Mpelo Yabyonse Byoibena Kufwenya Kwipi, Ikalai Namuchima Wamaana
1 Byambo bya Lesa byabwezha-bwezhapotu kulumbulula kwiya kwajuba ja Yehoba amba jikeya “nobe ngivi,” kokuba’mba jikasolomokatu kyakubazhimukila. (1 Tesa. 5:2; Mat. 24:43; 2 Pe. 3:10; Lum. 3:3; 16:15) Pakyokino, Yesu waambile’mba: “Mwikale ba kutengelela jimo: mambo Mwana muntu ukeya mu kimye kyo mwabula kuketekela.” (Mat. 24:44) Twakonsha kutwajijila byepi kwikala bantu babena kutengela kumupashi mpelo byo ibena kufwenya kwipi? Kishinka kikatampe kyatangijilwe namupashi wazhila pakwikinemba kekyakuba’mba: ‘Ikalai na muchima wa maana.’—1 Pe. 4:7.
2 Kwikala namuchima wamaana kwavwangamo kumona bintu mujishinda mwibimwena Yehoba. (Efi. 5:17) Muchima wamaana witukwasha kwimona atweba bene amba twi ‘benyi ne bakañenda’ mubuno bwikalo botujimo. (1 Pe. 2:11) Witukwasha kuyuka bintu byawamisha, kabiji nekwibikila bikonkwanyi, kepo nekufuukula bintu bulongo.—Fili. 1:10.
3 Ibikilai Bikonkwanyi Byakumupashi: Kwibikila bikonkwanyi byakumupashi nekwibyuba kwitukwasha kwikala namuchima wamaana. Nanchi mwibikilapo bikonkwanyi byakumupashi byomubena kukeba kufikizhanyi? Nanchi mubena kwibikako kutanga Baibolo pajuba pajuba, kutanwa kukupwila konse kwabwina Kilishitu, kutanga magazini yonse ilupulwa ya Kyamba kya Usopa ne Loneni!, nangwa kampe kwingijisha mumwingilonyi? Umvwe mwibikila bikonkwanyi bimufwainwa, kosaiko kuba’mba mukebyube, kabiji lombai Yehoba ukemukwasha kwibimona.
4 Mukulumpe umo mukipwilo washikishe bamulume nemukazhi bakyanyike pamambo abikonkwanyi byakumupashi byobebikijile. Jino jipuzho jibavulwileko kuba’mba umvwe bapeezhako bwikalo bwabo nekupwisha kupana bikoloto byonse bibaletelanga kijikila, bakonsha kwikala bapainiya. Babikile kino kekikonkwanyi kyabo. Bafwetele bikoloto byonse byobajinga nabyo kubantu nekumonapo mashinda akukepesheshamo bintu byobaubanga byabujilenga kukebewa bibapwishishangatu kimye kyabo nengovu yabo. Nekyakine, pakupitapotu mwaka umo bafikizhe kikonkwanyi kyabo. Kika kyafuminemo? Mulume waambile’mba: “Kwakubula bikonkwanyi umvwe kechi tuji byonka byotuji lelo jinone. Tuji bingi nalusekelo. Bwikalo bwetu bwamutende kabiji bwawaminako. Pano luno twayuka kyotubena kuba mubwikalo bwetu kabiji buji nankebelo.”
5 Byotubena kupembelela juba ja Yehoba, twayai tutwajijile kutengelanga kumupashi mukwikala namuchima wamaana saka tubena kutesha muchima kuba kyaswa muchima wa Lesa.—Titu. 2:11-13.