Mbwino Ekihugho Kino Kikayahwaho?
Obundi wunasi ngoku e Biblia yikakanaya okwa nduli y’ekihugho kino. (1 Yoane 2:17) Mbwino yikamanyisaya erihwaho ly’abandu? Mbwino Ekihugho kukendibya isikukiri ngebe kutse kikendi thoghothibirwa ighuma?
ERISUBIRYA LYE BIBLIA OKWA BIBULYO EBI NI EYIHI!
Ni Byahi Ebithendi Syahwaho?
ABANDU
Ekya Biblia yikabugha: Nyamuhanga ‘mwathahangika ekihugho eribya mulhalha, mwabumbakyo kikalhawemo.’—ISAYA 45:18.
EKIHUGHO
Ekya Biblia yikabugha: “Olhulengo lhughuma lhukalhaba, n’olhundi lhulengo ilhwasa, nikwa ekihugho kikakotha.”—OMUGAMBULI 1:4.
EKYA KIKAMANYISAYA: Erikwamana ne Biblia, ekihugho sikyendi syathoghothibwa kandi kikendisyabya ikine mw’abandu. Neryo kwesi, enduli y’ekihugho yikamanyisayaki?
LENGEKANAYA OKU KINO: E Biblia yikalinganisaya enduli y’ekihugho kino n’ekyabya omwa biro bya Noa. Okwa buthuku obo, ekihugho kyabya ‘kyuswire mw’omwagha,’ kutse obutsurumi. (Enzuko 6:13) Aliwe, Noa abya muthunganene. Neryo Nyamuhanga mwalhamya Noa n’eka yiwe, aliwe mwathoghothya abandu babi omw’ighunga ly’amaghetse. E Biblia yikabya yikakania oko byabya okwa buthuku obo, yikabugha yithi: ‘Ekihugho ky’omughulhu oyo mukyaheribwa omw’ighunga ly’amaghetse.’ (2 Petero 3:6) Eyo y’eyabya nduli y’ekihugho ey’omughulhu oyo. Aliwe ni byahi ebya thoghothibawa? Abandu babi, butsira ekihugho. Kwesi, e Biblia yikabya yikakania okwa nduli y’ekihugho, siyiri manyisaya ekithaka erithoghothibwa. Aliwe, yikamanyisaya erihwaho ly’abandu babi abali okwa kihugho n’ebindu bibi ebikabya omwa kihugho.
Ni Byahi Ebikendi Syahwaho?
EBITSIBU N’OBUBI
Ekya Biblia yikabugha: “Omo kandi kathambi, ababi basyabulirana, egha, wasyasondya omwanya wabu, isibendisyabyaho. Nikwa abakayikehaya basyikalha ndeke omo kihugho, basyayitsemera omo buholho bunene.”—ESYONYIMBO 37:10, 11.
EKYA KIKAMANYISAYA: Erighunga ly’Amaghetse ery’omwa biro bya Noa mulithaghunziraho ighuma obubi. Enyuma w’Erighunga ly’Amaghetse, abandu babi kandi mubakalirya abandu b’engebe. Aliwe Nyamuhanga akisiya iniaghunziraho ighuma obubi. Ngoku omuhandiki w’esyonyimbo abugha: “Ababi basyabulirana.” Nyamuhanga akendi syaghunzaho obubi erilhabira omo Bwami bwiwe, ni bugha ambu, egavumente eyikendi syathabalha abandu abathunganene okwa kihugho iyine elhubulha.
LENGEKANAYA OKU KINO: Mbwino abakathabalha okwa kihugho lino banemwendisya ligha Obwami bwa Nyamuhanga? E Biblia yikakanganaya ngoku sibendi syakolha ekyo. Omo bukiru, bakendi syahakanisya Obwami bwa Nyamuhanga. (Esyonyimbo 2:2) Mukendi syalhwiririraki? Obwami bwa Nyamuhanga bukendi syasuba omo mwanya w’esyogavumente sy’abandu, kandi “nabu bwasyahangana kera na kera.” (Danieli 2:44) Busana naki amathabali w’abandu atholere iniahwaho?
Erithabalha ly’Abandu LITHOLERE IRYAHWAHO
Ekya Biblia yikabugha: “Enzira y’omundu siyiri omw’isi wiwe, kandi siriri omw’isi w’omundu oyukalendera erisondolha olhughendo lhwiwe.”—YEREMIA 10:23.
EKYA KIKAMANYISAYA: Abandu mubathahangikwa ini b’eriyithabalhako. Bakalemawa erithabalha okwa bandi bandu n’erighunzaho ebitsibu.
LENGEKANAYA OKU KINO: Ekitabu Britannica Academic kikabugha kithi esyogavumente sy’abandu si syanga thoka “erighunzaho ebitsibu ng’obunakwa, enzalha, amalhwere, ebitsinduli, esyonyuhi kutse ebindi by’obutsurumi.” Kandi kikalholha embere kithi: “Abandi . . . bikirirye bathi egavumente nguma ey’ekihugho kyosi y’eyanga ghunzaho ebitsibu ebyosi ebi.” Aliwe, esyogavumente sy’abandu esyosi nomusyanga yiyunga haghuma, paka ekihugho ikikendibya ikikinathaberwe n’abandu abathahikene abathe banga ghunzaho ebitsibu ebiri ahighulhu ebi. Obwami bwa Nyamuhanga y’egavumente nyisa eyiwithe obuthoki obw’erighunziraho ighuma ebitsibu byosi okwa kihugho.
Neryo erikwamana ne Biblia, enduli y’ekihugho—erihwaho ly’omughulhu mubi ono—si kindu ekya bandu abuwene batholere erisagha. Omwakanya k’ekyo, ni kindu ekyo batholere ibalindirira kundi ekihugho kihya-kihya kya Nyamuhanga ekyuwenenga kikendi suba omwa mwanya w’ekihugho ekitsandire kino!
Ebyosi ebi bikendibya mughulhu wahi? Omwatsi owakakwamako akendi soborera ekye Biblia yikasubiraya.