Nkalata Itanshi ya kwa Petelo
4 Kilishitu byo amanamine mu mubiji,+ ne anweba inengezhai kulanguluka byonka byo alangulukanga;* mambo muntu wamanama ku mubiji waleka kulenga mambo,+ 2 kuba’mba mu kimye kyashalako kya bwikalo bwanji mu mubiji, obenga kyaswa muchima wa Lesa,+ kechi kuba bisakasaka bantu ne.+ 3 Mambo kimye kyapitapo kyo mwaubijilengamo bintu bikeba bisaka bya bantu+ kyawana, byo mwaubilenga byubilo bya kwizozola,* bya lwiso, kutomatoma binyu, kusangalala kubi,* kupendwapendwa ne kupopwela bankishi.+ 4 Bakumya bingi mambo kechi mwatwajijila kuba byubilo byatama byo bobapo ne, onkao mambo bemwambila byatama.+ 5 Bino bano bantu baketotolwela ku yewa winengezha kala kuchibila mambo bomi ne bafu.+ 6 O ene mambo, mambo awama o asapwijilwe ne mu bafu,+ kuba’mba nangwa bebachibila mambo ku mubiji na mumwena bantu, bakekale bomi mu kwingila kwa mupashi monka mumwena Lesa.
7 Bino mpelo ya bintu byonse yafwenya kala pepi. Onkao mambo, langulukainga bulongo+ ne kwikala na muchima wa kulomba kimye kyonse.+ 8 Kyakila pa byonse, itemwishai anwe bene na bene,+ mambo butemwe buvweta pa mambo avula.+ 9 Saka mwitambwila anwe bene na bene kwa kubula kunyinyita.+ 10 Monka muntu yense mo atambwijile kya bupe, ekingijishenga kukwashishamo bakwabo byo aji kalama wa lusa lukatampe lwa Lesa lumwekela mu mashinda apusana pusana.+ 11 Umvwe muntu wamba, ambe byambo byafuma kwi Lesa; umvwe mukwabo wingila, aketekele mu bulume bupana Lesa;+ kuba’mba Lesa atumbijikwe mu bintu byonse+ kupichila mwi Yesu Kilishitu. Lukumo ne bulume byo byanji myaka ne myaka. Amena.
12 Anweba batemwe, kange mukumye pa mambo a meseko o mubena kupitamo aji nobe mujilo,+ uba nobe kechi mwayuka kibena kwimumwekela ne. 13 Pano bino, sekelainga+ mambo ne anweba mubena kumanama bintu byapichilemo Kilishitu,+ pa kuba’mba mukasangalale bingi kimye kikasololwa lukumo lwanji.+ 14 Umvwe babena kwimunena* na mambo a jizhina ja Kilishitu, mwi ba lusekelo,+ mambo kino kimwesha’mba muji na mupashi wa lukumo, ko kuba’mba mupashi wa Lesa.
15 Nangwa byonkabyo, muntu nangwa umo mwi anweba kange amaname na mambo a kwikala mbanzhi nangwa ngivi nangwa ngubabibi nangwa wibika mu mambo a bakwabo ne.+ 16 Bino umvwe muntu wamanama na mambo a kwikala mwina Kilishitu, kange omvwe bumvu ne,+ pakuba atumbijikenga Lesa mu jino jizhina. 17 Mambo kino kyo kimye kyatongolwa kya bunchibamambo kuba’mba butendekele mu nzubo ya Lesa.+ Pano umvwe bwatendekela kwi atweba,+ pano kikekala byepi ku boba bakana kukookela mambo awama a Lesa?+ 18 “Umvwe muntu waoloka wafwainwa kwingila na ngovu pa kuba’mba Lesa akamupulushe, pano kikekala byepi ku muntu ubula kwakamwa Lesa ne ku ndengamambo?”+ 19 Onkao mambo, aba babena kumanama na mambo a kuba kyaswa muchima wa Lesa, batwajijile kwifikizha abo bene* ku Mulenga wa kishinka byo babena kuba kyawama.+