Hira h’Akaghalha ak’Erikolha Bingyi Omwa Mubiiri Wethu
1 Omukwenda Paulo mwahabulha Abakrisitayo athi balendere omwa nzira ya Nyamuhanga ‘n’erikolha kwilhaba aho.’ (1 Tes. 4:1) Eki kikamanyisayaki okw’ithwe? Ekya thutholere ithwa minya ly’erihira h’akaghalha ak’erikolha bingyi omwa mubiiri ow’obunyakirimu, mughulhu wosi erilengaho ‘eribuyirira omubiiri wethu.’—2 Tim. 4:5.
2 Ekilhubirirwa: Erihira h’akaghalha ak’erikolha bingyi kikasa busana n’erianza erikolera Omuhangiki wethu y’omwa buswire. Thwanzire ithwa kulha-kulhana bunyakirimu n’erisondekania esyonzira esy’erikolha omubiiri wethu wa ndeke. Erikolha gho mughulhu wosi ithuna nzire kikendi thuwathikya eribya n’ebilhubirirwa eby’ekiteokrasi.—Esy. 1:1, 2; Fil. 4:6; Ebr. 10:24, 25.
3 Erianza erikolha bingyi omwa mubiiri wethu ow’erithulira kikayithagha omuthima ow’erihithya n’eriyihayo. Thwanganabya n’omuthima ng’oyu thwama ghanirya okwa ky’erileberyako kibuya ekya Yesu. (Mt. 20:28) Yesu mwabana etseme nene akakolera abandi omwa mubiiri wiwe wosi ow’Obwami. (Emib. 20:35) Thwangana gherererya Yesu thwama kangania ngoku thutsomene abandi n’erikolesya akaghisa kosi-kosi akathukabana ak’erikolha bingyi omwa mubiiri wethu.—Isa. 6:8.
4 Olhukwamirwa lhw’Ababuthi: Eriyisunza erikolera abandi n’erikolha bingyi omwa mubiiri wethu kyangana kangiriribwa abaana ibakine balere. Abaana bakendi thungerera omuhwa ow’abandu ab’omw’eka n’erisangira lyabu kutsibu omw’ikolha bingyi omwa mubiiri ow’erithulira. Mughalha wethu mughuma erikolha haghuma na sukulhu wiwe omwa mibiiri ey’ekiteokrasi iniakine mulere mukyaleka inianza erikolha bingyi. Abera akalhangira omuhwa n’etseme eya sukulhu wiwe awithe mukyaleka inianza erikolera balikyabo. Lino akakolha ng’omuwathikya omwa kithunga.
5 Baghalha Bethu Bakayithaghisibawa: “Omulhume wosi-wosi amayithagha erihebwa . . . , akayisunza omubiiri mubuya.” (1 Tim. 3:1, NW) Ebinywe ebi bikahimba baghalha bethu erikolha bingyi nuku banga hebwa esindi nzunzo omwa kithunga kya Yehova. Erikolha eki sikiri yithaghisaya eribya iwuwithe amenge aw’embaghane kutse iwasi binene. Mughalha wethu oyukanza erikolha bingyi akahira Obwami bw’embere n’erisangira omwa mubiiri w’erithulira n’omuhwa. (Mt. 6:33; 2 Tim. 4:5) Akendi lengaho eribya ky’erileberyako kibuya embere sy’abandi.
6 Omwa Kihugho Kyosi: Yehova ane mwanguhya omubiiri ow’erikuma-kuma. (Isa. 60:22) Omwabya lhuba, abosi abakwamire eky’erileberyako kya Yesu batholere ibakolha omubiiri wabu ow’erithulira omwa buswire. Eripoti ey’ekihugho kyosi ey’omwaka w’omubiiri eya 2006 yikakanganaya yithi abandu 248,327 bababya babatizibirwe. Eki kikanganaya kithi abandu bahya-bahya abalhabire omu 680 babakabatizibawa buli kiro! Ithwe abosi thulhole embere erisondekania esyonzira esya thwanga kolera mw’omubiiri wethu omwa buswire.