Медым вӧлі ёрт, аслыд колӧ лоны ёртӧн

Ёртасьӧмыслӧн подулыс — радейтӧм. Кымын унджык тэ кутан тӧдмавны Иегова йылысь, сымын ёнджыка кутан сійӧс радейтны. А кор радейтӧмыд Ен дорас кутас содны, тэ кутан ёнджыка кӧсйыны служитны сылы. Тайӧ ышӧдас тэнӧ лоны Исус Христослӧн велӧдчысьӧн (Матвейсянь 28:19). Кор сибӧдчан Иеговалӧн Висьталысьяслӧн шуда семья дорӧ, тэ верман нэмъяс чӧж радлыны Енкӧд ёртасьӧмысь. Но мый тэныд колӧ вӧчны?

Тэныд колӧ петкӧдлыны, мый тэ радейтан Енсӧ сылӧн законъяслы кывзысьӧмӧн. «Енсӧ радейтӧмыс сыын, мед ми сылӧн закон серти олім, ӧд законъясыс сылӧн олӧм оз сьӧктӧдны» (1 Иоанлӧн 5:3).

Олӧмад пӧрт сійӧс, мый тӧдмалан. Исус висьталіс ӧти вӧвлӧмтор, мыйысь ми вермам велӧдчыны. Мывкыда морт лэптіс ассьыс керкасӧ из вылын. А мывкыдтӧм лэптіс ассьыс керкасӧ лыа вылын. Кор локтіс ыджыд зэр да тӧв, из вылас лэптӧм керкаыслы нинӧм эз ло. А лыа вылас лэптӧм керкаыс уси да жугалі. Исус висьталіс, мый найӧ, кодъяс кывзӧны сылысь велӧдӧмсӧ да сы ногӧн олӧны, ӧткодьӧсь мывкыда мортыскӧд, коді лэптіс керкасӧ из вылын. А найӧ, кодъяс кывзӧны сылысь велӧдӧмсӧ, но оз овны сы ногӧн, ӧткодьӧсь мывкыдтӧм мортыскӧд, коді лэптіс керкасӧ лыа вылын. Тайӧ кык морт пиысь тэ код кодь кӧсъян лоны? (Матвейсянь 7:24—27).

Асьтӧ Енлы сиӧм. Тайӧ лоӧ, мый тэ юрбитігад Иеговалы висьталан, мый нэмъяс чӧж кӧсъян олӧмӧ пӧртны сылысь тшӧктӧмсӧ. А Енлысь тшӧктӧмсӧ олӧмӧ пӧртӧмӧн тэ петкӧдлан, мый тэ — Исус Христослӧн велӧдчысь (Матвейсянь 11:29).

Пыртчӧм. «Пыртчы да мын аслад мыжъясысь, нимсӧ сылысь корӧмӧн» (Уджъяс 22:16).

Служит Енлы став сьӧлӧмнад. «Кӧть мый ті вӧчанныд, вӧчӧй сійӧс став сьӧлӧмсяньныд, кыдзи Иеговалы, а энӧй кыдзи йӧзлы» (Колоссӧ 3:23).