BYAMBAPO BAIBOLO

Mali

Nanchi mali muzhazhi wa misango yonse ya bubi nyi?

“Kutemwa mali ye muzhazhi wa misango yonse ya bubi.”—1 Timoti 6:10.

BYAMBA BANTU Mali ye muzhazhi wa misango yonse ya bubi.

BYAMBA BAIBOLO “Kutemwa mali” ye muzhazhi wa “misango yonse ya bubi,” kechi mali ene ne. Mu Baibolo, mfumu wajinga bingi na bunonshi aye Solomone, watongwele misango isatu ya bubi imwekela bantu batemwa mali. Bijikila: “Kwikuchisha kwa munonshi kwamukanya tulo.” (Musapwishi 5:12) Kubula kutondwa: ‘Awa utemwa mali kechi ukatondwa na mali ne; kabiji awa utemwa nsabo nangwa wamwenamo ikwabo kechi ukatondwa ne.’ (Musapwishi 5:10) Lweseko lwa kuba bintu byatama: “Awa usaka kunonka bukiji bukiji kechi akabule kumona lukabisho ne.”—Byambo bya Mana 28:20.

Mali engila ñanyi mwingilo?

‘Mali akwashañana.’—Musapwishi 7:12.

BYAMBA BANTU Mali azhikijila ne kuleta lusekelo.

BYAMBA BAIBOLO Mulanguluko wa kuba amba mali akonsha kulengela muntu kwikala na lusekelo ne kuzhikijilwa ke bubela bumweshatu patoka “bulume bwa bujimbijimbi bwa bunonshi.” (Mako 4:19) Pano bino, “mali akwashañana mu byonse.” (Musapwishi 10:19) Kya kumwenako, twakonsha kwingijisha mali pa kupota bintu bikebewa pa kuba’mba twikale na bumi, nabiji kajo ne muchi.—2 Tesalonika 3:12.

Mali etukwasha ne kulama bulongo kisemi kyetu. Baibolo waamba’mba: “Kine umvwe muntu kechi wibakebela bintu aba bo alama kikatakata ba mu nzubo yanji mwine ne, wilukana lwitabilo kabiji watama kukila yewa wabula lwitabilo.”—1 Timoti 5:8.

Mwakonsha kwingijisha byepi mali bulongo?

‘Ikalai panshi ne kubala mali ajipo.’—Luka 14:28.

BYAMBA BAIBOLO Ingijishainga mali mu Jishinda jaitabizha Lesa. (Luka 16:9) Kyawama bingi kwingijisha mali bulongo kabiji mu bukishinka. (Bahebelu 13:18) Pa kuba’mba muchinuzhuke kukeba bintu byavula byakila bulume bwenu, mwafwainwa kwikala “babula kutemwa mali.”—Bahebelu 13:5.

Nangwa kya kuba Baibolo kechi ukanya kukongola mali ne, bino witujimunako amba: “Ukongola ye muzha wa yewa umukongwesha.” (Byambo bya Mana 22:7) Chinuzhukainga kupota bintu byabula pa mutanchi wenu, mambo “bonse boba bya lubilo lubilo bakayanda.” (Byambo bya Mana 21:5) Bino, saka mutulapo “milambo mwayila bintu byo [muji] nabyo,” nangwa’mba mali a kwingijisha ku bintu bikwabo byanema mu bwikalo.—1 Kolinda 16:2.

Baibolo witutundaika’mba “Saka mupana.” (Luka 6:38) Bantu bakeba kutokesha Lesa pa muchima bafwainwa kwikala bampanyi, mambo “Lesa watemwa muntu upana na lusekelo.” (2 Kolinda 9:7) Onkao mambo, “kange muvulamenga kuba byawama ne kupapo bakwenu bintu byenu ne, mambo bitapisho bya uno mutundu bitokesha Lesa ku muchima.”—Bahebelu 13:16.