Ingijishai Bikonkwanyi byo Mwibikila mu Mwingilo wa Lesa Kutumbijikilamo Mulenga Wenu
INGE muntu kechi wayuka ko abena kuya ne, kafwako kintu kyakonsha kumukwasha kufika ko abena kuya ne. Kipelako ulubilamotu. Ntemwamaana wa kala mwina Loma ye waambile’mba pa kuba’mba muntu obe bintu byawama mu bwikalo bwanji, wafwainwa kwibikila bikonkwanyi.
Baibolo witubuula bantu bavula bingi bebikijile bikonkwanyi mu bwikalo bwabo ne kwibifikizha. Nowa waingijile myaka 50 “kufiika bwato bwa kupulushishamo ba mu nzubo yanji.” Ngauzhi Mosesa naye “watajilenga ku mfweto yo bakamufweta.” (Bahebelu 11:7, 26) Wapingakene pe Mosesa aye Yoshua bamupeele mwingilo kwi Yehoba wa kushinda ntanda ya Kenana.—Mpitulukilo ya mu Mizhilo 3:21, 22, 28; Yoshua 12:7-24.
Mu myaka itanshi, mutumwa Paulo wibikijile kikonkwanyi. Aye wayukile byambo byaambile Yesu bya kuba’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.” (Mateo 24:14) Yesu wabuujile Paulo kusapwila bantu ba mu bisaka pe aye. Kabiji Paulo waingijile bingi kulenga bipwilo mu byalo byavula.—Byubilo 9:15; Kolose 1:23.
Bakalume ba Yehoba kimye kyonse bamunemeka byo bebikila bikonkwanyi bya kumwingijila ne kwibifikizha. Ano moba twakonsha kwibikila byepi bikonkwanyi mu mwingilo wa Lesa? Ñanyi bikonkwanyi byo twafwainwa kukanamina kabiji ñanyi bintu byafwainwa kwitukwasha pa kuba’mba twibifikizhe?
Twafwainwa kwibikila byepi bikonkwanyi byafwainwa?
Bantu bakonsha kwibikila bikonkwanyi byapusana pusana. Pakuba bantu bengijila Yehoba bebikila bikonkwanyi byapusana bingi na bantu babula kumupopwela. Bantu bavula bintu byo bakebesha bingi kwikala nabyo mu bwikalo bwabo ke mali ne kuya nkuwa. Abino kechi byo bikonkwanyi byo twafwainwa kwibikila ne. Tunemekatu Yehoba inge twibikila bikonkwanyi bitukwasha kumwingijila bulongo. (Mateo 6:33) Twibikila bino bikonkwanyi mambo twamutemwa Lesa ne bantu bakwetu.—Mateo 22:37-39; 1 Timoti 4:7.
Twafwainwa kwibikila bikonkwanyi bya kwingijila Yehoba ne kwikala na byubilo byafwainwa mwina Kilishitu. Pano bino, bikonkwanyi byonse byo twibikila, kimye kimo kikatazha bingi kwibifikizha. Pano ñanyi kintu kyafwainwa kwitukwasha kufikizha bikonkwanyi byetu?
Ñanyi kintu kiketukwasha kwibifikizha?
Twafwainwa kufunjilako ku kikonkwanyi Yehoba kyo ebikijile pa kulenga jiulu ne ntanda. Byambo bya mu Baibolo bya kuba’mba “kwajinga mabanga ne lukelo pa juba jitanshi” bibena kumwesha’mba Yehoba wanengezhezhe bulongo mwingilo wanji ne kutela kimye kya kulengelamo bintu amba juba. (Ntendekelo 1:5, 8, 13, 19, 23, 31) Byo alengelenga bintu, wayukile kine kintu kyo ebilengejilenga pa joja juba. Kabiji Lesa wafikizhe kyaswa muchima wanji ku byonse byo alengele. (Lumwekesho 4:11) Mushakulu aye Yoba waambile’mba: “Umvwe [Yehoba] ubena kukeba kuba kintu, wikyuba.” (Yoba 23:13) Yehoba watemenwe bingi kumona bintu “byonse byo alengele” ne kwamba’mba “byawamishatu”!—Ntendekelo 1:31.
Pa kuba’mba tufikizhe bikonkwanyi byetu bya kwingijila Yehoba, twafwainwa kwibikako kuba’mba twibifikizhe. Ñanyi kintu kiketukwasha kukebesha kwibifikizha? Yehoba saka akyangye kupwisha kulenga ino ntanda, wayukijile jimo kuba’mba ino ntanda ikawama bingi. Inge twaikala biji Yehoba ne kulangulukanga pa bintu byo tuba ne buwame bukafumamo mu bikonkwanyi byetu, tukebikishako bingi kwibifikizha. Umvwai byaubile Tony wa myaka 19. Tony byo afwakashijile ofweshi wa musampi wa Bakamonyi ba kwa Yehoba, walangulukilepo bingi pa bintu byo amwene pa musampi. Kufumatu kyokya kimye, Tony watwajijile kwiipuzha mwine amba: ‘Bwikalo bwami bwafwainwa kwikala byepi inge naya na kwingijila pa ofweshi wa musampi?’ Na mambo a kuba’mba Tony watwajijile kulangulukapo kwingijila pa musampi, wakebeshe bingi kuyapo kabiji watwajijile kwibikako pa kuba’mba afikizhe kikonkwanyi kyanji. Byo papichile myaka yavula, Tony bamwichile kwingijila pa musampi kabiji watemenwe bingi.
Jishinda jikwabo jafwainwa kwitukwasha kukebesha kufikizha bikonkwanyi byetu bya kwingijilamo Lesa ke kupwanañananga na bantu babena kwingijila Yehoba. Jayson byo afikizhe myaka 30, kechi watemenwe mwingilo wa kusapwila ne. Nangwa byonkabyo, wafunjile kutemwa mwingilo wa kusapwila kabiji byo apwishishetu sukulu waikele painiya wa kimye kyonse. Ñanyi kintu kyakwashishe Jayson kukebesha kwikala painiya wa kimye kyonse? Mwine wakumbula’mba: “Kwisambanga na bapainiya ne kwingilanga nabo mu mwingilo ko kwandengejile.”
Inge Twanemba Bikonkwanyi Byetu Kuketukwasha Kwibifikizha
Inge twanemba byo tukeba kuba kiketupeelela bingi kwibifikizha. Solomone wanembele mu Baibolo amba byambo byawama byakonsha kwitukwasha kufuukulapo bintu byawama mu bwikalo bwetu. (Musapwishi 12:11) Inge twanemba byo tukeba kuba, tukatwajijila kulangulukangapo. O ene mambo Yehoba o akambizhizhe bamfumu bonse ba bena Isalela kwinembela bene buku wa Mizhilo. (Mpitulukilo ya mu Mizhilo 17:18) Twafwainwa kunemba bikonkwanyi byetu ne bya kwibifikizha. Kabiji twakonsha ne kunemba makatazho o tukapitamo ne bya kwiapwisha. Kabiji inge twakebakeba bintu byo tubena kukeba kuba ne kwipuzhako bakwetu kiketupeelela bingi kwibyuba.
Geoffrey wajinga painiya wiikaijila pa myaka yavula bingi ku Asia. Byo ebikijile bikonkwanyi, kyamukwashishe kubula kwakamwa kintu nangwa kimo. Mukazhanji byo afwile lufu lwa kubazhimukilatu, bintu byamukatezhe bingi. Papichile kimye kyabaya pa kuba’mba Geoffrey apimpuleko bintu bimo. Wafuukwilepo kupayankana bingi mu mwingilo wa kusapwila. Byo anembele pa pepala bintu byo akeba kuba, walombelepo kuba’mba ataanepo bantu basatu ba kufunjisha Baibolo pa kupwa kwa ñondo. Pa juba pa juba wapitulukangamo mu mingilo yanji. Kabiji inge papita moba jikumi waikalanga panshi ne kumona byo aingila. Nanchi wafikizhe kikonkwanyi kyanji nyi? Ee wafikizhe. Geofffrey watemenwe bingi kwikala na bantu bana ba kufunjisha Baibolo.
Ibikilai Bikonkwanyi Bicheche byo Mwafwainwa Kufikizha
Bikonkwanyi bimo bimweka bingi kukatazha kuba’mba twibifikizhe. Tony wakebeshe bingi kwingijila pa ofweshi wa musampi wa Bakamonyi ba kwa Yehoba. Bino wamwenenga’mba kino kuba wikyuba ne, mambo ukyangye kwipana kala kwi Lesa. Tony wimwenenga’mba kechi wakonsha kufikizha kikonkwanyi kyanji ne, mambo wafwainwe patanshi kupimpula bintu byavula bingi mu bwikalo bwanji kabiji kechi wakifuukwilepo kwingijila Lesa ne. Tony wapimpwile byubilo byanji pa kuba’mba afikilemo kubatizhiwa. Byo abatizhiwe, wafuukwilepo kwingilako bupainiya bwa kukwasha. Kabiji mu kuya kwa moba waikele painiya wa kimye kyonse. Tony wanembanga pa kalenda wanji byo akeba kuba mu mwingilo wa Lesa. Byo aingijileko bupainiya bwa kimye kyonse pa kimye kyabayako, Tony wamwene’mba pano wafikilamo kuya na kwingijila pa ofweshi wa musampi.
Onkao mambo, ne atwebatu twafwainwa kwibikila bikonkwanyi bicheche. Inge twibifikizha po po tukamona byabaya byo twafwainwa kwingijilapo. Inge kimye kyonse saka tupituluka mu bintu byo twauba kuketukwasha kuyilako palutwe. Kabiji inge saka tulomba kwi Yehoba kimye kyonse pa bikonkwanyi byo twibikila, uketukwasha kwibifikizha. Mutumwa Paulo witutundaika atweba bonse amba: “Lombainga kimye kyonse.”—1 Tesalonika 5:17.
Twajijilai Kwibikako Kufikizha Bikonkwanyi Byenu
Nangwa kya kuba tuji na mutanchi wawama kabiji twakebesha kwingijila pa bintu bimo, kimye kimo bikonkwanyi bimo kechi twibifikizha ne kwibifikizhatu ne. Twafwainwa kufunjilako ku mwana wa bwanga aye Mako. Wakebeshe bingi kuya pamo ne Paulo pa lwendo lwa bubiji lwa bumishonale. Pano bino, Paulo kechi wakebele’mba aye nanji ne. Akino kyafwainwa kyamukolele bingi Mako ku muchima. (Byubilo 15:37-40) Mako wafwainwa wafunjijileko ku kintu kyamumwekejile ne kupimpulako bikonkwanyi byanji bya mu mwingilo wa Lesa. Mambo palutwe kacheche, Paulo waambilepo byawama bingi pe aye. Kabiji Mako waingijile bingi bulongo na mutumwa Petelo mu Babilona. (2 Timoti 4:11; 1 Petelo 5:13) Mako waingijile mwingilo wanema bingi. Mambo Yehoba wamwingijishe kunemba byajinga bwikalo bwa kwa Yesu ne mwingilo wanji.
Mu mwingilo wetu wa kwingijila Yehoba twakonsha kupita mu makatazho pa kuba’mba tufikizhe bikonkwanyi byetu. Inge tubena kupita mu makatazho, kechi twafwainwa kulefulwa ne. Kyo twafwainwa kuba ke kupituluka mu byo tubena kwingila ne kupimpulako bikonkwanyi byetu. Atweba twafwainwa kutwajijilatu na kwibikako kwa kubula kuleka. Kechi kimye kyonse kyo tufikizha bintu byo tukeba kuba ne. Mfumu wa maana aye Solomone witubuujile’mba: “Pana kwi Yehoba bintu byonse byo uba, ne bintu byo ufuukula kuba bikalumbuluka.”—Byambo bya Maana 16:3.
Bimye bimo, kechi kyapeela kufikizha bikonkwanyi byetu ne. Kampe twakonsha kukolwa nangwa kwikala na mwingilo wa kulama ba mu kisemi kyetu ne kukankalwa kwibikila bikonkwanyi. Bino tuyuke’mba kwingijila Yehoba tukekala na bumi bwa myaka ne myaka mu paladisa pano pa ntanda. (Luka 23:43; Filipai 3:13, 14) Baibolo witubuula byafwainwa kuba muntu pa kuba’mba akekala na bumi bwa myaka. Mutumwa Yoano wanembele’mba: “Awa uba kyaswa muchima wa Lesa ukekala myaka ne myaka.” (1 Yoano 2:17) Nangwa kya kuba bwikalo bwetu kechi bwakonsha kwituswisha kwibikila bikonkwanyi bimo mu mwingilo wa Lesa ne, bino twafwainwa ‘kwakamwanga Lesa wa kine ne kulama mikambizho yanji.’ (Musapwishi 12:13) Kwibikila bikonkwanyi bya kwingijila Yehoba kwitukwasha kutatu muchima pa kuba kyaswa muchima wanji. Onkao mambo, twayai atweba bonse tubenga bintu bitumbijika Lesa wetu.
[Kitenguluzha]
Bikonkwanyi Byafwainwa Kwimukwasha Kwingijila Yehoba Bulongo
○ Tangainga Baibolo kimye kyonse
○ Tangainga Byamba bya Usopa ne Labainga!
○ Tuwamishengako milombelo yetu
○ Tumweshenga bipangwa bya mupashi
○ Twingilengako pakatampe mu mwingilo wa Lesa
○ Twibikeko kwila basendwe mu mwingilo wa kusapwila ne kufunjisha bantu
○ Twibikeko kuyuka bya kwingijisha bulongo mafoni pa kusapwila, bya kusapwila busapwishi bwa kushukilwa ne kusapwila mu mapunzha a busulu