Бур олӧм выль му вылын
Мый ті мӧвпаланыд, кор видзӧданыд тайӧ трактатсьыс серпас вылас? Кӧсйӧ оз тіян сьӧлӧмыд татшӧм жӧ бур да шуда олӧмсӧ? Дерт жӧ, ёна кӧсйӧ. Но, гашкӧ, тайӧ кӧсйӧмыс коляс сӧмын кӧсйӧмӧн? Кытысь ми вермам тӧдны, мый татшӧм бур олӧмыс лоас му вылад?
Унджык йӧзыс тадзи и мӧвпалӧ. Ӧнія олӧмыс-тышъяс, лёк вӧчӧм, тшыгъялӧм, висьӧмъяс, пӧрысьмӧм да уна мукӧд омӧльтор. Но надейтчӧм вылӧ подулыс эм. Воан кад вылӧ видзӧдӧмӧн Библия висьталӧ, мый «ми Енлӧн кӧсйысьӧм серти виччысям выль енэж да выль му, кодъяс вылын олӧ збыльыс» (2 Петырлӧн 3:13; Исайя 65:17).
Библия серти тайӧ «выль енэжыс» да тайӧ «выль муыс» — абу выль вещественнӧй енэж да збыльысь выль му. Физическӧй му да физическӧй енэж вӧлі лӧсьӧдӧмаӧсь зэв бура, и Библия петкӧдлӧ, мый найӧ колясны нэмъяс чӧж (Псалом 88:37, 38; 103:5). «Выль му» котыртчас веськыда олысь йӧзысь, кодъяс кутасны овны му вылын. А «выль енэжнас» лоас зэв бур енэжса Царство, мӧд ногӧн-кӧ, правительство, и сійӧ кутас веськӧдлыны тайӧ мувывса йӧз котырнас. Но позьӧ оз эскыны, мый тайӧ шензьымӧн мича «выль му» лоӧ?
Татшӧм вывті бур олӧмыс му вылад збыльысь вӧлі Енлӧн медводдза кӧсйӧмас. Сійӧ овмӧдіс первойя кык мортсӧ мувывса едемскӧй райӧ да пуктіс налы зэв бур мог: «Чужтысьӧй да быдтысьӧй да тыртӧй мусӧ да вӧдитчӧй сыӧн» (Олӧм 1:28). Да, Енлӧн кӧсйӧмыс вӧлі сыын, медым тайӧ гозъяыслӧн вӧлі челядь да медым найӧ вочасӧн паськӧдісны ассьыныс райсӧ став му пасьталаыс. Сёрӧнджык найӧ эз кутны кывзысьны Енсӧ да сы вӧсна воштісны райсӧ да помасьтӧм олӧмсӧ. Но Енлӧн медводдза кӧсйӧмыс эз вежсьы. Сійӧ збыльмас выль му вылын! (Исайя 55:11).
Збыльысь, кор ті коранныд «Батьӧй миян» кевмысьӧмын, мед локтас Енлӧн Царство, ті коранныд, мед Сылӧн енэжса правительствоыс мездіс мусӧ став лёксьыс да веськӧдліс тайӧ выль мунас (Матвейсянь 6:9). Ми вермам дзикӧдз тӧдны, мый Ен вочавидзас тайӧ кевмысьӧм вылас, сы вӧсна мый Сылӧн Кывйыс висьталӧ: «Бурноголысьяс овмӧдчасны му вылӧ да пондасны овны сы вылын нэмъяс чӧж» (Псалом 36:29).
Олӧм Енлӧн выль му вылын
Енлӧн Царство ваяс му вылас сэтшӧм бурсиӧм, кутшӧм эз на вӧвлы, вӧчас став бурсӧ, мый Ен медводз кӧсйис вайӧдны му вывса олысьяслы шуда олӧм вылӧ. Оз ло лӧгалӧм да предрассудокъяс, вочасӧн ставныс му вылас лоасны ёртъясӧн ӧта-мӧдныслы. Библияын Ен кӧсйысьӧ, мый сійӧ «Му помъясӧдз дугӧдіс войнаяс». «Йӧзъяс оз кыпӧдны йӧз вылӧ шияс да водзӧ оз пондыны велӧдчыны тышкасьнысӧ» (Псалом 45:10, Исайя 2:4).
Вочасӧн ставнас муыс вежсяс да лоас сад кодь шензьымӧн мича райӧн. Библия висьталӧ: «Долыда нимкодясяс кушин да кос му, да гажмас овтӧминыс да дзоридзалас, кыдзи нарцис ...Сэки письтасны ваяс кушӧ да кос муӧ визувъяс. Сэки кӧтасьлытӧминъяс ойдасны, косьмӧм муас визувтасны юяс» (Исайя 35:1, 6, 7).
Лоӧ ставыс, медым лоны шудаӧн райскӧй му вылын. Йӧзыс некор оз нин кутны тшыгъявны сёян-юан тырмытӧм вӧсна. «Муыс сетіс ассьыс быдмӧгсӧ»,— висьтавсьӧ Библияын (Псалом 66:7; 71:16). Уджыс кутас вайны ставныслы нимкодясьӧм, сы вӧсна мый миян Лӧсьӧдысь кӧсйысьӧ: «Да пондасны... садитны виноградъяс да сёйны налысь вотӧссӧ... оз пондыны садитны, медым мӧд сёйис» (Исайя 65:21, 22).
Енлӧн выль му вылын йӧзыс оз нин кутны овны чукӧрӧн уна судта керкаясын да киссьӧм керкаясын, сы вӧсна мый Ен кӧсйысьӧ: «Да пондасны вӧчны керкаяс да овны сэні... Оз пондыны стрӧитны, медым мӧд оліс». Библия сідз жӧ шуӧ: «Ковтӧм удж оз пондыны вӧчны» (Исайя 65:21—23). Йӧзыслӧн лоас бур, сьӧлӧм вылӧ воана удж. Олӧмыс оз ло гажтӧм.
Мыйта-кӧ кад мысти Енлӧн Царство выльысь кыпӧдас сӧгласа олӧмсӧ, кутшӧм вӧлі едемскӧй райын зверъяс костын да зверъяс да йӧз костын. Библияын висьтавсьӧ: «Сэки кӧин пондас овны ӧтлаын нигӧна балякӧд да барс пондас куйлыны ӧтлаын кӧза пикӧд; кукань да том лев да ошпи лоасны ӧтлаын да ичӧтик кага пондас новлӧдлыны найӧс» (Исайя 11:6—9; Осия 2:18).
Сӧмын мӧвпышт: райскӧй му вылын сідз жӧ бурдасны став висьӧмъяс да вермытӧмъяс. Енлӧн Кыв эскӧдӧ миянӧс: «Да весиг ӧти олысьяс пытшкысь оз шу: ме вися» (Исайя 33:24). «Сэки Ен чышкас быд пӧлӧс синва налӧн синъясысь да оз нин ло кулӧмыс, ни бӧрдӧмыс, ни ойзӧмыс, ни висьӧмыс оз нин ло, сы вӧсна мый важсяыс быри» (Иоанлы восьтӧм 21:4).
Кыдзи тэныд веськавны тайӧ выль му вылас
Енлӧн кӧсйысьӧмъяс выль веськыд олӧма му йылысь, дерт, инмасны тэнад сьӧлӧмад. Мукӧдъяслы сьӧкыд эскыны татшӧм, кыдзи найӧ мӧвпалӧны, вывті бур олӧмас. Но кӧсйӧмъясыс збыльмасны, сы вӧсна мый найӧ петӧны Лӧсьӧдысьсянь, коді миянӧс зэв ёна радейтӧ (Псалом 144:16; Михей 4:4).
Дерт жӧ, кӧсъям-кӧ ми нэмъяс чӧж овны локтан райскӧй му вылын, колӧ лӧсявны кутшӧмсюрӧ тшӧктӧмъяслы. Иисус, кор кэвмысис Енлы, петкӧдліс ӧти медыджыд тшӧктӧм вылӧ: «А помасьтӧм олӧмыс сыын, медым тӧдісны Тэнӧ, ӧти збыль Енмӧс да Тэнсьыд мӧдӧдӧм Исус Христосӧс» (Иоансянь 17:3).
Сідзкӧ, кӧсъям-кӧ ми збыльысь овны Енлӧн выль му вылын, миянлы колӧ медводз тӧдмасьны Енлӧн индӧдъяскӧд, да сэсся найӧс олӧмӧ пӧртны. Збыльторӧн лоӧ татшӧмтор, мый тайӧ «муюгыдыс вежсяс да сылӧн лёк олӧмыс, а коді вӧчӧ Енлысь Буркӧсйӧмсӧ, сійӧ олӧ помтӧг», медым нэмъяс чӧж нимкодясьны став бурнас, мый сетас миянӧс радейтысь Лӧсьӧдысь (1 Иоанлӧн 2:17).
Став библейскӧй цитатаыс босьтӧма Канонической Библияысь (вуджӧдӧма коми кыв вылӧ 1981 воын).