Ло енлы ёртӧн нэмъяс чӧж!

Медым аддзыны ёртӧс, колӧ зільны; но колӧ зільны и мед видзны ёртасьӧм. Тэнад зільӧмыд, мед шедӧдны Енкӧд ёртасьӧм да видзны сійӧс, лоас ёна бурсиӧма. Исус висьталіс сылы эскысьяслы: «Збыльыс мездас тіянӧс» (Иоансянь 8:32). Кыдз тайӧс гӧгӧрвоны?

Тэ верман ӧні нимкодясьны мездлунлы. Тэ верман мездмыны ылӧдана велӧдӧмъясысь да пӧрйӧдлӧмъясысь, кодъяс мунӧны Сатанасянь. Уна миллион йӧз оз тӧдны Иеговаӧс да олӧны аскиа лунӧ надеясӧ воштӧмӧн, но тэ верман таысь мездмыны (Римсалы 8:22). Енлӧн ёртъясыс мездмӧмаӧсь весиг «кулӧмсьыс полӧмысь» (Еврейяслы 2:14, 15).

Тэ верман нимкодясьны мездлунлы Енлӧн выль му вылын. Ёна жӧ шуда мездмӧмыс, кодӧс тэ верман аддзыны локтан кадӧ! Райскӧй му вылын мездмасны войнаясысь, висьӧмъясысь да лёк мортлӧн ки улӧ веськалӧмысь. Мездмасны гӧля олӧмысь да тшыгъялӧмысь. Мездмасны пӧрысьмӧмысь да кулӧмысь. Мездмасны полӧмысь, дзескӧдӧмысь да веськыд туйысь кежӧмысь. Библия висьталӧ Ен йывсьыс: «Восьтан Ассьыд киястӧ да пӧткӧдан став олысьсӧ бур кӧсйӧм сертиыд» (Псалом 144:16).

Енлӧн ёртъяс кутасны овны помтӧг. Помтӧм олӧмыс — сійӧ дона козин, кодӧс Енмыс сетас ставныслы, коді корсьӧ сыкӧд ёртасьӧм (Римсалы 6:23). Сӧмын мӧвпышт, мы́й помтӧм олӧмыс тэныд сетас!

Тэнад лоӧ кад унатор вылӧ. Гашкӧ, тэ кӧсъян велавны ворсны музыкальнӧй инструмент вылын. Либӧ тэ кӧсъян велӧдчыны серпасасьны, либӧ столярнӧй удж вӧчны. Вермас лоны, тэ кӧсъян унджык тӧдмавны пемӧсъяс либӧ быдмӧгъяс йылысь. А, гашкӧ, тэ кӧсъян уналаӧ ветлыны да аддзывны уна сикас страна да войтырӧс. Помтӧм олӧм дырйи тайӧс ставсӧ позяс олӧмӧ пӧртны!

Тэнад лоӧ кад, медым лӧсьӧдны уна ёртӧс. Помтӧм олӧм дырйи тэ верман тӧдмавны унаӧс, коді ёртасьӧ Енкӧд. Тэ тӧдмалан, кутшӧм найӧ енбиаӧсь да сьӧлӧмаӧсь, и найӧ тшӧтш лоасны ёртъясӧн тэныд. Тэ пондан радейтны найӧс, и найӧ кутасны радейтны тэнӧ (1 Коринфӧ 13:8). Помтӧм олӧмыс сетас тэныд лоны ёртӧн став йӧзыслы му вылас! Но медся бур сійӧ, мый нэмъяс чӧж тэнад ёртасьӧмыд Иеговакӧд кутас лоны пыр ёнджык и ёнджык. Ло Енлы ёртӧн нэмъяс чӧж!