obw’Eryibuka Buno Bukulethere Etseme Nene!
1. Ni nzira yahi nguma eyangongera etseme yethu omwa buthuku bw’Eryibuka buno?
1 Wunanzire eryongera etseme yawu omwa kwezi Okwakasathu, Okwakani n’Okwakathano? Enzira nguma ey’erikolha mw’eki ly’erikanyirirya omubiiri wawu w’erithulira kandi kyamathokekana, iwakolha obutemburi bw’obuwathikya. Eki kikendi ongera kithi etseme yawu?
2. Erikanyirirya omubiiri wethu w’erithulira likendi leka lithi ithwongera eribana etseme?
2 Ongera Etseme Yawu: Yehova mwathuhangika nuku thubane etseme thukamuramya n’eriberererya ekiyithawa kyethu eky’obunyakirimu. (Mt. 5:3) Kandi mwathuhangika nuku thubane etseme eyikalhuiririra omw’ihithya. (Emib. 20:35) Omubiiri wethu ow’erithulira akaleka ithwakolha ebyosi bibiri ebi—eriramya Nyamuhanga n’eriwathikya abandu. Kwesi ni kwenene indi erikolha bingyi omwa mubiiri w’erithulira nibya mukalhuiririra etseme nene kutsibu. Eryongera okw’ekyo, thukabya thukongera erithulira, thukongera eribya bathuliri babuya. Thukabya thukathoka erithulira ndeke, thukaghumaya eriyikethera lyethu omw’ithulira n’erikehya obuba bwethu. Thukendibya n’akaghisa kanene ak’eriha obwema n’eritsuka erigha na bandu e Biblia. Ebyosi ebi bikaleka omubiiri w’erithulira inialhuma kutsibu.
3. Busana naki okwezi Okwakasathu n’Okwakani ni mezi awuwene erikolha obutemburi bw’obuwathikya?
3 Okwezi Okwakasathu n’Okwakani ni mezi awuwene erikolha obutemburi bw’obuwathikya kundi thwangana thwamu erikolha esyosaha 30 kutse 50. Eryongera okw’ekyo, eritsuka Kyamukagha Okwakasathu 22, erihika okwa kiro ky’Eryibuka Kyabbalaza Aprili 14, thukendi sangira omw’ithererera ery’erikokya abandi okw’Ibuka. Ebithunga bikendi tsema kutsibu abathuliri bangyi bakakolera haghuma erikolha ekitsweka kinene ekyo bulhambu bwabu omwa buthuku obuhebirwe.—Zef. 3:9.
4. Thwamanza erikolha obutemburi bw’obuwathikya, thutholere ithwakolha ki?
4 Thegheka Lino: Wamabya isiwuli wakolha wuthya, lebaya ndeke emibiiri yawu n’erilebya nga ni esyombinduka syahi esya wangakolha nuku wana kanyirirya omubiiri wawu w’erithulira omwa kwezi kughuma kutse manene kwaho. Kihire omwa musabe. (Yak. 1:5) Mukikanayeko n’ab’eka yawu na bandi abw’omwa kithunga. (Emi. 15:22) Wanganalhangira indi nomuwangabya iwutsekire kutse iwukakolha omubiiri w’ekihugho buthuku bwosi, nawu wangana bana etseme eyikalhua omw’ikolha obutemburi bw’obuwathikya.
5. Ni kyahi ekikendi lhuiririra omw’ikanyirirya omubiiri wethu w’erithulira omwa buthuku bw’Eryibuka buno?
5 Yehova anzire abaghombe bwiwe ibabya n’etseme. (Esy. 32:11) Omw’ilengaho erikanyirirya omubiiri wethu ow’erithulira omwa buthuku obw’Eryibuka buno, si kyendi thulethera etseme lisa aliriryo kikendi leka Thatha wethu ow’elhubulha iniatsema.—Emi. 23:24; 27:11.