Baghalha Bethu Eminyethu, Mune n’Ekilhubirirwa eky’Erihebwa Olhusunzo?
1. Mughalha wethu omunyethu atholere iniatsuka mughulhu wahi erikolesya obusondoli obuli omu 1 Timoteo 3:1?
1 “Omulhume wosi-wosi amabya n’ekilhubirirwa eky’erihebwa . . . , akabya iniakayisunza omubiiri mubuya.” (1 Tim. 3:1, NW) Ebinywe ebyo bikahira baghalha bethu mw’omuhwa ow’eribya n’ekilhubirirwa eky’eritholera erihebwa esyonzunzo omwa kithunga. Mbwino wutholere iwabya mulhume mukulhu erikolha ekyo? Erithwalira haghuma, kyuwene eribya n’ekilhubirirwa eki iwukine mulere. Omwa nzira eyi iwangana thendekwa n’erikikangania ngoku wutholere erihebwa olhusunzo ng’omughombe omuwathikya wabirikulha. (1 Tim. 3:10) Wamabya iwuli mughalha wethu omunyethu oyubatizibirwe, wangabya wuthi n’ekilhubirirwa eki?
2. Thwangabya thuthi n’omuthima ow’eriyihayo kandi thwanga kangania gho thuthi?
2 Eriyihayo: Wibuke ngoku eribya n’ekilhubirirwa eki wukabya iwukayisunza omubiiri mubuya, butsira ekitsumbi. Busana n’ekyo, wubye n’omuthima ow’eriwathikya balikyethu. Enzira nguma ey’erikolera mw’eki, ly’erighanirya okwa ky’erileberyako kibuya ekya Yesu. (Mt. 20:28; Yn. 4:6, 7; 13:4, 5) Saba Yehova y’obuwathikya obw’eritsomana abandi. (1 Kor. 10:24) Mbwino wangana wathikya abakekelhuhire kutse abatseke abali omwa kithunga kyawu? Wukanayihayo erithema-thema obuthalha bw’Ekisenge ky’Obwami kutse erikisugha? Wangana yihayo erilhabya omukania omw’Ithendekero ery’Omubiiri w’Ekiteokrasi nomwangabya isyalhue wawu? Iwukendi lhangira ngoku eriyihayo busana n’abandi kikendi kulethera etseme.—Emib. 20:35.
3. Obunyakirimu ni bw’omughaso buthi, kandi bwanga kulha-kulhanibwa buthi?
3 Obunyakirimu: Omughombe omwa kithunga eribya w’obunyakirimu kirengire kutsibu eribya n’ekihembo ky’embaghane kutse amaaka w’ekibuthiranwa. Omulhume ow’obunyakirimu akalengaho erilhangira emyatsi ngoku Yehova na Yesu bakalhangirayo. (1 Kor. 2:15, 16) Akakanganaya ‘emikolere eyikalhua okwa mulimu.’ (Gal. 5:22, 23) Ni muthuliri w’omuhwa oyukahira emyatsi y’Obwami y’embere. (Mt. 6:33) Eryongera okw’iyitheghekera emihindano y’ekithunga n’erihindana kuyo, wangana thasyakulha-kulhania emibere ey’obunyakirimu omw’ibya n’endegheka mbuya ey’eriyeghesya. Eki mwamuli erisoma e Biblia buli kiro, erisoma obuli Watchtower na Awake! (Esy. 1:1, 2; Ebr. 10:24, 25) Abere akahira omu Timoteo mw’omuhwa ow’erikulha-kulhana bunyakirimu, Paulo mwahandika athi: ‘Wutheghaye erikangirirya lyawu.’ (1 Tim. 4:15, 16) Neryo lhangira wuthi wukathegheka ndeke emikania eya wukalhabaya omw’Ithendekero ery’Omubiiri w’Ekiteokrasi. Yitheghekere eriyathulira, n’erisangira mulyo mughulhu wosi. Hiraho ebilhubirirwa eby’obunyakirimu n’erilhangira wuthi wukabiberereraya, ng’erikolha obutemburi, eriyakolera okwa Beteli, kutse erighenda okwa Sukuru ey’Abaghalha Bethu Abahuru Eyiseghemere Okwa Biblia. Obunyakirimu bukendi thuwathikya ‘erisagha esyongumbu sy’obulhwana.’ 2 Tim. 2:22.
4. Omughaso ow’eriyiketherwa n’obutheleghulha ni wahi?
4 Eriyiketherwa n’Obutheleghulha: Kundi baghalha bethu abahebawa omubiiri ow’erighabira Abakrisitayo ababya n’obuyithawa ab’omwa kighonye ky’erimbere b’ebyalya babya ‘basimirwe,’ erikangania indi babya bayiketherwa kandi batheleghulha, mukyaleka abakwenda ibathayilhalikirira omubiiri ngane mwendi kolhwa. Eki mukyaleka abakwenda ibabya ibanemukolha eyindi myatsi ey’omughaso. (Emib. 6:1-4) Busana n’ekyo, wamahebwa omubiiri omwa kithunga, kolhagho ndeke ngoku wangathoka. Gherereraya Noa, oyuwakwama-kwamanaya ndeke obusondoli obwa ahebawa akahimba obwathu. (Enz. 6:22) Yehova akasima obuthaleghulha kandi bukakanganaya erikulha-kulhana ly’obunyakirimu.—1 Kor. 4:2; lebaya akasanduko “Omughaso w’Erithendekwa.”
5. Busana naki abaghalha bethu eminyethu ibabya n’ekilhubirirwa eky’erihebwa olhusunzo?
5 Ngoku kyalhaghulhawa, Yehova ane mwanguhya omubiiri w’erikuma-kuma esyombuli. (Isa. 60:22) Obuli mwaka, hakuhi abandu emithwalho abiri n’ithano bakabatizibawa. Busana n’abahya-bahya bangyi abakasa omwa kwenene, abalhume abakulire bunyakirimu bakayithaghisibawa erisondolha ekithunga. Lino, hali bingyi eby’erikolha omwa mubiiri wa Yehova kwilhaba kera. (1 Kor. 15:58) Baghalha bethu eminyethu, mune n’ekilhubirirwa eky’erihebwa olhusunzo? Byamabya kwabiri bithya, imukendibya imukayisunza omubiiri mubuyanga!
[Eblabbu ekiri okwa lhupapura 2]
Busana n’abahya-bahya bangyi abakasa omwa kwenene, abalhume abakulire bunyakirimu bakayithaghisibawa erisondolha ekithunga
[Akasanduko ekiri okwa lhupapura 3]
Omughaso ow’Erithendekwa
Baghalha bethu eminyethu abatholere bakaghasirawa omughulhu abasyakulhu bakabaha emibiiri n’eribathendeka. Omulebererya w’omuthimbo abya inianikere okwa rututi inianemuhimba omuthuliri mulebe emihindano yabirihwamu. Mwalhangira omulhwana inianimene hakuhi, neryo mwamubulya ng’anzire erikania nayu. Mughalha wethu omunyethu mwasubirya athi abirihebwa olhukwamirwa olhw’eribirya orututi obuli muhindano akahwamu. Ababuthi biwe babya ibakayasuba eka, aliriryo iyo mwathanza erighenda athali akolha omubiiri wiwe. Omulebererya mwalhuaho inianatsemire. Mwabugha athi: “Abasyakulhu ab’omwa kithunga ekyo ibakalhangira bathi bakabya ibane muthendeka baghalha bethu eminyethu abatholere omw’ibaha emibiiri omwa kithunga. Busana n’ekyo, iningabya ngababungira isibalibulha mughalha wethu omunyethu ow’erihamyako eribya mughombe omuwathikya.”