Кӧсъянныд-ӧ ті тӧдмавны збыльсӧ?

ЗБЫЛЬСӦ мый йылысь? Сы йылысь, мый йӧзсӧ майшӧдлӧ важ кадсянь. Гашкӧ, ті аслыныд сідзжӧ сетлінныд татшӧм тӧдчана юалӧмъяс, кыдзи:

• Радейтӧ миянӧс Енмыс али оз?

• Воас-ӧ коркӧ помыс войнаяслы да тӧждысьӧмъяслы?

• Мый лоӧ кулігӧн?

• Эм абу надеяыс кулӧмаяслӧн?

• Кыдзи колӧ юрбитны, медым Енмыс миянӧс кыліс?

• Кыдзи аддзыны олӧмын шудсӧ?

Тіян серти, кытысь колӧ корсьны тайӧ юалӧмъяс вылас вочакывъяссӧ? Библиотекаясын да книга лавкаясын ті аддзанныд сюрс небӧг, кӧні гижысьясыс шуӧны, мый тӧдӧны та вылӧ вочакывъяссӧ. Но векджык ӧти книга мунӧ паныд мӧд книгалы. Кутшӧмкӧ книгаяс талун кажитчӧны, мый найӧ зэв ёна лӧсялӧны ӧнія кадыслы, но неуна кад кольӧм бӧрын найӧ важмӧны, найӧс выльысь видлалӧны либӧ гижӧны выльясӧс.

Но эм ӧти небӧг, кодлы збыльысь колӧ эскыны. Тайӧ збыль йылысь небӧг. Исус Христос Енлы юрбитігӧн шуис: «Тэнад Кывйыд — збыль» (Иоансянь 17:17). Талун тайӧ Кывйыс тӧдса кыдз Библия. Лыддьӧй водзӧ лист бокъяссӧ и ті тӧдмаланныд ясыд да стӧч библейскӧй вочакывъяссӧ вылынджык вайӧдӧм юалӧмъяс вылӧ.

Радейтӧ миянӧс Енмыс али оз?

МЫЙЛА СУВТӦ ТАЙӦ ЮАЛӦМЫС. Ми олам мирын, кӧні зэв уна лёкыс да абу веськыдлуныс. Уна религия велӧдӧ, мый миян мучитчӧмыс — Енлӧн кӧсйӧм.

МЫЙӦ ВЕЛӦДӦ БИБЛИЯ. Енмыс некор лёксӧ оз вӧч. Иовсянь 34:10-ын висьтавсьӧ: «Енлӧн оз вермы лоны ылӧгыс либӧ Ставсӧкутысьлӧн чукыльтӧмыс». Енмыс кӧсйӧ вӧчны зэв ыджыд буртор йӧзыслы. Со мыйла Исус велӧдіс миянӧс юрбитны: «Батьӧй миян, Тэ Енэжъяс вылын олан... Мед воас Тэнад Царствоыд. Мед лоас тэнад вӧляыд и му вылын, кыдз и Енэжыс вылын» (Матфейсянь 6:9, 10). Енмыс миянӧс сэтшӧм ёна радейтӧ, мый ассьыс кӧсйӧмсӧ збыльмӧдӧм вӧсна муніс зэв ыджыд жертва вылӧ (Иоансянь 3:16).

Видзӧдӧй сідзжӧ Олӧм 1:26—28; Иаковсянь 1:13 да 1 Петырсянь 5:6, 7.

Воас-ӧ коркӧ помыс войнаяслы да тӧждысьӧмъяслы?

МЫЙЛА СУВТӦ ТАЙӦ ЮАЛӦМЫС. Войнаяс нуӧны олӧмсӧ зэв уна йӧзлысь. Миянлы ставнымлы абу веськодь йӧзлӧн мучитчӧмыс.

МЫЙӦ ВЕЛӦДӦ БИБЛИЯ. Енмыс шуӧ, мый воас кад, кор сійӧ став му вылас лӧсьӧдас мир. Сылӧн Царстволӧн — енэжса правительстволӧн — веськӧдлӧм улын йӧзыс оз кутны «велӧдчыны тышкасьны». Найӧ «асланыс тышкасян пыридзьясысь вӧчасны чарлаяс» (Исайя 2:4). Енмыс бырӧдас став несправедливостьсӧ да майшасьӧмсӧ. Библия кӧсйысьӧ: «[Енмыс] сэки чышкас быд пӧлӧс синва налӧн синъясысь да оз ни ло кулӧмыс, ни бӧрдӧмыс, ни ойзӧмыс, ни висьӧмыс оз нин ло, сы вӧсна мый важсяыс [несправедливостьыс да майшасьӧмыс] быри» (Иоанлы восьтӧм 21:3, 4).

Видзӧдӧй сідзжӧ Псалом 36:10, 11; 45:10 да Михей 4:1—4.

Мый лоӧ кулігӧн?

МЫЙЛА СУВТӦ ТАЙӦ ЮАЛӦМЫС. Унджык религияыс велӧдӧ, мый мортыслӧн кулӧм бӧрас лолыс олӧ. Мукӧдыс эскӧны, мый кулӧмаяс вермӧны лёк вӧчны ловъя йӧзлы, да, мый Енмыс тшӧктӧ грек вӧчысьясӧс помтӧг мучитчыны адын.

МЫЙӦ ВЕЛӦДӦ БИБЛИЯ. Кор мортыс кулӧ, сійӧ дугдӧ овны. Екклесиаст 9:5-ын висьтавсьӧ: «Кулӧмаяс нинӧм оз тӧдны». Кулӧмаяс кӧ нинӧм оз тӧдны, оз чувствуйтны, ни оз кывны, сідзкӧ найӧ оз вермыны ни лёк вӧчны, ни отсавны ловъяяслы (Псалом 145:3, 4).

Видзӧдӧй сідзжӧ Олӧм 3:19 да Екклесиаст 9:6, 10.

Эм абу надеяыс кулӧмаяслӧн?

МЫЙЛА СУВТӦ ТАЙӦ ЮАЛӦМЫС. Ми ставӧн кӧсъям овны да радлыны накӧд орччӧн, кодӧс радейтам. И, дерт жӧ, ми зэв ёна кӧсъям бара аддзысьны асланым матыссаяскӧд, кодъяс кулісны.

МЫЙӦ ВЕЛӦДӦ БИБЛИЯ. Унджык кулысьыс ловзяс. Исус кӧсйысис, мый «кулысьяс кыласны Ен Пилысь сёрни шы да петасны» (Иоансянь 5:28, 29). Ловзьӧм йӧзлӧн лоас позянлун овны мувывса райын, кыдзи и кӧсйыліс Енмыс первойсяньыс. Таысь ӧтдор, Енмӧс кывзысь йӧзлӧн лоӧ бур дзоньвидзалун да вермасны овны помтӧг. Библияын висьтавсьӧ: «Бурноголысьяс овмӧдчасны му вылӧ да пондасны овны сы вылын нэмъяс чӧж» (Псалом 36:29).

Видзӧдӧй сідзжӧ Иов 14:14, 15; Лукасянь 7:11—17 да Апостолъяслӧн уджъяс 24:15.

Кыдзи колӧ юрбитны, медым Енмыс миянӧс кыліс?

МЫЙЛА СУВТӦ ТАЙӦ ЮАЛӦМЫС. Юрбитӧны пӧшти став религияӧ пырысьыс. Но уналы кажитчӧ, мый налӧн юрбитӧмыс весьшӧрӧ.

МЫЙӦ ВЕЛӦДӦ БИБЛИЯ. Исус велӧдіс миянӧс, мый юрбитігӧн оз ков шуавны ӧтиторсӧ. Сійӧ шуис: «А кевмысиганыд энӧ шуалӧй унасӧ» (Матфейсянь 6:7). Ми кӧ кӧсъям, медым Енмыс миянӧс кыліс, колӧ юрбитны, кыдзи сылы лӧсялӧ. Та вӧсна миянлы колӧ тӧдмавны, мыйын Енмыслӧн кӧсйӧмыс да сы серти юрбитны. 1 Иоаннсянь 5:14-ын гижӧма: «Кор ми мыйкӧ корам сылӧн кӧсйӧмыс кузя, сійӧ кывзӧ миянлысь».

Видзӧдӧй сідзжӧ Псалом 64:3; Иоансянь 14:6, 14 да 1 Иоансянь 3:22.

Кыдзи аддзыны олӧмын шудсӧ?

МЫЙЛА СУВТӦ ТАЙӦ ЮАЛӦМЫС. Унаӧн чайтӧны, мый шудыс сійӧ, кор эм деньга, ним да мичлун. Найӧ быд ногыс кӧсйӧны ставсӧ тайӧс судзӧдны, а шудыс сідзи оз и сюр.

МЫЙӦ ВЕЛӦДӦ БИБЛИЯ. Исус петкӧдліс, мыйын збыль шудыс. Сійӧ шуис: «Шудаӧсь духовнӧ гӧльяс» (Матфейсянь 5:3). Ми вермам лоны збыльысь шудаӧсь сӧмын сэки, кор кутам гӧгӧрвоны, мый миянлы колӧ тӧдны Ен йылысь збыльсӧ да сылысь кӧсйӧмсӧ. Тайӧ збыльсӧ гижӧма Библияын. Тайӧс кӧ ми тӧдам, ми вермам гӧгӧрвоны, мый олӧмас тӧдчана, а мый абу. Кор ми кӧсъям мыйкӧ вӧчны Библияса збыль вылӧ подуласьӧмӧн, миян олӧмным лоӧ шудаджык (Лукасянь 11:28).

Видзӧдӧй сідзжӧ Нӧдкывъяс 3:5, 6, 13—18 да 1 Тимофейлы 6:9, 10.

Ми сӧмын дженьыда видлалім Библияысь вочакывъяс квайт юалӧм вылӧ. Кӧсъянныд ті тӧдмавны унджык? Дерт, тэ кӧ гӧгӧрвоан, мый тэныд колӧ тӧдмавны Ен йылысь. Вермас лоны, ті майшасянныд, мыйла радейтысь Енмыс лэдзӧ вӧчны та мында лёксӧ да мучитчӧмсӧ? Кыдзи лоны шудаӧн семьялы? Библияын сетсьӧ тырвыйӧ эскӧдана вочакывъяс тайӧ да уна мукӧд юалӧм вылӧ.

Но талун унаӧн оз восьтывлыны Библиясӧ. Налы кажитчӧ, мый Библияыс вывті ыджыд, кодӧс абу кокни гӧгӧрвоны. Ті кӧсъянныд, медым тіянлы отсалісны корсьны Библияысь вочакывъяс тіян юалӧмъяс вылӧ? Иеговалӧн Висьталысьяс вӧзйӧны кык способ, кодъяс тіянлы вермасны отсавны.

Ӧтиыс — тайӧ «Мый тшӧктӧ миянлы Ен?» брошюра. Сійӧс дасьтӧма сы вылӧ, медым отсавны йӧзлы, кодлӧн этша кадыс, тӧдмавны тӧдчана юалӧмъяс вылӧ стӧч библейскӧй вочакывъяс. Мӧдыс — дон босьттӧг гортын велӧдны Библия. Иеговалӧн Висьталысьяс, кодъяс олӧны тіянсянь неылын, вермасны волыны тіян дорӧ гортад либӧ сэтчӧ, кӧні тіянлы лӧсьыдджык да неунаӧн тӧдмасьны Библияӧн. Тадзи велӧдчӧмыс отсаліс нин мир пасьтала миллион йӧзлы. Унаӧн ӧні эскӧмӧн вермасны шуны: «Ме аддзи збыльсӧ!»

Библиялӧн збыль — тайӧ донъявны позьтӧм озырлун. Сійӧ мездӧ миянӧс суевериеясысь, шӧйӧвошӧмысь да полӧмлунысь. Сійӧ сетӧ надея, радлун да олӧмын тӧлк. Исус шуис: «И гӧгӧрвоанныд збыльсӧ, и збыльыс вӧчас тіянӧс свободнӧйӧн» (Иоансянь 8:32).