“Muyithunde hakuhi na Nyamuhanga, nayu akendiyithunda hakuhi nenyu”—Yakobo 4:8
Nyamuhanga Akanowa Emisabe Yethu?
Wunewathayibulya Nyamuhanga ng’akanakuhulikirira wukasaba? Kyamabya ikwakiri kithya, siwe musa. Abangyi babirisaba Nyamuhanga busana n’ebitsibu birebe, aliwe ibithahwaho. Mbwino ekyo kikamanyisaya kithi Nyamuhanga akagheghena emisabe yethu? Eyihi! E Biblia yikathubwira yithi Nyamuhanga akathuhulikirira thwamamusaba omwa nzira eyihikire. Thulebaye ebya Biblia yikabugha.
NYAMUHANGA ANAHULIKIRIRE.
“Kusangwa wukasubiraya erisaba, abandu bosi basyakuhikako.”—Esyonyimbo 65:2.
Abandi bandu bakasaba kundi bathi kikaleka ibayowa ndeke, nomwakine indi b’ikirirye bathi sihali oyukabahulikirira. Aliwe omusabe si kindu ky’erikolha habw’erithathuwathikya erighumira ebitsibu lisa. E Biblia yikathukakasaya yithi Yehovaa “ali hakuhi oko bosi abakamubirikira, ali hakuhi oko bosi bakamubirikira n’ekwenene. . . . Akowa erilhaka lyabu, akalhamayabo.”—Esyonyimbo 145:18, 19.
Neryo thwangana kakasya ngoku Yehova Nyamuhanga akowa emisabe y’abaramya biwe. Omo lhwanzo akabugha athi: “Mwasyanyilhakira, kandi mwasyasa n’erinyisaba, naghe nasyabahulikirira.”—Yeremia 29:12.
NYAMUHANGA ANZIRE IWAMUSABA.
‘Yitsingirire omw’isaba.’—Abanya Roma 12:12.
Omwa Biblia, thukahirawa mw’omuhwa ‘w’eribya thukasaba’ kandi “omo mighulhu yosi.” Ahathe erithika-thika, Yehova Nyamuhanga anzire ithwamusaba.—Matayo 26:41; Abanya Efeso 6:18.
Busana naki Nyamuhanga anzire ithwamusaba? Lengekanaya oku kino: Ni mubuthi wahi oyuthe wanganza omwana wiwe akamubwira athi, “Thatha, nyiwathikaye.” Ni kwenene, thatha anganabya inianasi ebiyithawa n’eriyowa ly’omwana wiwe, aliwe akabya akowa ebinywe ebyo, kikamukanganaya ngoku omwana wiwe amuyikethere kandi ku ni munywani wiwe. Kuthya, thukabya thukasaba Yehova Nyamuhanga, thukakanganaya ku thumuyikethere kandi ku thwanzire eribya banywani biwe.—Emisyo 15:8; Yakobo 4:8.
NYAMUHANGA AKUTSOMENE KUTSIBU.
“Muhire erihangya-hangya lyenyu lyosi oku Nyamuhanga, kusangwa akabatheghaya.”—1 Petero 5:7.
Nyamuhanga anzire ithwamusaba kundi athwanzire kandi athutsomene. Anasi ndeke ebitsibu n’erihangya-hangya lyethu, kandi anzire erithuwathikya.
Omwa ngebe yiwe yosi, Omwami Dawudi iniakasaba Yehova y’obuwathikya n’erimubwira amalengekania n’eriyowa liwe. (Esyonyimbo 23:1-6) Nyamuhanga mwalhangira athi Dawudi? Nyamuhanga mwanza Dawudi kandi mwahulikirira emisabe yiwe mingyi. (Emibiri 13:22) Nyamuhanga ku akanahulikirira athya emisabe yethu kundi athutsomene.
“NYANZIRE OMWAMI MUKULHU, KUSANGWA AKANYOWA”
Ebyo ni binywe by’omughuma w’okwa bahandiki b’esyonyimbo omwa Biblia. Abya akakasirye ngoku Nyamuhanga akowa emisabe yiwe, kandi ekyo mukyamuwathikya kutsibu. Mwayowa iniali bughuma ndeke na Nyamuhanga kandi mwabana akaghalha k’erighumira ebitsibu n’amalighe w’engebe.—Esyonyimbo 116:1-9.
Thwamaminya ngoku Nyamuhanga akahulikirira emisabe yethu, ithukendi lholha embere erikania nayu. Lengekanaya okwa ky’erileberyako kya Pedro, oyuwikere e Spain. Mughalha wiwe ow’emyaka 19 mwaholera omwa aksidenti. Omwa bulighe bwiwe obo, Pedro mwabwira Nyamuhanga y’eriyowa liwe kandi mwasaba kutsibu erihumulikanibwa n’obuwathikya. Mubyabya bithi? Pedro akabugha athi: “Yehova mwasubirya emisabe yaghe erilhabira omw’ihumulikania n’obuwathikya ebyo Abakristayo balikyethu bathuha ingye na mukali waghe.”
Mughulhu mungyi emisabe yethu yikasubiribawa erilhabira omw’ihumulikania n’obuwathikya bw’abanywani bethu abathutsomene
Nomwakine indi emisabe muyithasubya mughalha wiwe, muyawathikya Pedro n’eka yiwe ya kutsibu. Mukali wiwe, ya María Carmen, akabugha athi: “Emisabe muyanyiwathikya erighumira obulighe. Munaminya ngoku Yehova Nyamuhanga ananyasi kundi iningabya nabirisaba iningayowa buholho kandi inathekana.”
Ebiri omwa Biblia n’ebyalholirweko bikakanganaya ndeke-ndeke ngoku Nyamuhanga akahulikirira emisabe. Aliwe kandi, kilhangirikire ngoku Nyamuhanga syalisubiraya emisabe yosi. Busana naki Nyamuhanga akasubiraya eyindi misabe n’eyindi iniathasubiryayo?
a Yehova ni rina lya Nyamuhanga.—Esyonyimbo 83:18, NW.