Ngoku Yehova Akathuwathikaya Eriyiyinia

1. Busana naki thutholere ithwayiyinia, kandi ni buwathikya bwahi obo thuwithe? (1 Petero 5:10)

OMWA biro by’enyuma-nyuma ebikalire bino, abandu ba Yehova batholere ibayiyinia. Abandi balhwere obulhwere obuthelhama. Abandi banemughumira eriholerwa omwanzwa wabu. Nibya n’abandi banemubana erihakanisibwa, obundi erikalhua okwa bahughu babu kutse okwa bathabali b’esyogavumente. (Mt. 10:​18, 36, 37) Ibya iwunayikethere ngoku Yehova anganakuwathikya eriyiyinirya ekitsibu kyosi-kyosi ekyo wunemulhabamo.—Soma 1 Petero 5:10.

2. Amaaka w’Abakristayo aw’eriyiyinia akalhua okundi?

² Eriyiyinia ly’eribya n’amaaka w’erihanda omuthima n’erilholha embere iwunawithe amaha nomuhane ebyanga kulemesya, eriendereribwa, ebitsibu, kutse erilengwako. Ithwe ng’Abakristayo sithwanga bana amaaka w’eriyiyinia okwa lyethu, aliwe akalhua oku Yehova, oyukathuha “amaaka awalhabire aw’obuli kiro.” (2 Kor. 4:7) Omo mwatsi ono, thukendi kania okwa bindu bbini ebyo Yehova abirithuha ebikathuwathikaya eriyiyinia. Kandi thukendi lebya ngoku obuli kighuma ky’okw’ibyo kyanga thughasira.

OMUSABE

3. Busana naki ithwabugha thuthi omusabe ni kithiko-thiko ky’erikanirania?

³ Yehova abirithuha ekindu ekyanga thuwathikya eriyiyinia ekikaswekaya. Abirileka ikyathokekana eribya ithwangana kanirania nayu nomwakine indi sithuhikene. (Ebr. 4:16) Thakilengekaniako: Thwangana saba Yehova okwa ndambi yosi-yosi n’erimubwira ekyosi-kyosi. Akathwowa thwamamusaba omwa mubughe wosi-wosi na hosi-hosi aho thwangabya, nomuthwangabya ithwikere haali kutse ithuli omwa ngomo. (Yona 2:​1, 2; Emib. 16:​25, 26) Thwamahangya-hangya kutsibu erihika okw’ibya isithwanga thoka erimubwira eriyowa lyethu, Yehova akabya inianganaminya ebyo thukanza eribugha. (Abar. 8:​26, 27) Omo kwenene, omusabe ni kithiko-thiko!

4. Busana naki ithwabugha thuthi emisabe yethu ey’erisaba Yehova y’eriyiyinia yihambene n’erisonda liwe?

⁴ Yehova akathukakasaya omwa Kinywe kiwe athi: ‘Thwamamusaba ekyosi-kyosi erikwamana n’erisonda liwe akathwowa.’ (1 Yn. 5:14) Mbwino thwangana saba Yehova thuthi athuwathikaye eriyiyinia? Ee! Erikolha ekyo kihambene n’erisonda liwe. Busana naki ithwabugha thuthya? Thwamayiyinirya ebitsibu, thukaleka Yehova iniathoka erisubirya oyukamutsuma, Sitani Diabolo. (Emi. 27:11) Mbaghane n’ekyo, e Biblia yikabugha yithi Yehova anayitheghekire ‘eriyikangya mw’ow’amaaka busana n’ab’omuthima ahikene okw’iyo.’ (2 Emy. 16:9) Neryo, ithwangana kakasya ngoku Yehova awithe amaaka kandi anzire iniathuwathikya eriyiyinia.—Isa. 30:18; 41:10; Lk. 11:13.

5. Omusabe angathuwathikya athi eribana obuholho? (Isaya 26:3)

⁵ E Biblia yikabugha yithi thwamasaba Yehova erilhua okwa muthima busana n’ebitsibu, ‘obuholho bwa Nyamuhanga obulengire amalengekania wosi bukendi theya emithima [yethu] n’amaaka [wethu].’ (Fil. 4:7) Thalengekania ekyo nga kikamanyisayaki. Abandu abathe kolera Yehova bakabana ebitsibu, kandi bakalengaho erisondya obuholho omwa syonzira muthina-muthina. Ng’eky’erileberyako, abandi bakakolesaya enzira ndebe y’erighanirya nuku bayilhusayemu ebirengekanio ebyosi, imwamune n’erihangya-hangya. Eriyilhusyamu ebirengekanio ebyosi omwa nzira eyi ni ky’akabi bunyakirimu. (Thasyalebaya na Matayo 12:​43-45.) Mbaghane n’ekyo, obuholho obo Yehova akathuha thukasaba bulengire kutsibu obuholho bwosi-bwosi obo omundu angabana omw’ighanirya eriri ng’eryo. Thukabya thukasaba Yehova, thukabya ithukakanganaya ku thumuyikethere kutsibu kandi akathuha obuholho obuthehwa. (Soma Isaya 26:3.) Enzira nguma eyo Yehova akakoleramo ekyo, ly’erithuwathikya eryibuka ekwenene eyo thwabir’igha eyikathuhumulikanaya eyiri omwa Kinywe kiwe. Ekwenene eyo yikaleka ithwathekana omo bulengekania n’omwa muthima kundi thunasi ngoku Yehova athutsomene kandi anzire ithwathoka.—Esy. 62:​1, 2.

6. Wanga kolhaki erithoka erighasirwa ndeke omwa musabe? (Lebaya n’ekisasani.)

⁶ Ekyo wanga kolha. Wukayiyinirya ekindu ekikalenga okw’ikirirya lyawu, “wughusire Omwami Mukulhu y’amalighe wawu” kandi wumusabe obuholho bwiwe. (Esy. 55:22) Kandi wusabe amenge agho wukayithagha erithoka erighumira ebitsibu ebyo wukalhabamu. (Emi. 2:​10, 11) Wukamusaba eriyiyinia, isiwibirirawa erimusima. (Fil. 4:6) Sondekanaya ebikakanganaya ngoku Yehova anemukuwathikya wukalhaba omwa kitsibu, kandi musime busana n’erikusighika. Isiwalighira ekitsibu ekya wukalhabamu kikaleka wukathendi lhangira emighisa eyo wamathabana.—Esy. 16:​5, 6.

EKINYWE KYA NYAMUHANGA

7. Eriyeghesya e Biblia lyanga thuwathikya lithi?

⁷ Yehova abirithuha Ekinywe kiwe nuku thuthoke eriyiyinia. Omwa Biblia muli emilhondo eyikakanganaya ngoku Yehova akathusighika. Thalengekania okwa ky’erileberyako kighuma. Matayo 6:8 hakabugha hathi: “Thatha wenyu anasi ebya mukayithagha nibya isimuli mwamusaba.” Yesu yuwabugha ebinywe ebyo, kandi asi ndeke Yehova kwilhaba owundi mundu wosi-wosi. Busana n’ekyo, sihali ekyanga leka thukathika-thikira eky’eribya Yehova inianzire erithuha ebiyithawa byethu omughulhu thuli omwa bitsibu. E Biblia yine mw’eyindi emyatsi mingyi ng’eyo eyanga leka ithwaghumya eriyisunza lyethu ly’eriyiyinia.—Esy. 94:19.

8. (a) Iha eky’erileberyako ky’omusingyi we Biblia owanga thuwathikya eriyiyinia. (b)Ni kyahi ekyangathuwathikya eryibuka emisingyi ye Biblia yikayithaghisibwa?

⁸ Emisingyi ye Biblia yangana thuwathikya eriyiyinia. Kundi nibya, yiri mw’amenge awangana thuwathikya erikolha erithwamu eryuwene. (Emi. 2:​6, 7) Ng’eky’erileberyako, e Biblia yikathubwira yithi thutsemere obuli kiro ahabwakyo omwakanya k’eriyilhakirira busana n’ebyangabya omwa buthuku obukasa kutse ebithe byangabya. (Mt. 6:34) Thwamabya ithukanasoma Amasako n’erighanirya kugho, ikikendi thwolhobera eryibuka emisingyi eyitholere omughulhu yikayithaghisibawa.

9. Emyatsi ye Biblia yikaleka yithi ithwongera eriyikethera obuwathikya bwa Yehova?

⁹ Kandi e Biblia yirimo emyatsi eyanabya, eyihambire okwa bandu ng’ithwe ababya bayikethere Yehova kandi abo awathikaya. (Ebr. 11:​32-34; Yak. 5:17) Thukabya thukaghanirya okwa myatsi ng’eyo, thukaghumaya eriyikethera lyethu ngoku Yehova ni “busaghiro bwethu n’amaaka wethu, . . . asikire erithuwathikya omwa mughulhu w’obulighe.” (Esy. 46:1) Thukendibya thunemw’igha okwa buthaleghulha bw’abaghombe ba Yehova abakera, kwathunemwendianza thuthya erigherererya erikirirya n’eriyiyinia lyabu.—Yak. 5:​10, 11.

10. Wanga ghasirwa wuthi ndeke omwa Kinywe kya Nyamuhanga ekyo abirithuha?

¹⁰ Ekya wangakolha. Soma e Biblia obuli kiro, kandi handika elisti y’emilhondo eya wukalhangira wuthi yikakuwathikaya. Kandi abangyi babirilhangira ngoku kyuwene eritsuka ekiro omw’isoma erisako lya buli kiro erilhuire omwa Biblia erikabahira mw’omuhwa. Mwali wethu Mariea mwayilhangirira ngoku ekyo kikawathikaya omughulhu thatha wiwe na mama wiwe bapimawamo obulhwere bw’ekansa. Ni kyahi ekyamuwathikaya eriyiyinia akabathwanira? Akabugha athi: “Obuli ngyakya iningasoma erisako erilhua omwa katabu Erilebya Amasako Buli Kiro n’erighanirya kulyo. Erikolha ekyo mughulhu wosi mukyaleka ing’usulya omwa bulengekania bwaghe mw’Amasako awangwathikaya erihwerya amalengekania w’oku Yehova n’eby’akathulhaghanisaya eby’obuthuku obukasa, omwakanya k’eriyihwerya ghoko n’emibere eyikalire eyo nabya inganemulhabamu.”—Esy. 61:2.

ABIKIRIRYA BALIKYETHU

11. Busana naki kyangana thuhimba eriminya ngoku sithuli ithw’ibene thukayiyinirya ebitsibu?

¹¹ Yehova abirithuha balikyethu Abakristayo abakaleka ithwathoka eriyiyinia. Erithaminya ngoku ‘olhughanda lhw’abalikyethu . . . banemubana eriaghalhwa eriri ng’eryo’ kikaleka ithwakakasya ngoku sithuli ithwibene. (1 Pet. 5:9) Omo kwenene, thwangana yikethera ngoku ebyosi ebyo thwangalhabamu, n’abandi nabo babiribilhabamu, kandi babiriyiyiniryabyo. Eki kikakanganaya ngoku nethu thwanganayiyinia!—Emib. 14:22.

12. Abikirirya balikyethu banga thuwathikya bathi, nethu ni kyahi ekya thwanga bakolera? (2 Abanya Korinto 1:​3, 4)

¹² Thukendibya thunemuyiyinia, abaramya balikyethu bakendi thuhimba. Omukwenda Paulo mwayilhangirira ekyo. Mughulhu mungyi iniakasima ababya bakamuwathikya omughulhu aboherawa omwa nyumba omw’ahulha amena wabo. Mubahumulikania Paulo, bamamuhimba, n’erimuha obuwathikya. (Fil. 2:​25, 29, 30; Kol. 4:​10, 11) Namunabwire thwangana bana ebitsibu ebiri ng’ebyo. Thukabya thukayithagha obuwathikya bw’eriyiyinia, balikyethu bakathuwathikaya; nabu bamayithagha obuwathikya, thukabya ithunayitheghekire eribawathikya.—Soma 2 Abanya Korinto 1:​3, 4.

13. Ni kyahi ekyaleka mwali wethu Maya iniayiyinia?

¹³ Balikyethu mubahimba kutsibu mwali wethu we Russia ya Maya. Omwa 2020, enyumba yiwe muyaseremburwa, kandi enyuma waho mwathonganisibwa busana n’eribwira abandi b’okwa eby’ikirirye. Maya akabugha athi: “Omughulhu nabya inabirilhuha omw’iyowa, balikyethu mubanyitherera n’erinyihandikira, erinyikakasya ku banyanzire, nabya inganasi ngoku ngawithe olhughanda lhunene olhuli mw’olhwanzo. Aliwe eritsuka 2020, nabirithasyongera erikakasya eki ndeke-ndeke.”

14. Thwanga ghasirwa thuthi omwa buwathikya bw’abaramya balikyethu thunemuyiyinia? (Lebaya n’ekisasani.)

¹⁴ Ekyo wangakolha. Wukayiyinia, ibya iwune haghuma n’abalikyenyu Abakristayo. Isiwasagha erisaba abasyakulhu b’obuwathikya. Banganabya “ah’eribisama erihunga, ng’obuwamo bw’embulha nene.” (Isa. 32:2) Kandi wibuke ngoku n’Abakristayo balikyenyu banemuyiyinirya ebitsibu. Erikolera omundu mulebe oyuli omwa buyithawa y’ekindu ky’olhukeri kikendi kuwathikya eribya iwunawithe amalengekania awatholere wukayiyinirya ekitsibu kyawu.—Emib. 20:35.

AMAHA WETHU

15. Amaha abiriwathikya athi abathaleghulha, imwamune na Yesu? (Abaebrania 12:2)

¹⁵ Yehova abirithuha amaha awaghumire erithuwathikya eriyiyinia. (Abar. 15:13) Ibuka ngoku amaha awathikaya Yesu eriyiyinia okwa kiro ekikalire kutsibu omwa ngebe yiwe okwa kihugho. (Soma Abaebrania 12:2.) Yesu mwaminya ngoku obuthaleghulha bwiwe bwanga lekire erina lya Yehova iryahebwa olhukengerwa. Kandi Yesu abya inianalindirire kutsibu erithasyabya haghuma na Thatha wiwe n’enyuma waho erisyakolha haghuma n’abahakabibwa omwa Bwami bw’elhubulha. Kuthya, amaha wethu aw’erisyabyaho kera na kera okwa kihugho kihya-kihya kya Nyamuhanga akathuwathikaya eriyiyinirya ekitsibu kyosi-kyosi ekyanga thuhikako omwa kihugho kya Sitani kino.

16. Amaha mwawathikya athi mwali wethu mulebe eriyiyinia, kandi ebyo abugha bikakweghesayaki?

¹⁶ Lebaya ngoku amaha w’obwami awathikaya mwali wethu owe Russia ya Anna, oyo mwira wiwe ahambawa n’erihirwa omwa ngomo anemulindirira erithonganisibwa. Eki kyabere kikabya, Anna mwabugha athi: “Erisaba busana n’amaha wethu aw’omwa buthuku obukasa n’erighanirya kugho kikaleka ingathahwera ighuma amani. Nganasi ngoku engebe siyendi lholha embere yithya. Yehova akendi singura, nethu kuthya.”

17. Thwanga kangania thuthi ku thukatsemera amaha wethu awaseghemere okwa Biblia? (Lebaya n’ekisasani.)

¹⁷ Ekya wangakolha. Hiraho endambi y’erilengekania okwa buthuku obuwenenga obukasa obo Yehova athutheghekere. Yilhangire iwune omwa kihugho kihya-kihya kya Nyamuhanga n’erithera akasasani k’emighisa eyo thukendi syathunga. Neryo ekitsibu kyosi-kyosi ekyo thwanga bana lino ikikendibya nga ‘ni ky’obuthuku buke kandi nga kyanguhirire.’ (2 Kor. 4:17) Kandi kolha ngoku wanga thoka eribwira abandi okwa ebya w’ikirirye. Lengekanaya nga kitholere eribya ikikakalira bungahi abandu abathe ramaya Yehova erighumira ebitsibu ebiri omwa kihugho kya Sitani isibasi ekighendererwa kya Nyamuhanga eky’omwa buthuku obukasa. Wangana leka ibanza eriminya bingyi okwa maha wethu w’Obwami nibya n’omw’ibakanirya ebindu bike buyira.

18. Busana naki ithwayikethera milhaghe ya Yehova?

¹⁸ Yobu abere abirithoka eriyiyinirya ebitsibu bingyi, mwabwira Yehova athi: “Nganasi ku wukathoka erikolha emyatsi yosi, isihali ebyo wukandayirire ebikendi syakubibwa.” (Yobu 42:2) Ngoku Yobu anaminya, sihali ekyosi-kyosi ekyangalemesya Yehova eriberererya ekighendererwa kiwe. Eriminya ekyo kyangana thughumya thukayiyinia. Ng’eky’erileberyako, thathera akasasani omukali inianahwere amani ahabw’eribya inialhwere obulhwere obo abadokita bangyi babirilemwa erithambira. Aliwe, omughulhu omudokita oyuwasi bingyi kandi oyo abangyi bakayikethera akabana obulhwere bwiwe n’erimusoborera ng’akendi thambira athi obulhwere bwiwe, akathekana nomwakine indi kikendithwalha buthuku iyo erilhama. Okwa ndambi eyo anganayiyinia, kundi anawithe amaha amabuya—amaha w’eribya iniakendilhama. Omwa nzira iyan’eyo, ithwe eriyikethera amaha we Paradiso ikikendi leka ithwayiyinia.

19. Ni byahi ebyo thukayithagha erithoka eriyiyinia?

¹⁹ Ngoku thwamabirilhangira, Yehova akathuwathikaya eriyiyinirya ebitsibu byethu erilhabira omwa musabe, Ekinywe kiwe, abaramya balikyethu, n’amaha wethu. Thwamakolesya ndeke ebindu ebi, Yehova iniakendi thuwathikya erilhaba omwa kitsibu kyosi-kyosi ekyo thwangabana erihika aho ebitsibu by’omwa mughulhu wa Sitani bikendisyabya isibikiriho.—Fil. 4:13.