Yoba
5 “Pano ita! Abya kuji usakukwitaba nyi?
Kwi bañanyi bazhila ko usakwalukila?
2 Mambo bukaji bwipayisha muntu wakosama,
Ne kichima kipayisha muntu wabula maana.
3 Nakimonapo kala muntu wakosama saka aikala bulongo,
Bino nobe mu kukopa kwa jiso, mpunzha yo ekalapo yafingwa.
4 Baana banji kechi baikala mu mutende ne,
Bebamanyikila ku kibelo kya muzhi,+ kwa kubula wa kwibapokololako.
5 Baji na nzala baja kajo ko anowa,
Baapa ne kamenena mu miba,
Kabiji bintu byo baji nabyo bebiba.
6 Mambo bintu byatama kechi bilupuka mu mushiji ne,
Ne lukatazho kechi lufuma panshi ne.
7 Mambo muntu wasemenwa kumanama,
Byonkatu nsase ya mujilo byo itoloka kuya mwiulu.
8 Inge najinga obewa, inge namusashijila Lesa,
Ne kufikizha mambo ami kwi Lesa,
9 Yenka uba bintu bikatampe bya kubula kukonsha kuyuka,
Bintu bya kukumya bya kukankalwa kubala.
10 Unokesha mvula pano pa ntanda
Ne kutekezha majimi na mema.
11 Utumbijika mulanda,
Kabiji upulusha aba bo balengulula.
12 Uvulañanya milanguluko ya boba baji na bujimbijimbi,
Kuba’mba babule kwingila mingilo yabo.
13 Uleka ba maana kufwa mu bya bujimuku byabo,+
Kuba’mba milanguluko ya boba bajimuka ivulañane.
14 Kimye kya mute bekala mu mfishi,
Kabiji pa kushinkamana juba bapampanta nobe bufuku.
15 Upulusha bantu ku mpoko ya mu tunwa twabo,
Upulusha muyanji mu kuboko kwa kilobo,
16 Pa kuba’mba mulanda ekale na luketekelo,
Bino kanwa ka wabula koloka bekashinka.
17 Umvwa! Muntu ye bakajipila kwi Lesa ye wa lusekelo;
Onkao mambo, kange ukane kukufunda ku wa Bulume Bonse ne!
18 Mambo Lesa wakonsha kukozhañana ne kupombapo pa kilonda;
Umokola, bino ubuka na maboko anji.
19 Ukakupokolola ku bya malwa bitanu na kimo,
Nangwatu kya malwa kya butanu na bubiji kechi kikakufikila ne.
20 Mu kimye kya kipowe kya nzala ukakukuula ku lufu,
Kabiji mu kimye kya nkondo ukakupokolola ku mpoko.
21 Ukapokololwa ku byambo byatama,+
Kabiji kya malwa byo kikafika kechi ukachina ne.
22 Lonaiko ne nzala ukebiseka,
Kabiji banyama bakaji kechi ukebachina ne.
23 Mambo mabwe a mungye kechi akakukozha ne,*
Kabiji banyama bakaji ba mungye ukekala nabo mu mutende.
24 Ukayuka’mba tente wobe wazhikijilwa,*
Kabiji byo ukaya na kumona banyama bobe kechi bakalelela ne.
25 Ukasema baana bavula,
Kabiji ba mu kisemi kyobe bakavula bingi nobe nsono ya pano pa ntanda.
26 Ukaya mu kilende saka uji na bulume,
Byonkatu byo babungizha bikuta bya kajo mu kimye kyabyo.
27 Umvwa! Twikikebakeba, kabiji twataana’mba kya kine.
Teleka ne kwikiswa.”