Wangana Rwanisya Sitani Iwasinga!

1. (a) Busana naki erirwanisya Sitani kikayithaghisibawa kutsibu lino? (b) Thukaminya thuthi ngoku kithokekene erisingura amalhwa awathukalhwa na Sitani?

SITANI anemurwanisya emisighalira y’okwa bahakabibwa “n’esindi mbuli.” (Yn. 10:16) Ekilhubirirwa kya Diabolo ly’erimera abaghombe ba Yehova banene omwa kathambi kake ak’akiwithe. (Soma Eribisulirwa 12:9, 12.) Ithwanasingura amalhwa awathukalhwa na Sitani? Ee! E Biblia yithi: ‘Mulhwe na Sitani, nayu akendi basagha.’​—Yak. 4:7.

2, 3. (a) Amalengekania aw’eribunga indi Sitani syaliho akathasyaha athi Sitani y’omutsundo? (b) Wukaminya wuthi ngoku Sitani aneho?

² Abanene bakabugha bathi Sitani syali naho. Okw’ibo Sitani n’esyombinga ni bindu by’eriyipika-pikira ebiri omwa bitabu by’esyongano, esyofilimu, n’emisathu y’esyovidiyo. Abandu ng’abo bakayowa bathi omundu oyuwithe amenge syang’ikirirya athi hane emirimu mibi. Wukalengekanaya Sitani analeghene omughulhu iyo n’esyombinga siwe bakakanibawako ng’abatheho? Eyihi! Kundi nibya eki kikaleka ikyolhobera Sitani eriliba obulengekania bw’abakathika-thikira eribyaho liwe. (2 Kor. 4:4) Erikulha-kulhania amalengekania aw’eribugha indi sihali esyombinga ni nguma y’okwa syonzira esya Sitani akakolesaya erithebya abandu.

³ Ithwe ng’abaghombe ba Yehova sithuli omw’abo abakathebibawa. Thunasi ngoku Sitani aneho kundi nibya yuwakanaya na Eva omw’ikolesya enzoka. (Enz. 3:1-5) Sitani mwasiningulira Yehova omo mwatsi wa Yobu. (Yobu 1:9-12) Sitani yuwanalengesaya erilenga oku Yesu. (Mt. 4:1-10) Obwami bwa Nyamuhanga bwabere bwabiritsuka erithabalha 1914, Sitani yuwatsuka amalhwa ‘aw’erilhwa’ n’emisighalira y’abahakabibwa. (Erib. 12:17) Amalhwa aya akinalholha embere Sitani akanza erighunzaho erikirirya ly’emisighalira ey’okwa 144,000 n’esindi mbuli. Erisingura amalhwa aya, thutholere ithwarwanisya Sitani ithunasikire omw’ikirirya. Omwatsi ono akakanaya okwa syonzira isathu esy’erikolera mw’ekyo.

ERIYIHIGHULHA OKWA MIYIHEKO

4. Sitani abiriyikangania athi ngoku uswire mw’emiyiheko?

⁴ Sitani uswire mw’emiyiheko. Omwa kwenene, ekihangikwa ky’ekirimu eki eribya ikyangana yihambalika erihakanisya ehamuli ya Yehova ey’erithabalha n’eriyikolha mwa yindi nyamuhanga, kikakanganaya emiyiheko n’emiyilhabiriryo. Busana n’ekyo, enzira nguma ey’erirwanisya Sitani ly’eriyihighulha okwa miyiheko neryo ithwakangania eriyikehya.​—Soma 1 Petero 5:5.

5, 6. (a) Mbwino nina kibi eriyihalhamba okwa lhulengo lhulebe? Soborera. (b) Ni by’erileberyako byahi omwa Biblia ebikakanganaya ngoku ni ky’akabi eribya n’emiyiheko?

⁵ Okwa bundi buthuku sikibi eriyowa iwangana thoka ekindu n’eriyowa iwangana hebwa ekitsumbi, eriyihalhamba kutse eriyisyetha kundi iwe kutse banywani bawu babirikolha kutse erithunga ekindu ekyuwene. Omukwenda Paulo mwabugha athi: ‘Ekyo kikaleka ithwayihalhamba busana nenyu omwa kathi-kathi k’amakanisa wa Nyamuhanga. Thukayihalhamba busana n’eriyiyinia lyenyu n’erikirirya lyenyu omw’endereribwa lyenyu lyosi, n’amalighe wenyu, ebyo mukaghalhawamu.’ (2 Tes. 1:4) Neryo eriyisyetha busana n’ekibuya eky’abandi balyakolha n’eriyihalhamba okwa lhulengo lhulebe kyanganaleka ithwayowa ndeke. Ng’eky’erileberyako, eka eya thubuthirwemu kutse aho thukulire, siby’erikwir’isoni.​—Emib. 21:39.

⁶ Aliriryo hane eriyihalhamba ery’emiyiheko eryangana tsandya engolangana yethu n’abandi n’obughuma bwethu na Yehova. Emiyiheko ng’eyi yanganaleka ithwaghana erihabulha erya thukahebawa kutse nibya ithwahithana omwakanya k’eriyikehya, thukalirigha. (Esy. 141:5) Emiyiheko eyi ly’eriyikokolhomya kutse eriyilhangira nga wulengire abandi. Yehova aponire emiyiheko. (Eze. 33:28) Aliwe Sitani akatsema akalhangira abandu bakayiheka kundi nayu kw’alyathya. Sitani k’angabya imwayitsangura akalhangira emiyiheko ya Nimurodi, Farao, na Abusaloma! (Enz. 10:8, 9; Eri. 5:1, 2; 2 Sam. 15:4-6) Emiyiheko y’eyanaleka na Kaina iniatsanda. Nyamuhanga iyuwene-wene mwamukunga aliwe emiyiheko yiwe yabya minene indi syanga ligha erihabulhwa. Emiyiheko yiwe muyaleka iniaghana erihabulha lya Yehova neryo kyamamulethera ebitsibu.​—Enz. 4:6-8.

7, 8. (a) Akasolholho niki, kandi kakakanganaya kathi emiyiheko? (b) Soborera ngoku emiyiheko yanga thabulha ekithunga.

⁷ Munabwire abandu bakakanganaya emiyiheko omwa nzira nyingyi, ikyalhwiririra mw’ebitsibu. Okwa bundi buthuku akasolholho kakalethawa busana n’emiyiheko. Edikisyonare nguma yikasoborera ngoku akasolholho “ly’eripona abandu ab’omwa sindi nganda” kandi yithi “ly’erikirirya wuthi ab’eyindi rangyi ni bambaghane okwa bandi omwa emibere yosi n’ebya bakathoka erikolha, kandi ngoku abandi ibo bakabuthawa ibalengire kutsibu abandi.” Amalengekania ng’aya abirileka ihabya akatabanguko, esyonyuhi, n’abandu er’ithangana.

⁸ Ni kwenene, ebindu ng’ebi sibitholere bikabanika omwa kithunga. Aliriryo, erithendi yitheghererangania omo balikyethu, erikanabyaho okwa bundi buthuku busana n’emiyiheko, lyangana lhwiririra mw’ebindi bitsibu bingyi. Ekyo ky’ekyahika okwa bandi Bakristayo omwa kighonye ky’erimbere, abo Yakobo ahandikira athi: ‘Erineghena n’amalhwa omo kathi-kathi kenyu bikalhua hayi kwehi?’ (Yak. 4:1) Omwa kwenene, obuyighu obwa wuwithe omwa muthima n’eriyowa nga wulengire abandi kyangana lhangirika omwa bya wukabugha n’erikolha, neryo ikyahithania abandi. (Emi. 12:18) Kwesi, emiyiheko yangana thabulha ekithunga.

9. E Biblia yikathuwathikaya yithi erirwanisya akasolholho n’obuli mulingo wosi w’emiyiheko? (Lebaya ekisasani ekiri okw’itsuka.)

⁹ Thwamabya ithuwithe omubere ow’eriyowa nga thulengire abandi, thutholere ithw’ibuka ngoku ‘obuli mundu oyukayipipa omwa muthima ni nye oko Mwami Mukulhu.’ (Emi. 16:5) Kandi ikikendibya kibuya eriyirebya nga thuwithe malengekaniaki okwa bandu ab’eyindi rangyi, ab’ekindi kihugho, kutse ab’eyindi mibere. Thwamayowa nga thulengire abandi, ithukendibya ithwamibirirwa ngoku Nyamuhanga erilhabira omwa ‘mundu mughuma mwahangika ebihanda byosi by’abandu.’ (Emib. 17:26) Ekyo kikakanganaya ngoku ithwe bosi thuli mundu mughuma kundi thulhuire omu Adamu. Busana n’ekyo, ni ky’obukiru erilengekania thuthi abandi bakabuthawa ibalengire abandi. Amalengekania ng’ayo iniakendi kulha-kulhania emitheghekere ya Sitani ey’erighunza h’olhwanzo n’obughuma bwethu obw’Ekikrisitayo. (Yn. 13:35) Erithoka erisingura Sitani, thutholere ithwaghana obuli mulingo wosi w’emiyiheko.​—Emi. 16:18.

YIHIGHULE OKWANZA EBINDU N’EKIHUGHO

10, 11. (a) Busana naki kyolhobire erianza ekihugho? (b) Dema angabya imwakangania athi kwanzire ekihugho?

¹⁰ Sitani ya ‘muthabali w’ekihugho kino,’ kandi kiri omwa buthoki bwiwe. (Yn. 12:31; 1 Yn. 5:19) Busana n’ekyo, ebya kihugho kino kikakulha-kulhanaya bikahukana n’ebihano bye Biblia. Aliwe, sikirimanyisaya kithi ebyosi ebiri omwa kihugho ni bibi. Nomwabine, thutholere ithwakiminya ngoku Sitani akendi kolesya ekihugho ekiri omwa buthoki bwiwe eki erianza thukolesaye esyongumbu syethu sya nabi n’erianza thukole ekibi kutse erithuhira mw’omuthima ow’erianza ekihugho nuku thuleke eriramya Yehova.​—Soma 1 Yoane 2:15, 16.

¹¹ Kilhangirikire ngoku abandi Bakristayo omwa kighonye ky’erimbere mubanza ekihugho. Ng’eky’erileberyako, Paulo mwahandika athi: “Dema abirinyitswako . . . kusangwa abirianza emyatsi y’ekihug[h]o kino.” (2 Tim. 4:10) E Biblia siyirithubwira ebyenyine-nyine ebya Dema anza omwa kihugho, ebyaleka iniatswa oku Paulo. Obundi Dema mwatsuka erianza eby’ekinyamubiri kwilhaba eby’obunyakirimu. Kyamabya ikukyabya kithya, Dema imwathalha okwa syonzunzo mbuya esy’obunyakirimu. Obo inamasithalira kwaki? Dema anganabanire omwa kihugho mw’ebirengire emighisa eya Yehova angamuhere iniane mukolha na Paulo?​—Emi. 10:22.

12. Thwangawa thuthi omwa kithegho ‘eky’amathebo w’ebindu’?

¹² Ekindu ng’eki kyangana thuhikako. Ithwe ng’Abakristayo, thunawithe eriyisunza eritholere ery’eriyibanira ebya thukayithagha haghuma n’ab’eka yethu. (1 Tim. 5:8) Yehova anzire ithwabya omwa ngebe eyuwene, kandi ekyo kikalhangirika thwamalengekania okw’irima eryuwene ery’aha Adamu na Eva. (Enz. 2:9) Aliriryo Sitani angana hengemya eriyisunza eryo omwa ‘mathebo w’ebindu.’ (Mt. 13:22) Abanene bakalengekanaya bathi esyosente sy’esikaletha etseme kutse bathi eribya n’ebindu wukabya iwamathoka. Thwamabya n’amalengekania ng’ayo, ithwamathebwa, kandi anganaleka ithwaherya ekindu ky’obughuli ekya thuwithe, nakyo ibw’obughuma bwethu na Yehova. Yesu mwahabulha athi: ‘Sihali mundu oyo wangathoka erikolera abakama babiri; kusangwa asyakwa omughuma y’obusu, n’erianza owundi. Kutse asyabeghera okwa mughuma, iniapona owundi. Simwangathoka erikolera Nyamuhanga n’ebindu.’ (Mt. 6:24) Thwamabya ithukakolera ebindu bisa, ithukendibya isithukikolera Yehova, kandi ekyo kya Sitani anzire ithwakolha! Ambi isithwalighira esyosente kutse ebindu eritsandya obughuma bwethu na Yehova. Erithoka erirwanisya Sitani, thutholere ithwabya n’amalengekania awatholere okwa bindu by’omubiri.​—Soma 1 Timoteo 6:6-10.

GHANA EBY’OBUSINGIRI

13. Munabwire abandu babirikulha-kulhania bathi amalengekania mabi okwa butheke n’emyatsi y’engyingo?

¹³ Owundi muthegho omwa kihugho kya Sitani bw’obusingiri. Munabwire, abandu bangyi bakalhangira nga sikikitholere eriyibohera okwa mundu mughuma omwa butheke. Ng’eky’erileberyako, omukali mughuma oyuwasibwe omwa syofilimu mwabugha athi: “Sikyanga thokekana omwa butheke eribya wuthawithe muraghane. Singasi ngahane oyutheghenda eyihya kutse oyuthe wanganza erikikolha.” Owundi w’obulhume athi: “Singasi nganina ky’obuhangiranwa eribya n’omundu mughuma omwa ngebe yawu yosi.” Sitani k’angabya iniakatsema abandu abasibwe ng’aba bakakinia endegheka ya Nyamuhanga ey’obutheke. Ahathe erithika-thika Sitani syalisighika nahake endegheka eyi kandi syatsomene nomuyangalemwa. Erithoka erisingura Sitani, thutholere ithwasighika endegheka ya Nyamuhanga ey’obutheke.

14, 15. Thwanga yihighulha thuthi okwa busingiri?

¹⁴ Mbulha thuli omwa butheke kutse eyihi, thutholere ithwaghanir’ighuma eby’obusingiri. Mbwino nina kyolho? Eyihi nahake! Ng’eky’erileberyako, wamabya iwuli munyethu, wanganabya iwukan’owa abandi abawukasoma nabu ibanemuyipanga busana n’ababamathakesya nabu kutse ababakathetha. E Biblia yithi: ‘Oyukasingira akahalhaya okwa mubiri wiwe.’ (1 Kor. 6:18) Abandu bangyi babiriaghalhwa n’eriholha busana n’amalhwere aw’akalethawa n’obusingiri. Kandi abahuru bangyi ababiriyitsandya omwa busingiri ibakine minyethu bakabugha bathi bakayikubaya bwomo. Ebiri omwa syonyimbo n’esyovidiyo byangana leka ithwalengekania thuthi mbwino obusingiri sibuwithe kitsibu, neryo ikyaleka ithwathwa ebihano bya Nyamuhanga. Amalengekania ng’ayo akaleka abandu ‘ibathebibwa n’ebibi.’​—Ebr. 3:13.

¹⁵ Ni kyahi ekya wangakolha wamabya iwunemubana ebyanga leka iwakolha obusingiri? Minya obulemwa bwawu. (Abar. 7:22, 23) Saba Nyamuhanga akuhe akaghalha. (Fil. 4:6, 7, 13) Yihighule okwa byangaleka iwasingira. (Emi. 22:3) Kandi omughulhu erilengwako likakuhikako ambi ikuwanaghana wuthya.​—Enz. 39:12.

16. Yesu mwakolhaki akalengwako na Sitani, kandi eki kikathweghesayaki?

¹⁶ Yesu mwathuhirira h’eky’erileberyako ekyuwene omw’ighana erilengwako. Mwathathebibwa omwa bya Sitani amulhagha, kandi nibya mwathabihererya n’obuthuku obw’erilengekania nga byangana mughasira kutse eyihi. Aliriryo, aho n’aho mwasubirya athi: ‘Amasako athi.’ (Soma Matayo 4:4-10.) Yesu abya inianasi Amasako, neryo eki mukyaleka iniathoka erisubirya aho n’aho omw’ikolesya Amasako akalengekwako. Erithoka erisingura Sitani, sithutholere thukayihira omwa mibere eyangaleka ithwasingira.​—1 Kor. 6:9, 10.

SINGURA AMALHWA OMW’IYIYINIA

17, 18. (a) Ni bindi byahi ebya Sitani akakolesaya omw’ithurwanisya, kandi busana naki si kitholere kikathuswekya? (b) Ni kyahi ekikendi hika oku Sitani, kandi kikakuwathikaya kithi eriyiyinia?

¹⁷ Emiyiheko, eryanza ebindu, n’obusingiri ni bisathu by’okwa bya Sitani akakolesaya omwa buthebya bwiwe. Anawithe n’ebindi bingyi. Ng’eky’erileberyako, abandi Bakristayo bak’endereribawa n’abahughu babu, ibasekereribwa n’ababakasoma nabu, kutse egavumente erithanga omubiiri wabu w’erithulira. Ebitsibu ng’ebi sibirithuswekaya, kundi Yesu abya iniabiribwira abigha biwe athi: ‘Abandu bosi basyabakwa obusu busana n’erina lyaghe. Nikwa oyuwasyayiyinia erihika okwa nduli, yuwasyalhamibwa.’​—Mt. 10:22.

¹⁸ Thwanga rwanisya thuthi Sitani n’erisingura? Yesu mwabwira abigha biwe athi: ‘Busana n’erihathikana lyenyu, mwasyabana esyongebe syenyu.’ (Lk. 21:19) Sihali ekya mundu wosi-wosi anga thukolhako ekyanga thwaghalya kera na kera. Sihali oyuwanga thughabulha oku Yehova mbwino ithunalyayanzira. (Abar. 8:38, 39) Sitani nomwang’itha abaghombe ba Yehova, akabya isyathasingura, kundi Yehova akendi syabalhubukya! (Yn. 5:28, 29) Nibya omwa buthuku bw’embere, Sitani ni w’erihwaho. Omulembe wiwe mubi akendibya abirithoghothibwa, Sitani akendi syaghuswa omwa buhya habw’emyaka 1,000. (Erib. 20:1-3) Neryo Emyaka Rukumi y’Erithabalha lya Yesu yikendi syabya yahwa, Sitani akendi ‘syaboholhwa omwa muliki’ habw’akathambi kake nuku angalengesya erithebya abandu abahikene engendo y’erighunzerera. Enyuma waho, Sitani iniathoghothibwa. (Erib. 20:7-10) Sitani iyo ni w’erihwaho, aliriryo okw’iwe kwa bithe bithya! Rwanisaya Sitani iwunasikire omw’ikirirya. Wangana thoka erirwanisya Sitani iwasingura!