Mitonyi
10 Kufuma pe Abimeleki, paishile Tola mwana wa kwa Puwa, Puwa mwana wa kwa Dodo, mwina Isakala, waishile ne kupokolola bena Isalela.+ Waikalanga mu Shamila mu mpunzha ya mitumba ya Efelaimu. 2 Kabiji wachibijilenga bena Isalela mambo pa myaka 23. Kabiji wafwile ne kumuzhiika mu Shamila.
3 Pe aye palondejile Yaila mwina Gileada, kabiji pa myaka 22 wachibijilenga bena Isalela mambo. 4 Wajinga na baana ba balume 30 baendanga pa bambongolo 30, kabiji bajinga na mizhi 30, itelwa ne lelo jino amba Havota-yaila;+ ino mizhi iji mu kyalo kya Gileada. 5 Yaila wafwile kabiji bamuzhiikile mu Kamona.
6 Bena Isalela batendekele jikwabo kuba bintu byatama ku meso a Yehoba,+ batatwile kwingijila Baela,+ bipashañano bya Ashatoleta, balesa ba bena Alamu,* balesa ba bena Shidona, balesa ba bena Moabu,+ balesa ba bena Amonyi+ ne balesa ba bena Filishitiya.+ Bamushile Yehoba kabiji kechi bamwingijilenga ne. 7 Kepo Yehoba abuukijile bukaji bena Isalela, kabiji wibapoteshe ku bena Filishitiya ne ku bena Amonyi.+ 8 Onkao mambo, abo bamanyikilenga bingi bena Isalela mu yewa mwaka—bamanyikilenga bena Isalela bonse bajinga ku bushiya bwa Yodano mu kyalo kyajinga kya bena Amoli mu Gileada pa myaka 18. 9 Bena Amonyi nabo baabukanga Yodano kuya na kulwa na bena Yuda ne bena Benjamina ne ba mu kisemi kya kwa Efelaimu; kabiji bena Isalela bamanamine bingi. 10 Kepo bena Isalela bamujijiile Yehoba amba ebakwashe+ ne kwamba’mba: “Twimulenga mambo, mambo twimusha anweba Lesa wetu, ne kwingijila Baela.”+
11 Bino Yehoba waambijile bena Isalela amba: “Nanchi kechi nemupokolwele mu Ijipita,+ ku bena Amoli,+ ku bena Amonyi, ku bena Filishitiya,+ 12 ku bena Shidona, ku bena Amaleki ne ku bena Mijanyi byo bemumanyikilenga nenyi? Byo mwanjijiile, nemupokolwele mu maboko abo. 13 Pakuba anweba mwanshile ne kuya na kwingijila balesa bangi.+ O ene mambo o nsakubujila kwimupokolola jikwabo.+ 14 Yainga ku balesa bo mwisajila ne kwibajijila’mba bemukwashe.+ Abo bemupokolole mu kimye kya malwa enu.”+ 15 Bino bena Isalela bamwambijile Yehoba amba: “Twalenga mambo. Tubai kyonse kyo mwamona’mba kyawama kwi anweba. Pano bino, twapopwela, tupokololai jonka ja lelo.” 16 Ne abo batayile balesa bangi bo bajinga nabo, kabiji baingijilenga Yehoba,+ kya kuba kechi watwajijile kutalapotu* pa buyanji bwa bena Isalela ne.+
17 Mu kuya kwa moba, bena Amonyi+ bakonkene pamo ne kutebelela mu Gileada. Ne bena Isalela nabo bakonkene pamo ne kutebelela ku Mizipa. 18 Bantu ne babinemanga ba mu Gileada beshikishenga mulwabo amba: “Ñanyi usakutangilako kuya na kulwa na bena Amonyi?+ Aye ekale mfumu wa bangikazhi bonse ba mu Gileada.”