Obuwathikya Busana n’Amaka
1. E Sabato iyikaghasira yithi amaka aw’Abaisraeli?
1 E Sabato yabya ndegheka ey’olhwanzo erilhua oku Yehova eya ghasira amaka. Abaisraeli ibakalhuhuka okwa mibiiri yabu eya buli kiro neryo ibabana obuthuku obw’erighanirya okwa bubuya bwa Yehova n’obughuma bwabu nayu. Ababuthi ibakakolesaya akaghisa kano erihira emighambo y’omwa mithima y’abaana babu. (Ebi. 6:6, 7) E Sabato iyikaleka abandu ba Yehova ibabana endambi buli yenga ey’erilengekania buuli okwa bunyakirimu bwabu.
2. E Sabato yikathukangiriraya ki oku Yehova?
2 Ni kwenene Yehova syakiyithaghisaya amaka eryibuka e Sabato. Aliriryo, ekihano eki kikathukangiriraya ekindu kirebe ekihambire oku Nyamuhanga. Abiribya inianatsomene kutsibu obunyakirimu bw’abandu biwe. (Isa. 48:17, 18) Munabwira, enzira nguma ey’akakanganirayamu ngoku athutsomene ly’erilhabira omw’Iramya ly’Eka.
3. Ekighendererwa eky’Eriramya ery’Eka niki?
3 Ekighendererwa eky’Eriramya ery’Eka Niki? Omwa kwezi Januare 2009, Erigha ly’Ekitabu ery’Ekithunga mulyatsuka erikolhwa okwa kiro ekikabya mw’Erithendekero ery’Omubiiri w’Ekiteokrasi n’Omuhindano w’Omubiiri. Eki kyakolhawa nuku abali omw’eka bangabana akaghisa ak’erighumya obunyakirimu bwabu omw’isombolha erigholho-gholho lirebe obuli yenga busana n’eriramya ly’eka. Obuli eka muyahiribwa mw’omuhwa ow’erisubya erigha lyayu ery’eka ly’omw’igholho eryabya mw’erigha ly’ekitabu kyamathokekana, kandi ibakolesya endambi eyi erikania ebihambire okwa Biblia ahathe eriharabana n’eribihambania n’ebiyithawa by’eka.
4. Mbwino eka yitholere eya kolesya esaha nguma nyisa omw’iramya lyabu? Soborera.
4 Erithoka erihindana okw’Igha ly’Ekitabu ery’Ekithunga, muthwabya ithukayithagha endambi ey’eryambalha, erighenda, n’ebindi-n’ebindi. Abangyi omw’ithwe, ibakakolesaya endambi nene kwilhaba esaha nguma eya thwabya thukaghunza okwa muhindano oyu. Busana n’erihindulha endegheka ey’omuhindano wethu, lino thuwithe erigholho-gholho eri eriramya Yehova ng’eka. Busana n’ekyo, si bugha indi thutholere ithwakolesya saha nguma nyisa omw’Iramya ly’Eka. Aliriryo, thutholere ithwalengekania okwa biyithawa n’erilemererwa n’erihira h’endambi eyitholere.
5. Mbwino, eriramya eri litholere iryakolhwa omw’ikanirania lisa? Soborera.
5 Mbwino Eriramya eri Litholere Iryakolhwa omw’Ikanirania Lisa? Omughulhu abathahenie n’amaka awali mw’abaana bakakanaya haghuma okw’omwatsi w’Amasako, bakahimbangana. (Abar. 1:12) Eka yikabya bughuma. Busana n’ekyo, erikanirania okw’Amasako ky’ekindu ekitholere ikyakolhwa kutsibu omw’Iramya ly’Eka. Aliriryo obuli mughuma w’omw’eka angana thasyaghunza obuthuku iniane muyeghesya. Ng’eky’erileberyako, enyuma w’erighira haghuma, obuli mundu angana lholha embere eriyeghesya ahabw’iwe, obundi erighunzerera erithegheka emihindano kutse erisoma esyogazeti. Awandi maka akathwamu erilimya etivi kutse eradio okwa ndambi ey’eriramya.
6. Erikanirania ery’eka lyanga kolhwa lithi?
6 Erikanirania eri Lyanga Kolhwa Lithi? Sibugha indi mughulhu wosi litholere iryakolhwa omwa mibere ey’eribulya n’erisubirya. Amaka muthina-muthina abirihira h’endegheka eyiri ng’ey’emihindano yethu eyikabya omwa kathi-kathi k’eyenga nuku Eriramya ery’Eka lyanga tsemesya. Bakaghabana ebitsweka bingyi n’eribikaniako omwa nzira muthina-muthina. Ng’eky’erileberyako, bangana soma e Biblia ya haghuma, ibathegheka ebitsweka birebe eby’emihindano, n’eriyibegheresya ngoku banga kania omw’ithulira. Okwa lhupapura 6 kune amenge awanga kolesibwa.
7. Ababuthi batholere ibalengaho erihira h’emibere eyiri yithi?
7 Ni Mibere ki ey’Ababuthi Batholere Ibahiraho? Eka yawu yangan’igha ndeke hamabya emibere eyithekene n’ey’olhwanzo. Obuthuku bwamabya ibune ndeke imwangan’ikalha eyihya mukigha. Mwangana lhuhuka hake kyamayithaghisibwa. Awandi maka akahira h’eby’erinywa babirighunza erigha. Nomwakine indi ababuthi batholere ibayihighulha okw’itsurumira kutse erisuyira abaana okwa ndambi ey’Eriramya ery’Eka, kyangana bayithaghisya erihira h’obuthuku obw’erikania okwa mutse kutse ekitsibu kirebe ekya babirilhangira. Aliriryo, kyanganabya kibuya erikania okwa myatsi eyihambire okw’omwana eyanga leka iniayowa nabi okwa bundi buthuku nuku syahemuke embere sy’abandi baana. Eriramya ly’eka siritholere lik’itha bulhundu, aliriryo litholere iryakangania ngoku thukaramaya Nyamuhanga oyutsemire.—1 Tim. 1:11, NW.
8, 9. Ni thegheka lyahi erya abinyeka batholere ibakolha?
8 Omwinyeka Angathegheka Athi? Eka yikendi ghasirwa kutsibu omwinyeka amasangwa athegheka omwatsi owakendi kanibwako omw’Iramya ly’Eka kandi ngoku angakanibwako. (Emi. 21:5) Kyuwene omulhume eribulya mukali wiwe erikwamana n’omwatsi oyu. (Emi. 15:22) Binyeka, busana naki imuthabya mukabulya abaana benyu b’emyatsi eya banganza yikanibaweko? Wamakolha ekyo, iwukendi minya bingyi ebihambire okw’ebyabanzire n’ebitsibu ebya bawithe.
9 Okw’awandi mayenga kyangana ghana eriyithaghisya omwinyeka erikolesya endambi nene akathegheka. Eka yangana ghasirwa hamabya endegheka ey’erikwama-kwamania obuli yenga, kandi isikyendi yithaghisya omwinyeka eribya akahira h’endegheka nyihya-nyihya obuli kathuku. Kyanganabya kibuya amathegheka erigha likahwamu kundi akendibya iniakin’ibukire ebiyithawa eby’eka yiwe eby’obunyakirimu. Abandi binyeka bakahandika ebya bakendi syakaniako neryo ibabihanika ah’abosi banga bilhangira. Eki kikaleka ibalindirira n’etseme n’eriha eka y’akaghisa ak’erithegheka kyamayithaghisibwa.
10. Abikere ibobene banga kolesya bathi endambi y’Eriramya ly’Eka?
10 Kandi Ibbwa Namabya Ingali Ingyuwene omw’Eka? Abali ibobene bangana kolesya endambi ey’Eriramya ly’Eka eriyeghesya. Endegheka mbuya ey’eriyeghesya yitholere iyabya mw’erisoma e Biblia, erithegheka emihindano, erisoma e Watchtower na Awake! Eryongera okw’eki abandi bathuliri bakongera eriyeghesya omw’isekulya eyindi myatsi. Obundi buthuku, bangana kokya owundi muthuliri kutse eka ndebe eribya haghuma nabu nuku banga himbangana omw’ikania okwa myatsi y’Amasako.
11, 12. Ni mighaso yahi eyikalhwiririra omw’ibya n’eriramya ery’eka mughulhu wosi?
11 Ni Mighaso Yahi Eyikalhwiririra omw’Ibya n’Eriramya ery’Eka Mughulhu Wosi? Abakasangira omw’iramya ly’ekwenene n’omuthima wosi bakayithunda hakuhi na Yehova. Eryongera okw’ekyo, amaaka awakaramiraya haghuma akaghuma. Omulhume na mukali wiwe muhandika erikwamana n’emighisa eya babana bathi: “Ithwe ng’abatemburi abathawithe abaana, thukalindirira n’omuhwa endambi ey’eriramya lyethu ery’eka. Thukayowa ithune mwanzana kutsibu n’eriyithunda hakuhi na Thatha wethu w’elhubulha. Ebiro bino thukabya thukahangana omwa ngyingo ekiro thuwithe eriramya ly’eka, owundi akabulhaya owundi athi: ‘Wunasi nga thukendi kolha ki omw’igholho-gholho erya munabwire? Eriramya ly’Eka!’”
12 Kandi endegheka ey’eribya n’eriramya ly’eka yikawathikaya amaaka owawithe emisulhusutho. Omubuthi oyuli eyuwene oyuwithe abaana babiri kandi oyukabya iniane mukolha obutemburi bw’omughulhu wosi mwahandika athi: “Omwa buthuku obulhabire, erigha lyethu ery’eka siryabya ndeke. Siryabya likabya mughulhu wosi kundi iningabya inabirilhuha. Isinanga thoka erikolha ebyosi ebi. Nga bahandikira eribasingya kutsibu busana n’erigholho-gholho ery’Eriramya ly’Eka. Lino thune mukolha mughulhu wosi erigha ly’eka n’erighasirwa.”
13. Ni kyahi ekikakanganaya eka yawu nga yikendi ghasirwa bungahi omwa ndegheka eyi?
13 Nge Sabato, erigholho-gholho ery’Eriramya ly’Eka ni kihembo erilhua okwa Thatha wethu w’elhubulha ekyangana wathikaya amaaka. (Yak. 1:17) Ngoku amaka w’Abaisraeli abya akakolesaya e Sabato kyakyabya kikakangania ng’anga ghasirwa bungahi bunyakirimu. Kuthya, ngoku thukakolesaya erigholho-gholho erya thwabirihebwa busana n’eriramya ly’eka kikakanganaya amaka wethu ng’anga ghasirwa bungahi. (2 Kor. 9:6; Gal. 6:7, 8; Kol. 3:23, 24) Wamakolesya ndeke endegheka eyi, eka yawu iyangana bugha ngoku omusakangyi w’Esyonyimbo abugha athi: ‘Nikwa ingye, ni kibuya eribya hakuhi na Nyamuhanga! Omo Mwami Mukulhu Nyamuhanga, ngabana obutheya.’—Esy. 73:28.
[Eblabbu okwa lhupapura 5]
Eriramya ly’eka siritholere lik’itha bulhundu, aliriryo litholere iryakangania ngoku thukaramaya Nyamuhanga oyutsemire
[Akasandhuko okwa lhupapura 6]
LHUBIKE
Amenge Awathwanga Kolesya omw’Iramya ly’Eka
E Biblia:
• Musoma haghuma obusomi bwe Biblia obwa buli yenga. Obusomi bwe Biblia bwamabya ibukakanaya okwa bandu muthina-muthina, obuli mundu iniangana hebwa ekitsweka ky’erisoma erikwamana n’abandu abakanibweko.
• Mukole akasathu erikwamana n’ebya mukasoma omwa Biblia.
• Sangwa waghabira obuli mughuma w’omw’eka y’esyosura esy’erisoma omwa Biblia kandi wuthi ahandike kibulyo kighuma kutse bibiri ebihambire okw’omwatsi oyo. Neryo imwa sekulya haghuma okwa buli kibulyo eky’obuli mundu.
• Obuli yenga thegheka ekadi eyawanga kangania eya wabirihira kw’omulhondo wana bawathikya erihambira omulhondo oyo w’omwa muthwe n’erisoborera gho. Ibya iwune mubika obukadi, mwanabya mukayibukya ebiriko obuli yenga erilebya nga ni masako mangahi awamukinibukire.
• Muhulikirira obusomi bwe Biblia obuhambirwe okwa kanda imune mukwama-kwamania omwa Biblia yenyu.
Emihindano:
• Muthegheke haghuma ekitsweka kirebe eky’okwa mihindano.
• Muyibegheresaye eriimba esyonyimbo esikendi kolesibwa omwa yenga eyikendi kwamako.
• Omundu amabya iniawithe omukania omw’Ithendekero ery’Omubiiri w’Ekiteokrasi kutse eky’erilhangirirako omwa Muhindano w’Omubiiri, mumuhe amenge ngoku ekitsweka kiwe kyanga kolhwa, kutse mukikole ngoku kikendisya embere sy’abandi bandu.
Ebiyithawa by’Eka:
• Mukolesaye omwatsi owali omwa kitabu Young People Ask kutse Learn From the Great Teacher.
• Mukanganaye ekyanga kolhwa omwa mibere mirebe eyanga buthuka okwa sukuru.
• Omubuthi angana kolha ng’omwana n’omwana iniakolha ng’omubuthi. Abaana bangana sekulya omwatsi neryo ibaghanirya n’ababuthi.
Erithulira:
• Mwangana kolha ngoku mukendisya kania omw’ithulira.
• Mukanaye okwa bilhubirirwa ebya eka yanga hiraho eryongera erisangira omw’ithulira omwa buthuku bw’Eryibuka kutse obw’ekihumuru.
• Obuli mundu oyuli omw’eka angana sekulya omwa dakika nge ngoku anga subirya ebibulyo muthina-muthina ebyanga buthuka omw’ithulira, neryo imwakolha ngoku mwanga subirya.
Awandi Menge:
• Mwangana soma haghuma esyogazeti nyihya-nyihya.
• Leka obuli mundu omw’eka atsuke erisoma omwatsi owakamutsemaya omwa syogazeti nyihya-nyihya, neryo anabwira w’abandi.
• Hanganayira imwakokya omuthuliri kutse abatheke eribya haghuma nenyu omw’Iramya ly’Eka kandi nibya imwangana babulya nga basa bathi omwa kwenene n’ebya balholireko omw’ithulira.
• Mulebaye n’erikania okwa nguma ey’okwa syovidiyo syethu.
• Mukanaye haghuma okwa mwatsi owali Awake! owa “Eminyethu Yikabulhaya” kutse owa “Busana n’Eka Eriyibukya.”
• Mukanaye haghuma okwa mwatsi owali omwa Watchtower owa “Kangiriraya Abaana Bawu” kutse owa “Busana n’Abalere.”
• Musome n’erikania okw’omwatsi owali omwa Yearbook eya lino-lino kutse ekitabu ekya hulhuka okwa lhuhindano olhwe disitrikiti olhwahwa.
• Mulhabe omwa syonzumwa nkulhu-nkulhu esya mukiha okwa lhuhindano lhunene.
• Muthungerere ekihangikwa kya Yehova mwana kania nga kikabakangiriraya ki oku Yehova.
• Mubye n’ekyamukakolha haghuma, ng’erihimba obwathu bwa Noa, erithera emapu, n’ebindi-n’ebindi.