Mitonyi

9 Mu kuya kwa moba Abimeleki+ mwana wa kwa Yelubaela wayile ku balongo ba bainanji mu Shekema, kabiji wibambijile abo ne bonse ba mu kisemi kya bankambo* yanji amba: 2 “Mwane shikishai bantangi ba mu Shekema amba, ‘Kyepi kyawama kwi anweba, kwimulama ku baana ba balume bonse 70 ba kwa Yelubaela+ nangwa kwimulama ku muntu umo? Kabiji vulukai’mba amiwa nekikupa kyenu kabiji nemubiji wenu.’”

3 Onkao mambo, balongo ba bainanji bamwambijileko bino byambo ku bantangi bonse ba mu Shekema, kabiji michima yabo yakebeshe kulondela Abimeleki, mambo baambile’mba: “Aye ye mulongo wetu.” 4 Kepo bamupele mali a siliva 70 kufuma mu nzubo ya kwa Baela-belita,+ kabiji Abimeleki waingijishe ano mali kutewilamo banabalume babujile bya kuba, bashinta kabiji bamulondejile. 5 Kabiji wayile ku nzubo ya bashanji mu Ofula+ ne kwipaya balongo banji,+ baana ba kwa Yelubaela, banabalume 70, wibepayijile pa jibwe jimotu. Yotamo mukala wa kwa Yelubaela ye wapulukilepotu, mambo wafyamine.

6 Kepo bantangi bonse ba mu Shekema ne bonse ba mu Bete-milo, bakonkene pamo ne kuswanyika Abimeleki pa bufumu,+ kwipi na kichi kikatampe, konka ku jishiki jajinga mu Shekema.

7 Yotamo byo bamubuujile kino, ponkapo wayile ne kukemana peulu ya Mutumba wa Gelizimu+ kabiji wabijikile na jiwi ja peulu amba: “Ntelekai, anweba bantangi ba mu Shekema, ne Lesa po po asakwimumvwa.

8 “Kwajinga bichi byayile na kushinga manyi wa kwikala mfumu wabyo. Byonkabyo, byaambijile kichi kya maolivi amba, ‘Tulamainga.’+ 9 Bino kichi kya maolivi kibyambijile’mba, ‘Nanchi nafwainwa kusha manyi* ami, o bengijisha kutumbijikilamo Lesa ne bantu, ne kuya na kusunkena peulu ya bichi bikwabo nyi?’ 10 Kepo bichi byaambijile kichi kya mukuyu amba, ‘Iyai mwitulamenga.’ 11 Bino kichi kya mukuyu kibyambijile’mba, ‘Nanchi nafwainwa kusha kutobala kwami ne bipangwa byami byawama, ne kuya na kusunkena peulu ya bichi bikwabo nyi?’ 12 Kabiji bichi byaambijile muñanzañanza amba, ‘Iyai mwitulamenga.’ 13 Muñanzañanza wibikumbwile’mba, ‘Nanchi nafwainwa kusha binyu byami bya katataka bisangajika Lesa ne bantu, ne kuya na kusunkena peulu ya bichi nyi?’ 14 Kyapeleleko, bichi byonse bikwabo byaambijile kichi kya miba amba, ‘Iyai mwitulamenga.’+ 15 Ponkapo kichi kya miba kyaambijile bichi bikwabo’mba, ‘Inge kya kine mubena kunshinga manyi amba ngikale mfumu wenu, iyai mufyame mu kimfutele kyami. Pano inge ne, mujilo alupuke mu kichi kya miba ne kusoka bichi bya sida bya ku Lebanoni.’

16 “Nanchi mwauba kintu kyawama na muchima yense kabiji kya mushingi byo mwatongola Abimeleki+ kwikala mfumu nyi? Nanchi mwaubila byawama Yelubaela ne ba mu nzubo yanji nyi? Abya mwamubila kintu kyamufwainwa nyi? 17 Batata byo bemulwijileko,+ babikile bumi* bwabo mu kizumba kuba’mba bemupokolole mu maboko a bena Mijanyi.+ 18 Bino anweba lelo mwabuukila ba mu nzubo ya batata ne kwipayila baana babo ba balume 70 pa jibwe jimotu.+ Kabiji mwatongola Abimeleki mwana wa muzha wabo wa mukazhi+ kwikala mfumu pa bantangi ba mu Shekema na mambotu a kuba’mba ye mulongo wenu. 19 Inge kya kuba lelo jino mwauba kyawama na muchima yense kabiji kya mushingi kwi Yelubaela ne ba mu nzubo yanji, sangalalai ne Abimeleki ne aye asangalale ne anweba. 20 Pano inge ne, mujilo afume mwi Abimeleki ne kusoka bantangi ba mu Shekema ne ba mu Bete-milo,+ kabiji mujilo afume mu bantangi ba mu Shekema ne ba mu Bete-milo ne kumusoka Abimeleki.”+

21 Kepo Yotamo+ anyemejile ku Beela, kabiji waikelenga konkakwa na mambo a kuchina kolojanji aye Abimeleki.

22 Kabiji Abimeleki walamine* bena Isalela pa myaka isatu. 23 Lesa walengejile bulwanyi kwikala* pakachi ka kwa Abimeleki ne bantangi ba mu Shekema, kabiji abo bamufutukilemo Abimeleki. 24 Kyajinga bino kuba’mba kwikale kushinkanya na mambo a byubilo bya bumbanzhi byo baubile ku baana ba balume 70 ba kwa Yelubaela, pa kuba’mba mashi abo amushinkamane Abimeleki mulongo wabo wibepayile+ ne kushinkamana bantangi ba mu Shekema na mambo a kumukwashako kwipaya balongo banji. 25 Onkao mambo, bantangi ba mu Shekema batumine bantu ba kumubelamina peulu ya mitumba, kabiji baangachilenga bintu ku yense wapichilenga mu mukwakwa mo bajinga. Mu kuya kwa moba Abimeleki bamubuujile.

26 Kabiji Gala mwana wa kwa Ebeda ne balongo banji baishile ku Shekema,+ ne bantangi ba mu Shekema bamuketekejile. 27 Balupukile pangye ya muzhi ne kubungizha mañanzañanza mu majimi abo a miñanzañanza ne kwiafina, kabiji baikele na kijiilo, byo bapwishishe, batwelele mu nzubo ya lesa wabo+ ne kuja ne kutoma ne kumufinga Abimeleki. 28 Kepo Gala mwana wa kwa Ebeda aambile’mba: “Nanchi Abimeleki ye ñanyi, kabiji Shekema ye ñanyi kya kuba’mba tumwingijilenga? Nanchi kechi ye mwana wa kwa Yelubaela,+ kabiji nanchi Zebula kechi ye kineme wanji nenyi? Ingijilainga bena Hamola, shanji Shekema! Pano mambo ka o twafwainwa kumwingijilanga? 29 Inge kya kuba bano bantu yami nebatangijilanga, inge namufumyapo Abimeleki.” Kepo aambijile Abimeleki amba: “Vuzha nzhita yobe ne kwiya.”

30 Zebula kinemanga wa mu muzhi byo aumvwine byambo bya kwa Gala mwana wa kwa Ebeda, wazhingijile bingi. 31 Onkao mambo, watumine mu bufyamfya* baluwe kwi Abimeleki ne kwamba’mba: “Umvwai! Gala mwana wa kwa Ebeda ne balongo banji baji kuno ku Shekema, kabiji babena kutundaika bantu ba mu muzhi kwimusatukila. 32 Pano mwiye bufuku, anweba ne bantu benu, ne kubelamina mungye. 33 Juba byo jikaselatu lukelo, mwafwainwa kubuuka bukiji ne kulukuka muzhi; kabiji aye ne bantu banji byo bakeya kwi anweba, mukoobe kyonse kyo mwakonsha kuba ne kumushinda.”*

34 Byonkabyo, Abimeleki ne bantu banji bonse baishile bufuku, ne kubelamina bena Shekema mu mabumba ana. 35 Gala mwana wa kwa Ebeda byo alupukile ne kwimana ku kibelo kya muzhi, Abimeleki ne bantu bo ajinga nabo bavundumukile po bafyamine. 36 Gala byo amwene bantu, waambijile Zebula amba: “Talai! Kuji bantu babena kukunkuluka kufuma peulu ya mitumba.” Bino Zebula wamwambijile’mba: “Mubena kumona bimvule bya mitumba amba bantu.”

37 Kabiji Gala waambile’mba: “Talai! Bantu babena kukunkuluka kufuma pakachi ka kyalo, kabiji jibumba jimo jibena kwishila mu jishinda jafuma ku kichi kikatampe kya Meonenamu.” 38 Zebula wamwambijile’mba: “Pano kwitota kobe kuji pi, byo waambile’mba, ‘Abimeleki ye ñanyi kya kuba’mba tumwingijilenga?’+ Nanchi bano kechi bo bantu bo wakaine nenyi? Kabiji lupuka ulwe nabo.”

39 Ponkapo Gala walupukile ne kutangilako kulutwe ya bantangi ba mu Shekema na kulwa ne Abimeleki. 40 Abimeleki wapupijile Gala, kabiji Gala wanyemene, kabiji bavula bebatapile kukafika ne ku kibelo kya muzhi.

41 Kabiji Abimeleki watwajijile kwikala mu Aluma, ne Zebula+ wapangile Gala ne balongo banji mu Shekema. 42 Juba jalondejilepo bantu balupukile ne kuya pangye ya muzhi, kabiji Abimeleki bamubuujile kino. 43 Onkao mambo, wasendele bantu banji ne kwibabanya mu mabumba asatu ne kubelamina pangye ya muzhi. Byo amwene bantu saka balupuka mu muzhi, wibalukukile ne kwibatapa. 44 Abimeleki ne mabumba o ajinga nao, bayile kulutwe ne kwimana ku kibelo kya muzhi, mabumba akwabo abiji saka alukuka aba bajinga pangye ya muzhi, kabiji bebatapile. 45 Abimeleki walwile na yewa muzhi aja juba jonse kabiji wamushinjile. Waipayile bantu bonse bajingamo ne kumukundula+ muzhi ne kukusamo mukele.

46 Bantangi bonse ba mu kyamba kya mu Shekema byo baumvwine kino, ponkapo batwelele mu kibamba* kya nzubo ya kwa Eli-belita.+ 47 Abimeleki byo bamubuujiletu’mba bantangi ba mu kyamba kya mu Shekema bakonkana pamo, 48 Abimeleki ne bantu bonse bo ajinga nabo bakanjijile pa Mutumba wa Zalimonyi. Abimeleki washikwile kapasa mu kuboko kwanji ne kutema musampi ne kumusenda pa kipuzhi kyanji ne kwambila bantu bo ajinga nabo amba: “Byonkatu byo mwaji kummona na kuba, ne anweba mupelawizhe kuba byonkabyo!” 49 Onkao mambo, bonse pa muntu pa muntu batemene misampi ne kulondela Abimeleki. Kepo babikile misampi pa kibamba ne kwikisoka. Onkao mambo, bantu bonse bajinga mu kyamba kya mu Shekema nabo bafwile, banabalume ne banabakazhi nobe 1,000.

50 Abimeleki wayile ku Tebeza; kabiji watujile bulemo Tebeza ne kumushinda. 51 Pajinga kyamba kyakosa pakachi ka muzhi, kabiji banabalume ne banabakazhi ne bantangi bonse ba mu muzhi banyemejile monka. Beshinkijilemo ne kukanjila peulu ya kyamba. 52 Abimeleki wayile ku kyamba na kwikyonauna. Wafwenyenye ku kibelo kya kyamba amba ekisoke. 53 Kepo mwanamukazhi umo atayile mpelo pa mutwe wa kwa Abimeleki ne mutwe wanji walajikile.+ 54 Ponkapo waichile kalume wanji wamusendelanga bilwilo byanji ne kumwambila’mba: “Somona mpoko yobe ungipaye, pa kuba’mba bakabule kwamba pe amiwa amba, ‘Bamwipayile ku mwanamukazhi.’” Byonkabyo, kalume wanji wamupulankenye ne kufwa wafwile.

55 Banabalume bena Isalela byo bamwene’mba Abimeleki wafwa, bonse babwelele ku mazubo abo. 56 Onkao mambo, Lesa wafwetele Abimeleki pa bubi bwaubile shanji bwa kwipaya balongo banji 70.+ 57 Kabiji Lesa wabwezhezhe bubi bwaubile bena Shekema pa mitwe yabo bene. Onkao mambo, mafingo a kwa Yotamo+ mwana wa kwa Yelubaela+ ebafikijile.