Nkalata Itanshi kwi Timoti
6 Bonse basenda kikonkoji kya buzha bavulukenga kuba’mba bankambo yabo bafwainwa kunemekwa bingi,+ pa kuba’mba jizhina ja Lesa ne mafunjisho anji bibule kunenwa bibi.+ 2 Kabiji aba baji na bankambo yabo baitabila kechi bebalengulule na mambo a kuba’mba balongo ne. Bino bafwainwa kwingila na ngovu, mambo bantu babena kumwenamo byawama mu mingilo yabo yawama ke boba baitabila kabiji batemwe.
Saka wibafunjisha bino bintu ne kwibabuula ino mikambizho. 3 Umvwe muntu keafunjishe lufunjisho lungi ne kukana mukambizho wawama+ wafuma kwi Nkambo yetu Yesu Kilishitu, nangwa kukana lufunjisho lwayila mu munema wa kunemeka Lesa,+ 4 ko kuba’mba awo muntu witota kabiji kechi wakwatakanya kintu nangwa kimo ne.+ Waikala ke wa mapata kabiji upachika pa byambo.+ Abino bintu bileta kichima, lutobo, luntepentepe,* kulangulukila bakwenu byatama, 5 ne mapata o bapachika kimye kyonse pa tubintu tucheche bantu baji na michima yatama+ ne kukankalwa kumvwisha mwayila bukine, saka balanguluka’mba mu munema wa kunemeka Lesa mo mwa kumwena bintu.+ 6 Ibyo kuba’mba mu munema wa kunemeka Lesa+ mo mwa kumwena bintu byavula inge tubena kusekela mu bintu byonka byo tuji nabyo. 7 Mambo kafwako kintu nangwa kimo kyo twaletelepo pano pa ntanda ne, kabiji kafwako kyo twakonsha kusendapo ne.+ 8 Onkao mambo, byo tuji na kajo ne bivwalo,* tusekela mu bino bintu.+
9 Nangwa byonkabyo, aba bakebesha bunonshi baponena mu lweseko, mu kitewa,+ mu bintu bya kukosama ne mu bya kusakasaka bipayañana, bitwala bantu ku lufu ne ku lonaiko.+ 10 Mambo kutemwa mali ye muzhazhi wa misango yonse ya bubi, kabiji bamo na mambo a kwiakebesha ebasendula mu lwitabilo kabiji beasaula bene na misongo yavula.+
11 Nangwa byonkabyo, obewa muntu wa Lesa, uchine bino bintu. Bino saka ulondalonda bololoke, munema wa kunemeka Lesa, lwitabilo, butemwe, kuchinchika ne kukooka muchima.+ 12 Lwanga bulwi bwawama bwa lwitabilo; kwachisha ku bumi bwa myaka ne myaka, bo bakwichijile kabiji wisolwele patoka ku bakamonyi bavula.
13 Kwi Lesa, yenka upana bumi ku bintu byonse ne kwi Kilishitu Yesu, yenka washimwine patoka kwi Pontiusa Pilato,+ nakukambizha namba 14 ulamenga ino mikambizho kwa kubula biko kabiji kwa kubula kaneneno kufikatu ne kimye kikamweka Nkambo yetu Yesu Kilishitu,+ 15 byo bakekimwesha kwi Nkambo wa bulume kabiji wa lusekelo mu kimye kyatongolwa. Mfumu wa bamfumu ne Nkambo wa bankambo,+ 16 yenka ubula kufwa,+ waikala mu kyeya kya kukankalwa kufikako,+ ye bakyangye kumonapo ku muntu nangwa umo kabiji ye bakonsha kubula kumona.+ Kwi aye kwikale munema ne bulume bwa myaka ne myaka. Amena.
17 Wibakambizhe banonshi ba mu buno bwikalo* amba kechi belundumikenga* ne, kabiji kange baketekele mu bunonshi bwatutu ne,+ kana kuketekela mwi Lesa, yenka witupa bintu byonse byo twatemwa.+ 18 Wibabuule’mba, bobenga byawama, bekale banonshi ba mingilo yawama, bampanyi, benengezha kukwashañana,+ 19 beajile abo bene kitendekesho kyawama kya kulutwe kwikala kya buneme kyabo,+ pa kuba’mba bakwachishe ku bumi bwa kine kine.+
20 Obewa Timoti, lama akya kyo bakupele,+ vundamina ku bya kwambaamba byatu bizhilulula kyazhila ne ku bintu bya bubela byo bepachikapo byo batela’mba o “maana.”+ 21 Na mambo a kwimwesha’mba baji na ano maana, bamo bafuma mu lwitabilo.
Lusa lukatampe lwikale pe anweba.