Wangana Thulira omw’Igholho?
1. Ekitabu kighuma kikabugha kithi Paulo mwathulira nyumba okwa nyumba okwa ndambi syahi?
1 Ekitabu Daily Life in Bible Times kikabugha kithi omukwenda Paulo iniakasangira omw’ithulira nyumba okwa nyumba “eritsuka saha 10 erihika omwakiro kutsibu.” Mbulha eki kya Paulo abya akakolha, sithwanga minya, aliriryo ekya thwasi Paulo abya anzire ‘erikolha emyatsi yosi busana n’engulhu yuwene.’ (1 Kor. 9:19-23) Erithoka eki, angabya imwahira h’endegheka ey’erimuthokesya erighenda nyumba okwa nyumba okwa ndambi ey’angabanira mw’abandu bangyi.
2. Busana naki endambi y’erigholho yuwene busana n’erithulira?
2 Omwa bitsweka bingyi, abathuliri erilhua kera bakaghenda nyumba okwa nyumba omwa ngyakya. Aliriryo omwa kitsweka kyawu, eyi yikine ndambi mbuya? Omutemburi mughuma akabugha bino oko bulhambu bwiwe: “Kikalire erisanga omundu y’eka omw’ithungyi. Aliriryo abandu bangyi bakabya eka omw’igholho.” Erithulira omw’igholho lyangana thuha akaghisa ak’erithulira, kutsibu-tsibu abalhume. Okwa ndambi eyi abandu bakabya ibana thekene eka kandi ibangananza erikania. Kyamabya ikyangana ghasa, abasyakulhu banganahira h’endegheka ey’eriyathulira omw’igholho.
3. Thwanga kangania thuthi amenge ithune omw’ithulira ery’erigholho?
3 Kolesaya Amenge: Ni kikulhu erikolesya amenge thukasangira omw’ithulira ly’erigholho. Ng’eky’erileberyako, wamalhangira wuthi wamasa okwa ndambi eyithuwene, ng’esaha bali okw’irya eky’erigholho, kyuwene eribugha wuthi wukendi syasubulha ekindi kiro. Wukakongotha okwa lhuyi, imana aha banga kulhangira n’erisangwa wabugha nga wuli ndi, n’ekikakuletha. Kandi ni ky’amenge erithend’ithulira ibwamabirira kundi ikyangana tabura abakanza eriyakesya. (2 Kor. 6:3) Isiwaghenda omwa bitsweka ebyasibwe eribya bibi bukayira.—Emi. 22:3.
4. Erithulira ery’erigholho mukalhua mighisaki?
4 Emighisa: Omubiiri w’erithulira akalhuma kutsibu thwamabana ab’erithulira. Kandi thwamasangira kutsibu omw’ithulira, ithukendiwathikya bangyi ‘erilhamibwa n’eriminya ndeke omwatsi w’ekwenene.’ (1 Tim. 2:3, 4) Wangana hira h’esyombinduka omwa mibiiri yawu nuku wanga sangira omw’ithulira ly’erigholho?