Majilo a Yelemiya
5 Anweba Yehoba, vulukai bintu bitufikila.
Talai ne kumona byo kitulenga bumvu.+
2 Buswanyi bwetu bebupana ku bantu bangi ne mazubo etu beapana ku bantu bafuma ku byalo bingi.+
3 Twaaluka ke baana bakishale babula shabo; bainetu baikala nobe banabakazhi bafwilwa.+
4 Bantu babena kwitupotesha mema etu,+ ne kwitupotesha nkunyi yetu.
5 Babena kwitupangisha ku balwanyi betu, kabiji kechi baji palepa ne atweba ne;
Twakooka, twakankalwa ne kukokoloka.+
6 Twaketekejile mwi Ijipita+ ne Asilya+ kuba’mba baketupa kajo kavula ka kuja.
7 Bashakulu betu balengele mambo bafwile kala, pano bino atweba yetu tubena kuyanjilamo mu bubi bwabo.
8 Bazha bo babena kwitulama; kafwako nangwa umo wakonsha kwitupokolola mu maboko abo ne.
9 Tubika bumi* bwetu mu kizumba pa kukeba kajo,+ na mambo a boba baji na mpoko mu kiselebwa.
10 Mibiji yetu yatwa kyuya nobe kisha kya mujilo, na mambo a nzala.+
11 Banabakazhi basongolwa ba mu Ziona bebalenga mambo* ne bakamwale ba mu mizhi ya Yuda.+
12 Babinemanga bebakashile ku maboko+ ne kwibasha na kupepela, kabiji bakulumpe kechi bebanemekele ne.+
13 Bansongwalume basendelenga mpelo, kabiji banyike bayilenga saka batelengela na mambo a kusenda nkunyi yanema.
14 Bakulumpe balupuka mu bibelo bya muzhi;+ bansongwalume baleka kwimba nyimbo yabo.+
15 Lusekelo lwa mu michima yetu lwapwa; kuzha kwetu kwaaluka ke majila.+
16 Munchinya waponako ku mitwe yetu. Kitutamina bingi mambo twalenga mambo.
17 Michima yetu ibena kukola na mambo a kino,+
Kabiji na mambo a bino bintu, meso etu aleka kumwesha,+
18 Na mambo a kuba Mutumba wa Ziona bamonauna;+ balubwala babena kupitañana monka.
19 Pakuba anweba Yehoba, mukekalanga pa jitanda jenu myaka ne myaka.
Jitanda jenu jo ja myaka ne myaka ku bisemi byonse.+
20 Mambo ka o mwituvulamina myaka ne myaka, ne kwitusha pa kimye kyabaya bibye?+
21 Anweba Yehoba, tubwezhai kwi anweba, ne atweba twaswa kubwela kwi anweba.+
Bwezhai moba etu byonka byo ajinga kala.+
22 Nangwa byonkabyo, anweba kine mwitukana.
Mwatwajijila kwituzhingijila.+