‘Ku Kyakutsemesaya Kithya omo Meso Wawu’

1. Ni kyahi ekyaleka Yesu ‘iniatsema kutsibu omwa mulimu abuyirire’? (Lebaya ekisasani ekiri okw’itsuka.)

THATHERA akasasani nga kyabya kithi erilhangira Yesu Kristo ‘iniabiritsema kutsibu omwa mulimu abuyirire’? Obundi iwangana lhangira inianasenyenyirye, omwa busu bwiwe imune etseme. Niki ekyaleka iniabya n’etseme yosi eyi? Ahanyuma, abya iniabirithuma e 70 y’okwa bigha biwe eriyathulha engulhu mbuya y’Obwami bwa Nyamuhanga. Abya anzire kutsibu eriminya nga bakendi kolha bathi omubiiri ow’abaha. Habya nzighu nyingyi esithanzire engulhu yuwene, ng’abakangirirya b’emighambo n’Abafarisayo abasomire kandi abawithe menge manene. Mubaleka abangyi ibaghaya Yesu, erimuthwalha ng’omurandi buyira, n’abigha biwe ‘ng’abandu abatha kangiriribawa,’ abathasiki. (Emib. 4:13; Mk. 6:3) Nomwabine, abigha mubasubulha ibali n’etseme nene. Babya ibabirithulira nomuhanabya erihakanisibwa, erikalhua n’okwa syombinga! Ni kyahi ekyaleka ibatsema n’eribya n’obuthubaha?​—Soma Luka 10:1, 17-21.

2. (a) Abigha ba Yesu babya bathi ng’abaana balere? (b) Ni kyahi ekya thokesaya abigha ba Kristo eriyitheghererya emyatsi y’omughaso ey’obunyakirimu?

² Thalebya ekya Yesu abwira Yehova: ‘Ngakupipa iwe Thatha, Omukama w’olhubulha n’ekihugho! Kandi wabiribisa emyatsi eyo okwa b’amenge n’ab’eriminya, nikwa wabiribisulirayo okwa baana balere. Inga, Thatha, kusangwa ku byakutsemesaya bithya omo meso wawu.’ (Mt. 11:25, 26) Si bugha ambu Yesu amanyisaya athi abigha biwe ni baana balere. Aliwe, abya inianasi ngoku babya ng’abaana balere embere sy’ababya basomire kutsibu kandi abakayilhangira ng’ab’amenge manene kutsibu omwa kihugho ekyo. Ekikulhu kutsibu, Yesu mwakangirirya abigha biwe athi babye ng’abaana balere, eribya abakayikehaya kandi abakaligha erikangiriribwa. (Mt. 18:1-4) Mubaghasirwa bathi busana n’eriyikehya? Erilhabira omwa mulimu abuyirire, Yehova mwabawathikya eriyitheghererya emyatsi y’omughaso ey’obunyakirimu, aliwe ab’amenge ababya bakabaghaya, bamabya ibanalibene kw’ameso busana na Sitani n’emiyiheko yabu.

3. Thukendi kania okuki omo mwatsi ono?

³ Yesu eribya imwatsema, sikiri swekaya! Mukyamutsemesya akalhangira enzira eya Yehova akabisuliramu abandu abakayikehaya ab’emisindo yosi b’emyatsi y’ekwenene ey’obunyakirimu ey’omwakathi, nomubangabya isibasomire kutse ibasi bike. Mwatsema kundi Thatha wiwe mwatsemera enzira y’erikangiriryamu eyi. Mbwino Yehova abirihinduka, kandi akakanganaya athi ngoku akinatsemera enzira y’erikangiriryamu eyi? Thukendibya thukalebya eky’erisubirya okwa kibulyo eki, kyangana thulethera etseme nene, nga Yesu.

ERIWATHIKYA ABOSI ERIMINYA EMYATSI Y’OMWAKATHI

4. Egazeti eyolhobire eye Watchtower yabirilhangirika yithi ku ni kihembo ky’olhwanzo?

⁴ Omo myaka eya lino-lino, erikangirirya ly’obunyakirimu erya thukahebawa linemukangania ngoku ekithunga kya Yehova kinemwongera erihira omuwatho okw’ikangirirya omwa nzira nyolho n’eyikayitheghereribawa. Thuthakania okwa bisathu. Eky’erimbere, hane e Watchtower eyolhobire eriyitheghererya.a Erithwalira haghuma, egazeti eyi yabiribya ini kihembo ky’olhwanzo okw’abo abak’igha omubughe kutse abathasi erisoma ndeke. Ababuthi lino balimulhangira abaana babu bakasubirya thuk’igha e Watchtower, eyasibwe ng’enzira ngulhu eyathukabanira mw’ebyalya by’obunyakirimu. Abangyi babirihandikira Akathunga Akakasondolha bakakangania erisima lyabu linene. Mwali wethu mughuma mwahandika athi abya isyali subiraya omw’igha erya Akaleberyo. Mwabugha athi “Nabya ng’emumu.” Hathya kwa bithe bithya! Abere abirikolesya egazeti eyolhobire, mwahandika athi: “Hathya ngasubiraya mirundi minene, n’obuba bwabirihwa! Ngasima Yehova nenyu.”

5. E Biblia embyaka eya New World Translation of the Holy Scriptures yuwene yithi?

⁵ Ekyakabiri, habiribanika e New World Translation of the Holy Scriptures eyabirithasyasubwamu eyahulhukibawa omwa Lhusungu omwa kwezi kwa Okitoba 5, 2013 okwa lhuhindano lh’omwaka olhw’Abema ba Yehova.b Emilhondo minene hathya yiri mw’ebinywe bike, aliwe enzumwa iyabya isiyithahinduka kutse nibya iyathasy’olhoba eriyitheghererya. Ng’eky’erileberyako, Yobu 10:1 byabya binywe 27 byamasuba 19; Emisyo 8:6 byabya binywe 20 byamasuba 13. Emilhondo eyi eyosi yabirithasyolhoba eriyitheghererya omwa Biblia eyi. Mughalha wethu mughuma omuthaleghulha, omuhakabibwa, mwabugha athi: “Munganasoma ekitabu kya Yobu omwa Biblia embyaka, ngayowa nga munamayitheghererya ebirimo!” N’abandi kubanemubugha ebiri ng’ebyo.

6. Wukayowa wuthi okw’ithasyayitheghererya Matayo 24:45-47?

⁶ Ekyakasathu, thalengekania okwa eriyitheghererya lihya-lihya eryathunemubana. Ng’eky’erileberyako, eriyitheghererya lihya-lihya eryathwathunga erihambire okwa ‘mughombe oyutheleghulha n’ow’amenge,’ eryasira omwa Watchtower eya Julai 15, 2013, mulyathutsemesirye. (Mt. 24:45-47) Erisoborera mulyabugha lithi omughombe oyutheleghulha n’ow’amenge k’Akathunga Akakasondolha, ‘n’abaghombe b’enyumba yiwe’ b’abosi abakalisibawa bunyakirimu, nomubangabya ini bahakabibwa kutse “esindi mbuli.” (Yn. 10:16) Ka kikatsemesaya thuk’igha emyatsi y’okwenene eyi n’eryeghesyayo abahyaka omwa kithunga! Ni bindi byahi ebikakanganaya ngoku Yehova akatsemera erikangirirya omwa nzira nyolho kandi eyolhobire eriyitheghererya?

ENZIRA NYOLHO EY’ERISOBORERA EMYATSI OMWA BIBLIA

7, 8. Ni bindu nga byahi ebyabya omwa Biblia aliwe ini buminyereri?

⁷ Wamabya iwamabiri ghunza myaka mingyi iwunemukolera Yehova, wanganabya iwabirilhangira ngoku erisoborera lyethu okwa myatsi mirebe omwa Biblia yikabya iyinemuhinduka. Yithi? Omwa myaka eyihwere ebindu birebe ebiri omwa mwatsi mulebe omwa Biblia, kutsibu-tsibu ibikasoborerawa ng’ebik’imanira ebindi bindu, n’ebindi ibikathwalhawa nga ni buminyereri obukendi syabererera omwa buthuku bw’embere. Amasako akanasighika erisoborera ng’eri? Ee. Ng’eky’erileberyako, Yesu mwanakania okwa ‘kithiko-thiko ky’omuminyereri Yona.’ (Soma Matayo 12:39, 40.) Yesu mwasoborera athi obuthuku obwa Yona aghunza omwanda y’eyiswe nene, eyangabere isinda yiwe Yehova kw’athamulhamya, bwabya buminyereri bw’obuthuku obwa Yesu angaghunzire omw’isinda.

⁸ Omwa Biblia mune ebindi ebyabya aliwe ini buminyereri. Omukwenda Paulo mwanakania okwa biri ng’ebyo. Ng’eky’erileberyako, engolangana ya Abrahamu n’abakali biwe, Hagari na Sara, yabya iyikakanganaya engolangana eyangabere ahakathi-kathi ka Yehova n’ekihanda kye Israeli n’ekitsweka ky’okwa kithunga kya Nyamuhanga eky’elhubulha. (Gal. 4:22-26) Kuthya, ehema n’ehekalu, Ekiro ky’erihanulha kutse eribuyirwa amalholho, omuhereri mukulhu, n’ebindi ebyabya omwa mighambo ya Musa byabya ‘kyutsutsu ky’emyatsi yuwene eyikendi syahulhuka.’ (Ebr. 9:23-25, 10:1) Kikatsemesaya n’erighumya erikirirya lyethu thuk’igha emyatsi ng’eyi eyik’imanira ebikendi syabya. Mbwino obo thubughe thuthi obuli mundu, obuli ekyabya kikabya, n’obuli kindu ekikakanibawako omwa Biblia biwithe ekya bik’imanira?

9. Omwatsi wa Naboti abya akasoborerwa athi kera?

⁹ Omwa buthuku obulhabire, ikukikathwalhawa kithya. Eky’erileberyako, w’omwatsi owahambire oku Naboti, oyuwahandikirirawa n’erithibwa omw’ihamulha ly’Omwami-kali mubi Yezebeli nuku mwira wiwe, Ahabu angayimirya eririma ly’ebinyu lya Naboti. (1 Bam. 21:1-16) Kera omwa mwaka owa 1932, ebyabya omwa mwatsi oyu mughulhu mungyi ibikasoborerawa ng’ebiwithe ekya byabya bik’imanira. Ikikabughawa indi Ahabu na Yezebeli bak’imanira Sitani n’emitheghekere yiwe; Naboti iniak’imanira Yesu; Olhuholho lhwa Naboti, lhwabya lhuk’imanira er’ithibwa lya Yesu. Aliwe habere halhaba myaka mirebe, omwa mwaka wa 1961 omwa kitabu “Let Your Name Be Sanctified,” mukyathasya soborerwa indi Naboti ak’imanira abahakabibwa, na Yezebeli ak’imanira Ekristendomu. Neryo Yezebeli ery’endererya Naboti, ky’imanira ery’endereribwa ly’abahakabibwa omwa biro by’enyuma-nyuma. Ahabw’emyaka mingyi, erisoborera ly’emyatsi ye Biblia eri mulyaghumya erikirirya ly’abandu ba Nyamuhanga. Neryo busana naki erisoborera lyabirighenda likahinduka?

10. (a) Eribya w’amenge kyabirileka kithi omughombe iniayitheya omw’isoborera emyatsi mirebe ye Biblia? (b) Munabwire ebitabu byethu bikahira omuwatho w’okuki?

¹⁰ Ngoku thunakyasi, erilhua kera Yehova abiriwathikya ‘omughombe oyutheleghulha n’ow’amenge’ eryongera erithasyabya w’amenge. Eribya w’amenge kyabirileka iniayitheya kutsibu okw’isoborera athi omwatsi mulebe omwa Biblia ak’imanira owundi mwatsi, mbwino ikukinakanganibwe kithya omwa Masako. Eryongera okw’ekyo, kyabirilhangirika ngoku eyindi emisoborere eya kera ng’eyi yikakalira abangyi eriyitheghererya. Erikangirirya ng’eri, ng’erya, nindi oyuk’imanira ndi kandi nga ni busana naki, lyangana kalha erisoborera, eryibukwa, n’erikolesibwa. Kandi ekikulhu kutsibu, erisoborera ng’eri lyanganaleka omwatsi we Biblia owakakanibawako oyo iniathahamba okwa ngebe yethu. Busana n’ekyo, omwa nzira nyolho, ebitabu byethu munabwire bikahira omuwatho w’okw’igherererya erikirirya ly’abakanibweko omwa Biblia, eriyiyinia lyabu, eriyihayo lyabu oku Nyamuhanga, n’eyindi mibere yabu mibuya.c

11. Lino omwatsi wa Naboti thukayitheghereraya gho thuthi, kandi eky’erileberyako kiwe kikathuhambako kithi?

¹¹ Ibbwa lino, omwatsi owahambire oku Naboti thukayitheghereraya gho thuthi? Lino thukayitheghererayagho omwa nzira nyolho. Omulhume muthunganene oyo mwaholha, si bugha ambu kundi abya ak’imanira Yesu kutse abahakabibwa, aliriryo kundi abya muthaleghulha. Mwamakirira Emighambo ya Yehova nomwakine indi abathabali babi abakalire mubamwendererya kutsibu. (Emig. 36:7; 1 Bam. 21:3) Eky’erileberyako kiwe kikathuhambako kundi nethu thwangan’endereribwa thuthya. (Soma 2 Timoteo 3:12.) Abandu b’emisindo yosi bangana yitheghererya, ibibuka, n’erikolesya omwatsi ng’oyu ow’akaghumaya erikirirya.

12. (a) Sithutholere thukaghunzerera thuthiki okwa myatsi eyikakanaya okwa bindu birebe omwa Biblia? (b) Thwabirithoka thuthi eribana erisoborera eryolhobire ery’emyatsi ye Biblia ey’omwakathi? (Lebaya omwatsi ahikwa.)

¹² Mbwino thughunzerere thuthi emyatsi eyikakanaya okwa bindu birebe omwa Biblia yirimu habw’erithweghesya lisa? Eyihi. Munabwire ebitabu byethu, kutsibu-tsibu ibyangana soborera eky’omwatsi mulebe akathw’ibukaya kutse iniakolha ng’eky’erileberyako. Sibyanga thasyasoborera kutsibu ebingyi ebiri omwa myatsi ye Biblia nga bik’imaniraki. Ng’eky’erileberyako, ithwangana bugha thuthi obuthaleghulha bwa Naboti ak’endereribwa erihika okwa lhuholho, kikathw’ibukaya obuthaleghulha bwa Kristo n’abahakabibwa. Kandi ikyangana thw’ibukya n’obuthaleghulha ‘obw’esindi mbuli.’ Erihambangania emyatsi omwa nzira nyolho ng’eyo kikakanganaya ngoku Nyamuhanga anemuthukangirirya.d

ENZIRA NYOLHO EY’ERISOBORERA EMISYO YA YESU

13. Ni byahi ebikakanganaya ngoku lino thukasoborera emisyo ya Yesu omwa nzira nyolho?

¹³ Yesu Kristo ya mukangirirya mukulhu oyuwabirithayir’ibyaho okwa kihugho. Inianzire erikolesya kutsibu emisyo kutse eby’erileberyako omw’ikangirirya liwe. (Mt. 13:34) Eby’erileberyako bikaleka omundu iniabya ng’analhangire ekindu ekikakanibawako, ibyamubukya kw’amalengekania n’erimuhika okwa muthima. Mbwino erilhua kera ebitabu byethu nabyo bikanasoborera emisyo ya Yesu omwa nzira nyolho? Ee, ahathe erithika-thika! Mbwino muthuthatsema thukabana erisoborera lihya-lihya ery’eby’erileberyako bya Yesu ebihambire okwa kihamya, embutho y’eharadali, n’ey’ekisohi kutse obutimba omwa Watchtower eya Julai 15, 2008? Lino thwabiriminya ndeke-ndeke ngoku eby’erileberyako ebi bikakanaya okwa Bwami bwa Nyamuhanga n’erisingura lyabu omw’ikuma-kuma abakakwama Kristo omwa kihugho kibi kino.

14. (a) Omusyo w’Omusamaria abya akasoborerwa athi? (b) Lino omusyo wa Yesu oyu akayitheghereribawa athi?

¹⁴ Kandi ibbwa emisyo eya Yesu abya akakolesya? Eyindi kwenene yabya iyiwithe ekya yik’imanira kandi ini buminyereri; eyindi yabya iyiwithe enzumwa eya yik’eghesaya. Aliwe kyanga minywa kithi? Kyabirighenda kikaminyikalha emyaka yinemulhaba. Ng’eky’erileberyako, thuthalebya ngoku thwabya thukasoborera omusyo wa Yesu ow’Omusamaria mubuya. (Lk. 10:30-37) Omo mwaka owa 1924, e Watch Tower muyabugha yithi Omusamaria imanira Yesu; enzira y’obwandaghalha ey’erilhua e Yerusalemu eriya e Yeriko, yabya yik’imanira abandu erighenda bak’andaghalira omwa bubi eritsuka okw’iyisamambulha ly’omwa Edeni; abanyeyi ababya omwa nzira eyo ibak’imanira ebithongole ebinene-binene n’abasuburi b’omururu; abahereri n’Abalawi ibak’imanira Ekristendomu. Aliriryo munabwire ebitabu byethu bikakolesaya eky’erileberyako ky’Omusamaria erithw’ibukya ithwe bosi ng’Abakristayo ngoku thuthatholere thukabya n’akasolholho thukawathikya abali n’obwagha, kwilhabirirya bunyakirimu. Mbwino sikiri thutsemesaya thukalhangira Yehova akathubisulira ndeke ekwenene?

15. Omwa mwatsi ow’akakwamako thukendi syakania okuki?

¹⁵ Omwa mwatsi ow’akakwamako, thukendi syakania okwa wundi musyo​—omusyo ow’abaana-batho ikumi. (Mt. 25:1-13) Yesu abya anzire abigha biwe ab’omwa biro by’enyuma-nyuma ibayitheghererya omusyo oyo gho bathi? Mbwino obuli kindu ekirimu ekikanibweko, abandu, n’ebyabya bikabya, ebyosi byabya biwithe ekya bik’imanira? Kutse, mbwino anza abigha biwe ibakolesya omusyo oyo ng’eky’erileberyako ekyanga basondolha omwa biro by’enyuma-nyuma? Thukendi syaminya.