Ngoku Thwanga Thulira Ndeke Okwa Mbalhu
1. Ni nzira nguma yahi eyathwanga gherererya mu Yesu?
1 Omwa mubiiri wiwe ow’erithulira ow’okwa kihugho, Yesu mwatha keta-keta erikania n’abandu abeghaya omwa nzira n’omwa yindi myanya eyikabya mw’abandu bangyi. (Lk. 9:57-61; Yn. 4:7) Abya anzire iniabwira abandu bangyi b’omwatsi wiwe mukulhu oyu. Munabwire, erithulira okwa mbalhu ni nzira mbuya ey’eriwathikya abandu eribana amenge wa Nyamuhanga. (Emi. 1:20) Thukendi thoka erikolha eki thwamahika okw’abandu n’erikolesya amenge.
2. Erihika okw’abandu thukathulira okwa mbalhu mwa muli erikolha ki?
2 Hika okw’Abandu: Ni kibuya erihika okw’abandu omwakanya k’erimana kutse er’ikalha haghuma erilindirira abandu abakalhaba erikuhikako. Senyenyeraya omundu, musamalire omwa busu, kandi kanaya nayu iwunahumulikene n’omw’olhwanzo. Wamabya iwukakolha n’abandi bathuliri, mughulhu mungyi ni kibuya omuthuliri mughuma eriyakania n’omundu. Kandi kikendi kuyithaghisya erilengaho erihira h’emitheghekere ey’eritha syakania n’abakanzisibawa. Kyamathokekana, mukaghunza omukania, bulhaya omundu oyo nga wanga thasyamubana wuthi. Abandi bathuliri bakathulira okwa mbalhu mughulhu wosi omwa kitsweka kighumerera, ikya bathokesya erikania n’abandu baghumerere mirundi mingyi neryo ibakulha-kulhania erianzisibwa lyabu.
3. Thwanga kolesya thuthi amenge thukathulira okwa mbalhu?
3 Kolesaya Amenge: Kolesaya amenge wukathwamu erilebya aha wang’imana n’abandu abawanga kania nabu. Sikiri yithaghisaya erikania n’obuli mundu wosi oyukalhaba. Yitheghereraye ndeke. Ng’eky’erileberyako, omundu amabya iniakaghenda lhuba-lhuba, kyanganabya kibuya erithendi kania nayu. Wamabya iwukathulira ahakakolerawa esuburu, kolesaya amenge nuku siwuleke omwinye suburu akayilhalikirira wukakania n’abakamukolera. Ni kibuya erithulira abandu bakalhua ng’omwa duka omwakanya k’eribathulira bak’ingira. Hika okw’abandu omwa nzira eyithendi leka bakayilhalikirira. Kandi, kolesaya amenge wukaghaba ebitabu. Abandu bamakangania erianzisibwa like, wanganabaha etrakit omwakanya k’esyogazeti.
4. Busana naki erithulira okwa mbalhu ni nzira mbuya eyikatsemesaya ey’erithuliramu?
4 Erithulira okwa mbalhu likaleka ithwathoka eritsatsanga embutho y’ekwenene omw’akathambi kake. (Omu. 11:6) Abandi bandu abathukeghaya banganabya ib’abandu abathutheghaya omwa miyi yabu thukathulira nyumba kwa nyumba. Busana naki imuthahira h’emitheghekere ey’erisangira omw’ithulira okwa mbalhu, enzira mbuya eyikatsemesaya ey’erithuliramu?