Ngoku Thwanga Thendeka Abahya-bahya Erithulira
1. Muwayowa wuthi omughulhu watsuka erisangira omw’ithulira?
1 Wun’ibukire ekiro watsuka erisangira omwa mubiiri owa nyumba kwa nyumba? Obundi wangabya imuwakwa engitsi. Wamabya iwabya wukakolha n’oyukakweghesaya e Biblia kutse owundi muthuliri, ahathe erithika-thika muwatsema akakuwathikya. Kundi lino wamabiriminya bingyi ng’omuthuliri, wangana thendeka abahya-bahya omw’ithulira.
2. Ni byahi ebya bathuliri bahya-bahya batholere ibigha?
2 Abathuliri bahya-bahya batholere ibigha ngoku banga tsuka erikania n’abinye nyumba, erikolesya e Biblia wukathulira, erisubayo, n’eritsuka erigha n’abandu e Biblia. Kandi batholere ibigha ngoku banga sangira omwa syonzira muthina-muthina esy’erithulira, ng’erithulira okwa mbalhu n’emyanya ey’esuburu. Wangana bawathikya erikulha-kulhana omwa syonzira esi erilhabira omwa ky’erileberyako kyawu n’amenge awa wukabaha.
3. Thwanga wathikya thuthi abandi omwa ky’erileberyako kyethu?
3 Wubye ky’Erileberyako: Yesu mwakangania abigha biwe ngoku banga thulira. (Lk. 8:1; 1 Pet. 2:21) Wamabya w’erikolha n’omuthuliri muhya-muhya, thegheka ebya wangana kania ebyanga lhobera omuthuliri erigherererya, obundi omw’ikolesya ekighuma ky’okwa by’erileberyako ebiri omwa bitabu byethu. Neryo, kolha enyumba ey’erimbere kutse n’eyakabiri nuku omuthuliri anga hulikirira ebya wukakanaya. Muthe mwahika okwa yindi nyumba, wangana bulya omuthuliri ebyamalhangira wukathulira ebya anga kolesya. Eki kikendi muwathikya erilhangira omughaso ow’erikolha n’abandi omwa mubiiri w’erithulira kandi kikendi leka ikya mwolhobera eriligha amenge wosi-wosi awa wanga muha abirighunza erikania.
4. Thwanga wathikya thuthi omuthuliri muhya-muhya thwabirihulikirira ebya akakanaya?
4 Wuhe Amenge: Kandi Yesu mwabwira abigha biwe ngoku banga thulira. (Mt. 10:5-14) Wangana wathikya omuthuliri muhya-muhya omwa nzira iyan’eyo. Amabya in’iyo akakanaya, muhulikirire ndeke. Neryo mukendibya mwalhua okwa nyumba eyo, musime busana n’ekindu kirebe ekya alyakolha, nomwangabya iniakathasya yithagha eryuwania emibere ey’erithulira liwe. Wuthe wamuha amenge, wangana tsuka erilebya ng’anamathasyuwania emibere y’erikangirirya liwe okwa yindi nyumba. Anganabya inialhue akwire engitsi. Kandi wibuke ngoku obuli muthuliri awithe ebya akathoka, kandi ngoku ekindu kighuma kyanga kolhwa ndeke omu nzira nyingyi.—1 Kor. 12:4-7.
5. Ni byahi ebya thwanga bugha thukathwalha olhukwamirwa olhw’eriha amenge?
5 Okwa bundi buthuku omuthuliri muhya-muhya angana kusaba amenge. Aliriryo amathendi kusaba gho, thwalha olhukwamirwa olhw’erimuwathikya. Wanga kolha eki kya wuthi omw’amenge? Abandi bathuliri abasi bingyi bakakwama kya bugha bathi, “Ngana kuhe amenge?” kutse, “Wukayowa byamaghenda bithi?” Kutse wangana bugha wuthi, “Omughulhu nabya muthuliri muhya-muhya, munabana ikikalire eri . . . , aliriryo kino mukya nyiwathikya. . . .” Okwa bundi buthuku kyanganabya ky’omughaso erileberya haghuma esyonzumwa esiri okwa lhupapura olhw’Omubiiri Wethu ow’Obwami. Omwakanya k’erimuhwiririkania omwa myatsi, mubwire ekindu kighuma kisa ekya tholere iniakolhako erikwamana n’ebyalyakanaya.
6. Erikwamana n’omubiiri ow’erithulira, ekyuma kikaghusungulha kithi ekindi kyuma?
6 Ekyuma Kikaghusungulha Ekindi Kyuma: Paulo mwahira omu Timoteo, oyuwabya asi erithulira ndeke mw’omuhwa ow’erilholha embere eriyiha okw’ikangirirya n’erilholha embere liwe eriminyikalha. (1 Tim. 4:13, 15) Nomuwangabya iwamabirighunza emyaka mingyi erilhua okwa kiro watsuka erithulira, si wulhuhirire eryuwania emibere ey’erithulira lyawu. Ighira okw’abathuliri abawukakolha nabu omw’ithulira, nibya n’okw’abathasi bingyi omw’ithulira, kandi lhangira wuthi wukawathikaya abandi omwa mibere ey’olhwanzo, kwilhabirirya abahya-bahya, eribya bathuliri ab’engulhu yuwene abasi.—Emi. 27:17.